ދިވެހި ޔޫތު ލީގުގެ 16 އަހަރުން ދަށުގެ މުބާރާތުގައި މާޒިޔާ ސްޕޯޓްސް އެންޑް ރެކްރިއޭޝަން އިން ކުޅުނު ފުރަތަމަ މެޗުގައި ފަހަތުން އަރައި ކްލަބް އީގަލްސް ބަލިކުރިއިރު، ސުޕަ ޔުނައިޓެޑް ސްޕޯޓްސް (ސަސް) އިން ފަސޭހަކަމާއެކު ހުއްރިއްޔާ ސްޕޯޓްސް ކްލަބް ބަލިކޮށްފި އެވެ.
އިއްޔެ ހަވީރު ހެންވޭރު ބޯޅަ ދަނޑުގައި ކުޅުނު ފުރަތަމަ މެޗުގައި އީގަލްސްގެ މައްޗަށް މާޒިޔާ އިން ކުރިހޯދީ 2-1 ގެ ނަތީޖާ އަކުންނެވެ.
މި މެޗުގައި ފެނިގެންދިޔަ ތިން ގޯލު ވެސް ފެނިގެންދިޔައީ މެޗުގެ ދެވަނަ ހާފުގަ އެވެ. މެޗުގެ 42 ވަނަ މިނެޓުގައި އީގަލްސްގެ މުހައްމަދު މުޝާހް ޖެހި ގޯލުން އެ ޓީމު ލީޑު ނެގިނަމަވެސް މެޗުގެ 55 ވަނަ މިނެޓުގައި ލޫތު ބިން ވަނީ ގޯލު ޖަހާ އެ ޓީމަށް ނަތީޖާ ހަމަހަމަ ކޮށްދީފަ އެވެ. މެޗުގައި މާޒިޔާއިން މޮޅުވި ލަނޑު މެޗުގެ 70 ވަނަ މިނެޓުގައި ކާމިޔާބުކުރީ ހުސެއިން ޝާން އެވެ.
މީގެ އިތުރުން ރޭ ސަސް އިން ހުއްރިއްޔާގެ މައްޗަށް ކުރިހޯދީ 6-0 ގެ ނަތީޖާ އަކުންނެވެ.
މެޗު ފަށައިގެން މިނެޓެއް ނުވަނީސް ސަސް އަށް ލީޑު ނަގާދިނީ އަހުމަދު ލައިތް އައްބާސް ކާމިޔާބުކުރި ގޯލުންނެވެ. އަދި އޭގެ ފަސް މިނެޓު ފަހުން ސަސްގެ އަހުމަދު އަފްނާން އަލީ ވަނީ ގޯލު ޖަހާ އެ ޓީމުގެ ލީޑު ފުޅާކޮށްދީފަ އެވެ. އަދި މެޗުގެ 20 ވަނަ މިނެޓުގައި ސަސްގެ ތިންވަނަ ގޯލު އެ ޓީމަށް ޖަހާދިނީ އާކިފް ބިން މުހައްމަދު އެވެ. ފުރަތަމަ ހާފު ނިމުމުގެ ކުރިން ސަސް އިން ވަނީ އިތުރު ގޯލެއް ޖަހާފަ އެވެ. މި ގޯލު ވެސް އެ ޓީމަށް ޖަހާދިނީ އަފްނާން އެވެ.
ސަސްގެ ފަސް ވަނަ ގޯލު ދެވަނަ ހާފުގައި އެ ޓީމަށް ޖަހާދިނީ އަބްދުالله އައިދާން ސާޖިދް އެވެ. އަދި ސަސް އިން ޖެހި ފަހު ގޯލު އެޓީމަށް ޖަހާދީ އަފްނާން ވަނީ މެޗުގައި ހެޓްރިކް ފުރިހަމަ ކޮށްފަ އެވެ.
މި މެޗުތަކަށް ފަހު، ދިވެހި ޔޫތު ލީގުން ބްރޭކެއް ނަގާނެ އެވެ. އެއީ، ރާއްޖޭން ބޭރުގައި ގިނަ އެެކެޑަމީތަކެއް ބައިވެރިވާ މުބާރާތްތަކެއް އޮތުމުންނެވެ.
