މިހާރު އަމަލުކުރަމުން އަންނަ ބޭރު ފައިސާ މާރުކުރުމުގެ ގަވާއިދުގެ ދަށުން ލައިސެންސަށް އެދި ހުށަހެޅީ 98 ވިޔަފާރިއަކުން ކަމަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން މިއަދު ހާމަކޮށްފި އެވެ.
އެމްއެމްއޭއިން ހިއްސާކުރި މައުލޫމާތުން ދައްކާ ގޮތުގައި މިދިޔަ މަހުގެ ނިޔަލަށް 212 ލައިސެންސެއް ދޫކޮށްފައި އޮތެވެ. ނަމަވެސް އާ ގަވާއިދުގައި ބުނާ ގޮތަށް ރަޖިސްޓްރީ ކުރަން ހުށަނާޅާތީ އިއްޔެއިން ފެށިގެން މީގެ ތެރެއިން 163 ވިޔަފާރިއެއްގެ ލައިސެންސް ވަނީ ބާތިލުވެފަ އެވެ. އޭގެ ތެރޭގައި ހިމެނެނީ 99 ވިޔަފާރިއަކާއި 64 ރިސޯޓެވެ.
ލައިސެންސަށް އެދި ހުށަހެޅި ފަރާތްތަކުގެ ތެރެއިން ބޭރު ފައިސާ ގަނެ ވިއްކުމުގެ ހުއްދަ، އެއީ ޓީއާ ވަން މަނީ އެކްސްޗޭންޖު ލައިސެންސް، އަށް އެދުނީ 79 ވިޔަފާރިއަކުންނެވެ. އޭގެ ތެރޭގައި ހިމެނެނީ އަލަށް މި ހުއްދައަށް އެދުނު 44 ވިޔަފާރި އާއި މީގެ ކުރިން ވެސް މި ހުއްދަ އޮތް 35 ވިޔަފާރިއެކެވެ.
އާ ގަވާއިދުގެ ދަށުން ރިސޯޓުތައް ހިމެނެނީ ބޭރު ފައިސާ ވިއްކާ ޓިއާ ޓޫ ކެޓަގަރީގަ އެވެ. މި ކެޓެގަރީގެ ދަށުން ފަސް ރިސޯޓަކުން އަލަށް ލައިސެންސް ހޯދަށް ހުށަހަޅާފައިވާއިރު، ކުރިން ހުއްދަ އޮތް ރިސޯޓުތަކުގެ ތެރެއިން ލައިސެންސް އާ ކުރަން ހުށަހެޅީ 14 ރިސޯޓަކުންނެވެ.
މި ގަވާއިދާއެކީ ބޭރު ފައިސާ ގަނެ ވިއްކުމުގެ ވިޔަފާރިތަކަށް ވަކި ޝަރުތުތަކެއް ފުރިހަމަކުރަން އަންގާފައި ވެ އެވެ. އެ ޝަރުތުތަކަކީ، ހަމައެކަނި ބޭރު ފައިސާ ގަނެ ވިއްކުމުގެ ވިޔަފާރިއަކަށް ވުމާއި އޮޑިޓުކޮށްފައި ހުރި މާލީ ރިޕޯޓުތައް ހުށަހަޅަން ޖެހުމާއި އެއިން ކޮންމެ ވިޔަފާރިއެއްގައި ހުސް ދިވެހިން ތިބުން ލާޒިމުކުރުމުގެ އިތުރުން އެމްއެމްއޭއަށް ޖަވާބުދާރީ ވާ ގޮތަށް ކޮމްޕްލަޔަންސް އޮފިސަރަކު ހުރުމެވެ.
އެމްއެމްއޭ އިން ބުނި ގޮތުގައި މަނީ އެކްސްޗޭންޖް ލައިސެންސް ދޫކުރާނީ މި ހުރިހާ ޝަރުތެއް ފުރިހަމަވާ ވިޔަފާރިތަކަށް އެކަންޏެވެ. އަދި މިއިން އެއްވެސް ޝަރުތަކާ ހިލާފު ވެއްޖެ ނަމަ އެ ވިޔަފާރިއެއްގެ ހުއްދަ ބާތިލުކުރާނެ ކަމަށް މަރުކަޒީ ބޭންކުން ބުންޏެެވެ.
ބޭރު ފައިސާ މާރުކުރުމުގެ ގަވާއިދަށް މި ގެނައި އިސްލާހުތަކުގެ ދަށުން އެ ތަންތަނުން ވިޔަފާރިކުރާ ކަސްޓަމަރުންނަށް ވެސް ފަސޭހަތަކެއް ވެގެން ދާނެ ކަމަށް އެމްއެމްއޭއިން ބުންޏެވެ. އޭގެ ތެރޭގައި ކުރާ މުއާމަލާތްތަކުގެ ރިސިޓް ދޫކުރަން މަޖުބޫރު ވުމާއި ބޭރު ފައިސާ ގަނެ ވިއްކަން ލިބޭ އަގު އާންމުކޮށް ފެންނާނެހެން ހުރުން ހިމެނެ އެވެ.
މިއާ އެކީ ގަވާއިދާ އެއްގޮތަށް އަމަލުކުރޭތޯ ކަށަވަރުކުރަން ވެސް ފަސޭހަ ވެގެން ދާނެ ކަމަށް އެމްއެމްއޭއިން ބުންޏެވެ.
