ނޭޝަނަލް ސޯޝަލް ޕްރޮޓެކްޝަން އެޖެންސީ (އެންސްޕާ) ގެ އޮފީސް ހިންގުމަށް ކުއްޔަށް ހިފާފައި ހުރި ތަނެއްގައި ސަރުކާރު އިސްވެރިންގެ މަސްލަހަތު އޮތް "އެމްއެމްޓީވީ" ހިންގާ ކަމަށް ކުރެވޭ ތުހުމަތާ ގުޅިގެން ގަލޮޅު ދެކުނު ދާއިރާގެ މަޖިލިސް މެންބަރު، މީކާއިލް އަހުމަދު ނަސީމް ހުށަހެޅި ކުއްލި މައްސަލަ ބަލައިނުގަނެ ބޭރުކޮށްލައިފި އެވެ.
މިއަދު އޮތް މަޖިލީހުގެ ޖަލްސާ ފެށުމުގެ ގޮތުން ރިޔާސަތުން ވާހަކަ ދައްކަވަމުން، މަޖިލީހުގެ ރައީސް، އަބްދުއްރަހީމް އަބްދުﷲ ވިދާޅުވީ މީކާއިލް ނަސީމް ހުށާހަޅާފައިވާ ކުއްލި މައްސަލައިގެ ޝަރުތުތައް ހަމަ ނުވާތީ މަޖިލީހަށް ހުށަހެޅެން ނެތް ކަމަށެވެ.
"ގަލޮޅު ދެކުނު ދާއިރާގެ މަޖިލިސް މެންބަރު، މީކާއިލް އަހުމަދު ނަސީމް ފޮނުއްވާފައިވާ ކުއްލި މައްސަލައެއް ވަނީ ލިބިފައި، އެ މައްސަލައިގައި ރައްޔިތުންގެ މަޖިލީހުގެ 197 ވަނަ މާއްދާާގެ ކ. ގައި ކުއްލި މައްސަލައެއްގައި ހުންނަންވާނެ ކަމަށް ބަޔާން ކޮށްފައިވާ ޝަރުތު ފުރިހަމަ ނުވާތީ އެ މައްސަލަ މި ޖަލްސާއަށް ހުށަހެޅެން ނެތް ވާހަކަދަންނަވަން،" އަބްދުއްރަހީމް ވިދާޅުވި އެވެ.
މީކާއިލް ހުށަހެޅި ކުއްލި މައްސަލައިގައި އޮތީ، އެންސްޕާގެ އޮފީސް ހުންގުމަށް ޖޫން 25، ގައި ނެޝަނަލް ޓެންޑާ ބޯޑު މެދުވެރިކޮށް ކޮށްފައިވާ އިއުލާނާ ގުޅިގެން ބިޑު ހުށަހެޅި ފަރާތްތަކުގެ ތެރެއިން މޯލްޑިވްސް މީޑިއާ ހައުސް ޕްރައިވެޓް ލިމިޓެޑް ކިޔާ ކުންފުންޏަކަށް އެ ބިޑު އެވޯޑުކޮށް ފަސް އަހަރުދުވަހުގެ ކުލީގެ ގޮތުގައި 34.8 މިލިއަން ރުފިޔާއަށް އެ ކުންފުނީގެ އަތުން ހަތަރު ފްލޯ ކުއްޔަށްހިފާފައިވާ ކަމަށެވެ. އަދި އެއަށްފަހު އޭގެތެރެއިން ދެ ފްލޯއެއް މޯލްޑިވްސް މީޑިއާ ހައުސްއިން ނޮވެމްބަރު 28، ގައި ހިންގަން ފަށާފައިވާ އެމްއެމްޓީވީގެ އޮފީސް ހިންގުމަށް ކުއްޔަކާ ނުލައި އެ ކުންފުންޏަށް ދީފައިވާ ކަމަށް މީސްމީޑިއާގެ އެކި މަންސަތަކުގައި ތުހުމަތު ކުރެވެމުންދާ ކަމަށެވެ.
އޭގެއިތުރުން އެމްއެމްޓީވީގައި މަސައްކަތް ކުރުމަށް ވަޒީފާ ދީފައިވާ ނޫސްވެރިންނާއި ޕްރެޒެންޓަރުންތެ ތެރޭގައި ދައުލަތުގެ އެކިއެކި އިދާރާތަކުގައި މަސައްކަތް ކުރަމުންދާ މުވައްޒަފުން ހިމެނޭ ކަމާއި އެ މުވައްޒަފުންނަށް އެމްއެމްޓީވީގައި އަދާކުރާ ވަޒީފާއަށް ދޭންޖެހޭ އުޖޫރަ ދައުލަތުގެ ބަޖެޓުން ކަމަށް ތުހުމަތު ކުރެވޭ ވާހަކަ ވެސް ކުއްލި މައްސަލައިގައި ހިމަނާފައިވެ އެވެ.
މީކާއިލްގެ ބިލުގައި އޮތީ ރައްޔިތުންގެ ފައިސާއަށް ހިޔާނާތްތެރިވެ، ދައުލަތުގެ މާލިއްޔާގެ ނަހަމަ ބޭނުންކޮށްގެން ހިންގަމުންދާ މިފަދަ ގައިރު ގާނޫނީ އަމަލުތައް ކުށްވެރިކޮށް ރައްޔިތުންގެ މަޖިލީހުގެ ކަމާބެހޭ ކޮމިޓީން އެ މައްސަލަ އިތުރަށް ބަލައިދެއްވުމަށާއި އެކަމުގައި ޝާމިލްވާ އެންމެހައި ފަރާތްތަކާމެދު ގާނޫނުގައިވާ ގޮތުގައި މަތިން އަޅަންޖެހޭ ފިޔަވަޅު އެޅުމަށް ސަރުކާރަށާއި ރައްޔިތުންގެ މަޖިލީހަށް ގޮވާލާ ކަމަށެވެ.
އެންސްޕާގެ އޮފީސް ހިންގުމަށް ތަނެއް ކުއްޔަށް ހިފުމާއި އެއަށްފަހު އަމަލު ކުރި ގޮތާމެދު އެ އެޖެންސީއަށް ވަނީ ތުހުމަތުތަކެއް އަމާޒުވެފަ އެވެ. ނަމަވެސް އެންސްޕާއިން ވަނީ އެ ތުހުމަތުތައް ދޮގުކޮށް، އެ އެޖެންސީގެ އޮފީސް ހިންގުމަށް އިމާރާތެއް ކުއްޔަށް ހިފީ އުސޫލުގެ ތެރެއިން ކަމަށް ބުނެ ބަޔާނެއް ނެރެފަ އެވެ.
