ގިނަ ދުވަސްތަކެއްގެ މެދުކެނޑުމަކަށްފަހު، ރައްޔިތުންގެ މަޖިލީހުގެ މިއަހަރުގެ ފުރަތަމަ ދައުރުގެ ޖަލްސާތައް މިއަދު އަލުން ފެށުމަށް ތައްޔާރުވެއްޖެ އެވެ. އެންމެ ފަހުން މަޖިލީހުގެ ޖަލްސާއެއް ބާއްވާފައިވަނީ މިދިޔަ ފެބްރުއަރީ މަހުގެ 17 ވަނަ ދުވަހުއެވެ.
މިއަދުގެ ޖަލްސާ ފަށާނީ ހެނދުނު 10:30 ގަ އެވެ.
މިއަދުގެ ޖަލްސާއަށް އެޖެންޑާކޮށްފައިވާ އެންމެ މުހިންމު އެއް ކަމަކީ، ބޭރު ގައުމުތަކަށް ކަނޑައަޅުއްވާ ނޮން-ރެސިޑެންޓް ސަފީރުން އައްޔަނުކުރުމަށްޓަކައި ރައީސުލްޖުމްހޫރިއްޔާ މުހައްމަދު މުއިއްޒު ފޮނުއްވާފައިވާ މައްސަލަތައް ދިރާސާކުރުމަށް ކޮމިޓީއަށް ފޮނުވުމެވެ.
މީގެ އިތުރުން، ކުރިން މަޖިލީހުގައި ނުނިމި ހުރި މަސައްކަތްތަކުގެ ތެރެއިން ވަތަނީ ހިދުމަތުގެ ބިލްގެ ބަހުސް ކުރިއަށް ގެންދިއުން ވެސް އެޖެންޑާގައި ހިމެނެއެވެ.
މަޖިލީހުގެ ގަވާއިދު ބުނާ ގޮތުން، މަޖިލީހުގެ ރައީސަކީ ވަކި ފަރާތަކަށް ޖެހުމެއްނެތި، ގާނޫނުއަސާސީއާއި ގަވާއިދާ އެއްގޮތްވާ ގޮތުގެމަތިން މަޖިލީހުގެ އިދާރާއާއި، ޖަލްސާތަކާއި، ކޮމިޓީތައް ހިންގުމުގެ އެންމެ އިސްވެރިޔާއެވެ. އަދި ކޮންމެ ޖަލްސާއެއްގެ ޔައުމިއްޔާގައި ކަންކަން ސާފުކޮށް އެނގެން އޮންނަންޖެހޭނެ ކަމަށް ގަވާއިދުގައި ބަޔާންކުރެއެވެ.
އެންމެ ފަހުން ބޭއްވި ޖަލްސާ ނިންމާލިއިރު މަޖިލީހުގެ ޖަލްސާ ދެން ބާއްވާނެ ދުވަހެއް އިއުލާނެއް ނުކުރެ އެވެ. އަދި ގިނަ ދުވަސްތަކެއް މަޖިލީހުގެ ޖަލްސާ ނުބޭއްވި ސަބަބު ހާމަކޮށްފައެއް ނެތެވެ.
މަޖިލީހުގެ ޖަލްސާތައް ކޮންމެ ދައުރަކަށް ފެށުމަށް ފަހު ހޯމަ، އަންގާރަ، އަދި ބުދަ ދުވަހު ޖަލްސާ ބާއްވަ އެވެ.
