ހަނގުރާމަވެރި ޖަމާއަތްތަކުން ސީރިޔާގެ ވެރިރަށް ދިމިޝްކު ހިފައި، އެ ގައުމުގެ ދުވަސްވީ ހުދުމުހުތާރު ވެރިކަން ނިމުމަކަށް ގެނައުމާއެކު ވޭތުވެދިޔަ 24 އަހަރު އެ ގައުމުގެ ވެރިކަމުގައި ހުންނެވި ރައީސް ބައްޝާރުލް އަސަދު ގައުމު ދޫކޮށް ފިލަން ޖެހުމުން ހިތާމަކުރައްވާ ކަމަށް ކުރީގެ ރައީސް މައުމޫން އަބްދުލްގައްޔޫމް ވިދާޅުވެއްޖެ އެވެ.
ސޯޝަލް މީޑިއާގައި ކުރެއްވި ޕޯސްޓެއްގައި މައުމޫން ލިޔުއްވާފައިވަނީ، އެމަނިކުފާނުގެ ރަހުމަތްތެރި އަސަދު ގައުމު ދޫކޮށް ފިލަން ޖެހުމުން ހިތާމުކުރައްވާ ކަމަށެވެ. އަދި ސީރިޔާގެ އަހުންނާއި އުހުތުންނަށް ސުލްހަމަސަލަސްކަމާއި އުފާފާގަތިކަމަށް އެދިވަޑައިގަންނަވާ ކަމަށްވެސް، ރާއްޖޭގައި 30 އަހަރުގެ ދިގު ވެރިކަމެއް ކުރެއްވި މައުމޫން ލިޔުއްވާފައިވެ އެވެ.
އަސަދުގެ ވެރިކަން ފުރޮޅާލީ މާޗު 2011 ގައި ފެށި ދާހިލީ ހަނގުރާމަ ދަހަރަކަށްވުރެ ދިގު މުއްދަތަށް ދިގުލައިގެން ދިޔުމަށްފަހު އިދިކޮޅު ޖަމާއަތްތަކުން މުޅި ސީރިޔާގެ ކޮންޓްރޯލް ނެގުމާއެކު އެވެ.
މިއާއެކު އަސަދުގެ ވަފާތެރި އެތައް ހާސް ސިފައިން ވެސް ވަނީ ފިލައިގެން އެހެން ތަންތަނަށް ހިޖުރަ ކޮށްފައި ކަމަށް ރިޕޯޓުތައް ބުނެ އެވެ. ހަނގުރާމަވެރިން މިހާރު ވަނީ އަސަދުގެ ގަނޑުވަރަށް ވެސް ވަދެފަ އެވެ.
އަސަދުގެ 24 އަހަރުގެ ވެރިކަމަކީ ހުދުމުހުތާރު، އަނިޔާވެރި ވެރިކަމެއްގެ ގޮތުގައި ސީރިއާގެ އާންމުންނާއި ބައިނަލްއަގުވާމީ މުޖުތަމައުންވެސް ދެކެ އެވެ. އެގޮތުން 13 އަހަރުވީ ދާހިލީ ހަނގުރާމާގައި އަސަދުގެ ސިފައިން ވަނީ އެ ގައުމުގެ އެތައް ހާސް އާންމުންނެއް މަރާފަ އެވެ.
އަދި އާންމުންނާ ދެކޮޅަށް ކެމިކަލް ހަތިޔާރު ބޭނުންކުރިކަމާއި ޖަލުތަކުގައި އެތައް ލާއިންސާނީ އަނިޔާތަކެއް ދިންކަމުގެ ތުހުމަތުވެސް އަސަދުގެ ސަރުކާރަށް ވަނީ އަމާޒުވެފަ އެވެ. ހަނގުރާމަވެރިން މިހާރު ދަނީ އެ ޖަލުތަކުގައި ތިބި އެތައް ބަޔަކު މިނިވަންކުރަމުންނެވެ.
އަސަދުގެ ވެރިކަމާ ދެކޮޅަށް ހަނގުރާމަކުރަމުންދާ ޖަމާއަތްތަކުގައި ދިވެހިން ވެސް ހަރަކާތްތެރިވެ އެވެ. އެގޮތުން މިދިޔަ ހަފުތާ ސީރިއާގެ ހަލަބު ސިޓީ ހިފުމުގައި އެ ގައުމުގައި ހަރަކާތްތެރިވާ ދިވެހީން ބައިވެރިވެފައިވާކަން މި ނޫހުގެ ޓީމުން ވަނީ ކަށަވަރުކޮށްފަ އެވެ.
ދިމިޝްގުގެ މަގުތައް މަތީގައި އެތައް ހާސް މީހުން ނުކުމެ އުފާ ފާޅު ކުރަމުންދާ ކަމަށް ރޮއިޓާސްއިން ރިޕޯޓު ކުރެ އެވެ. އޭގެ އިތުރުން މީސްމީޑިއާގައި އަލްޖަޒީރާގެ ނޫސްވެރިން ޕޯސްޓުކޮށްފައިވާ ބައެއް ވީޑިއޯތަކުން ވެސް ސީރިއާއަށް މިނިވަންކަން ލިބިއްޖެ ކަމަށް ބުނެ ގިނަ އަދަދެއްގެ މީހުން އުފާ ފާޅު ކުރާ މަންޒަރު ފެނެ އެވެ.
