ލެސްޓާ (ޑިސެމްބަރު 3) - ލެސްޓާ ސިޓީގެ ކޯޗުކަމާ ހަވާލުވީ ގިނަ ކްލަބްތަކެއްގެ އޮފާ ލިބިފައި އޮއްވައި ކަމަށާއި ކަންކަން ރަނގަޅަށް ކުރަން ލެސްޓާގައި ކުރަން ޖެހޭ ކަންކަން އެނގޭ ކަމަށް އެ ޓީމާ ދާދި ފަހުން ހަވާލުވި ކޯޗު ރޫޑް ވޭން ނިސްޓެލްރޫއީ ބުނެފި އެވެ.
ނިސްޓެލްރޫއީ، މި ސީޒަން ފެށީ މެންޗެސްޓާ ޔުނައިޓެޑްގެ އެސިސްޓަންޓް ކޯޗެއްގެ ގޮތުގަ އެވެ. ޔުނައިޓެޑްގެ ކޯޗަކަށް ހުރި އެރިކް ޓެން ހާގް ވަކިކުރުމުން، ވަގުތީ ހެޑް ކޯޗަކަށް ނިސްޓެލްރޫއީ ވަނީ ދެ ހަފްތާ މަސައްކަތްކޮށްފަ އެވެ. އެ މުއްދަތުގައި ދެ ފަަހަރުގެ މަތިން ލެސްޓާއާ ކުޅެ ވަނީ މޮޅުވެފަ އެވެ.
ނިސްޓެލްރޫއީ، ލެސްޓާއާ އެކު ސޮއިކުރީ، 2027 ވަނަ އަހަރުގެ ޖޫން މަހުގެ ނިޔަލަށް އޮތް ކޮންޓްރެކްޓެއްގަ އެވެ. މަގާމާ ހަވާލުވެ، ޒިންމާ ނެގުމުގެ ކުރިން ލެސްޓާ އިން މެޗެއް ކުޅެފައިވެ އެެވެ. އެއީ، ބްރެންޓްފޯޑް އަތުން 4-1 އިން ބަލިވި މެޗެެވެ. އެ މެޗު ބަލަން ނިސްޓެލްރޫއީ ހުރީ ލެސްޓާގެ ވެރިންނާ އެކު އެވެ.
"އަހަންނަށް އެހެން ކްލަބްތަކާ ގުޅެން ވެސް ފުރުސަތު އޮތް. އެކަމަކު، ލެސްޓާ މި ނެގީ އަހަންނަށް ކުރަން ޖެހޭ މަސައްކަތްތައް އެނގޭތީ، އަމިއްލަ ނަފްސަށް އިތުބާރު އޮތުުމުން،" ނިސްޓެލްރޫއީ ބުންޏެވެ.
ނިސްޓެލްރޫއީ މިދިޔަ ސީޒަނުގައި ޕީއެސްވީ އައިންދޯވަންގައި ހުރިއިރު، ނެދަލެންޑްސްގެ ކަޕް ކާމިޔާބުކޮށް، ލީގުގެ ދެ ވަނަ ހޯދި އެވެ. ނެދަލެންޑްސް ޔޫތު ޓީމާއި ޕީއެސްވީގެ 19 އަހަރުން ދަށުގެ ޓީމަށް ވެސް ކޯޗުކޮށްދިނެވެ.
"ހަތަރު މެޗު ޔުނައިޓެޑްގައި ހެޑް ކޯޗަކަށް މި ހުރީ، ފުލް ސީޒަނެއް ޕީއެސްވީގައި މަސައްކަތްކޮށް ކާމިޔާބު ހޯދުނު. ޕީއެސްވީ އާއި ނެދަލެންޑްސް ގައުމީ 19 އަހަރުން ދަށުގެ ކޯޗުކަން ވެސް ކުރެވުނު، އެކަމަކު، ލެސްޓާއާ ހަވާލުވެ މި އަމާޒުވާ ކަންކަން މިއީ ފުރަތަމަ ފަހަރަށް ތަޖުރިބާ ކުރަން ޖެހޭ ކަންކަން،" ނިސްޓެލްރޫއީ ބުންޏެވެ.
ލެސްޓާ މި ވަގުތު ލީގުގެ 16 ވަނައިގައި އޮތްއިރު، އެ ޓީމުން ނިސްޓެލްރޫއީ ކޯޗުކޮށްދޭ ފުރަތަމަ މެޗުގައި މިރޭ ނުކުންނާނީ ވެސްޓް ހޭމް ޔުނައިޓެޑާ ދެކޮޅަށެވެ.
