"ލާދީނީ" ޓެގު އަޅުވާތީ އެމްޑީޕީ މެންބަރުންގެ ކަންބޮޑުވުން، ރިޔާސަތުން ވިދާޅުވީ ހުއްޓުވޭނެ ގޮތެއް ނެތް ކަމަށް

"ލާދީނީ" ޓެގު އަޅުވާތީ އެމްޑީޕީ މެންބަރުންގެ ކަންބޮޑުވުން، ރިޔާސަތުން ވިދާޅުވީ ހުއްޓުވޭނެ ގޮތެއް ނެތް ކަމަށް

ރައްޔިތުންގެ މަޖިލީހުގެ ތަޅުމުގައި އިދިކޮޅު މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) ގެ މެންބަރުންގެ ބޮލުގައި "ލާދީނީ" ޓެގު އަޅުވާތީ ކަންބޮޑުވުން ފާޅުކުރުމުން އެކަން ހުއްޓުވޭނެ ގޮތެެއް މިވަގުތު ނެތް ކަމަށް ރިޔާސަތުން އަންގައިފި އެވެ.

މަޖިލީހުގެ މިއަދުގެ ޖަލްސާގައި ކުރިއަށްދަނީ ޓެރަރިޒަމްގެ ގާނޫނަށް އެމްޑީޕީއަށް ނިސްބަތްވާ ގަލޮޅު އުތުރު ދާއިރާގެ މެންބަރު މުހައްމަދު އިބްރާހިމް (ކުޑޫ) ހުށަހެޅުއްވި އިސްލާހުގެ ބަހުސެވެ. އެއީ މިސްކިތަށް ގެއްލުން ދިނުމަކީ ޓެރަރިޒަމްގެ އަމަލެއްގެ ގޮތުގައި ކަނޑައެޅުމަށް ހުށަހަޅާފައިވާ ބިލެކެވެ.

އެ ބަހުސްގައި ވާހަކަ ދައްކަވަމުން ވެރިކަން ކުރާ ޕީޕަލްސް ނެޝަނަލް ކޮންގްރެސް (ޕީއެންސީ) ގެ ޕީޖީ ލީޑަރު އަދި އިނގުރައިދޫ ދާއިރާގެ މެންބަރު ފަލާހު ވަނީ އެމްޑީޕީއަކީ ދީނާ ދުރު ޕާޓީއެއް ކަމަށް ތުހުމަތު ކުރައްވާފަ އެވެ.

Advertisement

"އެމްޑީޕީއަކީ އަބަދުވެސް ލާދީނީ ފިކުރުގެ ބައެއް،" ފަލާހު ވިދާޅުވި އެވެ.

ބިލުގެ ބަހުސްގައި ފަލާހު މައިގަނޑުކޮށް ދެއްކުމަށް މަސައްކަތް ކުރެއްވީ އެމްޑީޕީ އިސްލާމް ދީނާ ދުރު ކަމެވެ.

އެއަށްފަހު އެމްޑީޕީގެ ފަރާތުން ވާހަކަ ދެއްކެވި ކަނޑިތީމު ދާއިރާގެ މެންބަރު މުހައްމަދު އަމީން އާއި ވައިކަރަދޫ ދާއިރާގެ މެންބަރު ހުސައިން ޒިޔާދު (ފިއްޓޭ) އޭގެ ތެރެއިން ބައެއް ވާހަކަތަކަށް ރައްދު ދެއްވި އެވެ.

ބިލު ހުށަހެޅި މެންބަރު ކުޑޫ ވަނީ "ލާދިނީ" މީހުންގެ ގޮތުގައި ލޭބަލް ކުރުން ހުއްޓުވައިދިނުމަށް ރިޔާސަތުގައި އިންނެވި މަޖިލިސް ރައީސް އަބްދުއްރަހީމްގެ އަރިހުން އެދިވަޑައިގެންފަ އެވެ.

