މެޑްރިޑް (ޑިސެމްބަރު 8) - ސްޕެނިޝް ލީގުގައި ރޭ ރެއާލް ބެޓިސްއާ 2-2 އިން އެއްވަރުވެ، ލީގުގެ އެއް ވަނައިގައި އޮތް ބާސެލޯނާ އަތުން ޕޮއިންޓް ގެއްލުމުގެ ފައިދާ ރެއާލް މެޑްރިޑުން ނަގައިފި އެވެ.
ރެއާލުން ވަނީ ރޭ ކުޅުނު މެޗުގައި ޖިރޯނާ އަތުން 3-0 އިން މޮޅުވެފަ އެވެ. މި ނަތީޖާއާ އެކު، ރެއާލަށް ވަނީ އަނެއްކާ ވެސް ބާސެލޯނާއާ އެއްވަރަށް މެޗު ހަަމަކުރާއިރު އެއް ވަނަ އަށް އަރަން ފުރުސަތު ލިބިފަ އެވެ.
ބާސެލޯނާ މި ވަގުތު އެއް ވަނައިގައި އޮތީ 17 މެޗުން 38 ޕޮއިންޓާ އެކު އެވެ. ދެ ވަނައިގައި އޮތް ރެއާލަށް ވަނީ 16 މެޗުން 36 ޕޮއިންޓް ލިބިފަ އެވެ. ތިން ވަނައިގައި އޮތް އެތުލެޓިކޯ މެޑްރިޑަށް ވަނީ 15 މެޗުން 32 ޕޮއިންޓް ލިބިފަ އެވެ.
ޖޫލްސް ކޫންޑޭ ދިން ބޯޅައަކުން 39 ވަނަ މިނިޓްގައި ރޮބަޓް ލެވަންޑޯސްކީ ވަނީ ގޯލު ޖަހައި ބާސެލޯނާ އަށް ލީޑުނަގައިދީފަ އެވެ. މިއީ މި ފަހަރު ލީގުގައި ލެވަންޑޯސްކީގެ 16 ވަނަ ގޯލެވެ. މިއީ ސީޒަނުގައި ކުޅުނު 21 މެޗުން ލެވަންޑޯސްކީގެ 23 ވަނަ ގޯލެވެ.
ބެޓިސް ދަނޑުގައި ކުޅުނު މި މެޗުގައި އެ ޓީމުން ފުރަތަމަ ފަހަރަށް އެއްވަރުކުރީ، 68 ވަނަ މިނިޓްގައި ޖިއޮވާނީ ލޮ ސެލްސޯ ކާމިޔާބުކުރި ޕެނަލްޓީންނެވެ. މިއީ، ބެޓިސްގެ ވިޓޯ ރޯކޭ އަށް ބާސެލޯނާގެ ފްރެންކީ ޑި ޔޯން ކުރި ފައުލަކަށް ދިން ޕެނަލްޓީ އެކެެވެ.
މެޗުގެ 82 ވަނަ މިނިޓްގައި ފެރާން ޓޮރޭޒް ވަނީ ބާސެލޯނާ އަށް އަލުން ލީޑުނަގައިދީފަ އެވެ. ބެޓިސް އިން ދެ ވަނަ ފަހަރަށް އެއްވަރުކުރީ މެޗުގެ އިތުރު ވަގުތުގައި، އަސާނޭ ޑިއާއޯ ޖެހި ގޯލުންނެވެ.
ޖިރޯނާ ދަނޑުގައި ފުރަތަމަ ހާފުގައި ރެއާލުން ލީޑުނެގީ ޖޫޑް ބެލިންހަމް ޖެހި ގޯލުންނެވެ. މިއީ ސްޕެނިޝް ލީގުގައި މި ފަހަރު އޭނާ ޖެހިޖެހިގެން ލަނޑު ޖެހި ފަސް ވަަނަ މެޗެވެ. ރެއާލުން އަނެއް ދެ ގޯލު ޖެހީ މެޗުގެ ދެ ވަނަ ހާފުގަ އެވެ. އެ ގޮތުން، މެޗުގެ 55 ވަނަ މިނިޓްގައި ރެއާލުގެ އާޑާ ގުލާ ގޯލު ޖެހީ ބެލިންހަމް ދިން ބޯޅައަކުންނެވެ. އަދި އޭގެ ހަތް މިނިޓް ފަހުން، ލޫކަ މޮޑްރިޗް ތަނަވަސްކޮށްދިން ފުރުސަތެއްގައި، ކީލިއަން އެމްބާޕޭ ވަނީ ރެއާލްގެ ތިން ވަނަ ލަނޑު ޖަހައިފަ އެވެ.