"މިއީ އަނގަ ހައްދު ޖަހަން ޖެހޭ ދީނުން ބޭރުވާ ކަހަލަ ވާހަކަ އެކަކު އަނެކަކާ ދިމާލަށް ގޮވުން، ވަރަށް އިހުތިރާމާއެކު ދަންނަވަން އެކަން ހުއްޓުވައިދެއްވާށޭ، އަޅުގަނޑުމެން ވެސް ފެންނަ ތަންތަނުން ތި ބޭފުޅުން ވެސް ފެންނާނީ. އަޅުގަނޑުމެން ބޮލުގައި ކެނޑިނޭޅި ތި އިލްޒާމު އަޅުވާ ކަމަށްވަންޏާ އަޅުގަނޑުމެންނަށް ލިބިދާނެ ގެއްލުމަކަށް ވެސް ތި ބޭފުޅުން ޒިންމާވާން ޖެހޭނެ،" ކުޑޫ ވިދާޅުވި އެވެ.

ރިޔާސަތުން ކުޑޫ އަށް ދެއްވި ޖަވާބުގައި އަބްދުއްރަހީމް ވިދާޅުވީ އެ ތުހުމަތުތައް ކުރަމުންދިޔަ ނަމަވެސް ހުއްޓުވޭނެ ގޮތެއް ނެތް ކަމަށެވެ.

"ލާދީނީ ކިޔާ ކިޔުން ހުއްޓުވަން މި ތަނުން ގާނޫނެއް ފާސްކޮށްފިއްޔާ ދެން އެކަން ހުއްޓުވިދާނެ. ދެން މިހާރު އޮތް ގޮތުން އަޅުގަނޑަކަށް ހުއްޓުވޭނެ ގޮތެއް ނެތް. އަޅުގަނޑު އެދެނީ އެއްވެސް ބޭފުޅަކު، ސައްތައިން ސައްތަ މުސްލިމް ގައުމެއް މިއީ، އަނެއް ބޭފުޅަކާ ދިމާލަށް އެފަދަ ބަހެއް ވިދާޅު ނުވާން،" އަބްދުއްރަހީމް ވިދާޅުވި އެވެ.

ދެވަނަ ފުރުސަތުގައި ވާހަކަ ކުރިއަށްގެންދަވަމުން ވެސް ފަލާހު ވަނީ ދިވެހި ރައްޔިތުންނަށް ވެސް ލާދީނީ ވާހަކަ ދައްކަނީ އެމްޑީޕީން ކަމަށް އެނގޭނެ ކަމަށް ވިދާޅުވެފަ އެވެ. އެމްޑީޕީން ދައްކާފައި ހުރި ލާދީނީ ވާހަކަ ނުފޮރުވޭނެ ކަމަށް ފަލާހު ވިދާޅުވި އެވެ.

އޭނާގެ ވާހަކަތަކަށް ރައްދު ދެއްވަމުން އެމްޑީޕީ ޕީޖީގެ ޑެޕިއުޓީ ލީޑަރު ފިއްޓޭ ވަނީ ބިލުގައި ވަކި މީހަކު މޮޅު ވާހަކައެއް ނުވަތަ ދަށް ވާހަކައެއް ނެތް ކަމަށް ވިދާޅުވެފަ އެވެ. އަދި ރިޔާސަތުން އެ ކަން ނުހުއްޓުވުމުން ވެސް ފިއްޓޭ ނުރުހުން ފާޅުކުރެއްވި އެވެ.

"އެއްވެސް މުސްލިމަކަށް އަނެއް މީހާއާ ދިމާލަށް ތިއީ ލާދީނީ މީހެކޭ ބުނުމުގެ ހައްގެއް ނޯންނާނެ. އެއީ އެކަން އޮތް ގޮތް. މަޖިލީހުގެ ގަވާއިދުގައި އިސްލާމް ދީނުގެ އަސްލަކާ ހިލާފު އެއްވެސް ވާހަކައެއް ދެއްކޭކަށް ނޯވޭ، އެއީ ކުރެވޭނެ ކަމެއް ނޫން،" ފިއްޓޭ ވިދާޅުވި އެވެ.

މި ރާއްޖެއަށް އިސްލާމް ދީން އައީ މިފަހަކުން ނޫން ކަމަށާއި މިހާރު ވެސް އޮތީ ކުރިން ވެސް އޮތް އިސްލާމް ދީން ކަމަށް ފިއްޓޭ ވިދާޅުވި އެވެ. އަދި ތާ އަބަދަށް ރާއްޖޭގައި އިސްލާމް ދީން ދެމިއޮންނާނެ ކަމަށް ފިއްޓޭ ވިދާޅުވި އެވެ.

"ތިހެން ނުދެންނެވޭނެ ރައީސް މުއިއްޒު ނެތް ދުނިޔެއެއްގައި އިސްލާމް ދީން ނޯންނާނެ ކަމަށް. އެހެނެއް ނޫން އެކަން އޮތީ. އަރާ އެންމެންނަކީ ލާދީނީ މީހުން ކަމަށް ނިންމުމުގެ ޖާގައެއް ޕީއެންސީ ޕީޖީ ލީޑަރަކަށް ނޯންނާނެ،" އޭނާ ވިދާޅުވި އެވެ.

އެ ބަހުސްގައި ވާހަކަ ދެއްކެވި އެހެން ބައެއް މެންބަރުން ވެސް ވަނީ އެއް ބަޔަކު އަނެއް ބަޔަކަށް "ލާދީނީ" ގޮވުމަކީ ރަނގަޅު ގޮތެއް ނޫންކަން ފާހަގަކުރައްވާފަ އެވެ.

ކޮމެންޓް

ފަހުގެ ޚަބަރު

ދިރާގު ރޯޑް ރޭސް 5،500އަށްވުރެ ގިނަ ދުވުންތެރިންނާއެކު ބާއްވައިފި

ދިރާގު މޯލްޑިވްސް ރޯޑް ރޭހުގެ 17 ވަނަ އެޑިޝަން 5،500 އަށްވުރެ ގިނަ ދުވުންތެރިންނާއެކު ހުޅުމާލެ ސެންޓްރަލް ޕާކުގައި ވަނީ ބާއްވާފައެވެ. މި ދުވުމުގެ ލައިވް އަޕްޑޭޓްތަކާއި، ނަތީޖާ އަދި ދުވުންތެރިންގެ ރޭންކިންގ ބަލައިލުމުގެ ފުރުސަތު ދިރާގުން ވަނީ ޚާއްޞަ މޮބައިލް އެޕްލިކޭޝަނެއް މެދުވެރިކޮށް ފަހިކޮށްދީފައެވެ.

ޕީއެންސީގެ މެންބަރުންގެ އަދަދު ލައްކައަކަށްވުރެ ދަށަށް

ސަރުކާރު ހިންގާ ޕީއެންސީގެ މެންބަރުންގެ އަދަދު އެއްލައްކައަށް އެރިތާ 24 ގަޑިއިރު ނުވަނީސް، އަލުން އެ އަދަދު ލައްކައަކަށް ވުރެ ދަށަށް ގޮސްފިއެވެ. އިދިކޮޅު ފަރާތްތަކުން ތުހުމަތުކުރާ ގޮތުގައި މި އަދަދު ހަމަކުރުމަށްޓަކައި ވަޒީފާގެ ބިރުދެއްކުމާއި ރިޝްވަތުގެ ގޮތުގައި ފައިސާ ބޭނުންކޮށްފައިވެއެވެ. އީސީގެ ތަފާސްހިސާބުތަކުން ދައްކާގޮތުގައި އެ ޕާޓީގެ މެންބަރުންގެ އަދަދު މިހާރު ވަނީ 99,930 އަށް ތިރިވެފައެވެ.

ރަސްމާލޭގެ ޑީލުގައި ސޮއިނުކުރަން އެދި އަލައްބާރަށް ސިޓީއެއް

ރަސްމާލެ މަޝްރޫއުގެ މިހާރުގެ ޝަރުތުތަކާއި ގާނޫނުއަސާސީއާ ފުށުއެރުންތަކެއް ހުރި ކަމަށާއި، އެކަމުގައި އެކަށީގެންވާ ގޮތެއްގައި ރައްޔިތުންގެ ހިޔާލު ހޯދާފައި ނުވާތީ، ދެން އަންނަ ސަރުކާރަކުން ވެސް މި މަޝްރޫއުގެ އެއްބަސްވުން އަލުން މުރާޖައާކުރުމަށް ނުވަތަ އެއްކޮށް ބާތިލުކުރުމުގެ ފުރުސަތު އޮތް ކަމަށް އެ ސިޓީގައި ބުނެފައިވޭ.

"ރަސްމާލެ މައްސަލައިގައި މުއިއްޒު ވަނީ އަނގަވަތަށް ވެއްޓިފައި"

ރަސްމާލެ މަޝްރޫއަކީ ރާއްޖޭގެ ސިޔާދަތަށް އުނިކަންލިބޭ، ބޭރުގެ ފަރާތްތަކަށް ބިން ދިނުމަށް ހިންގާ ހީލަތްތެރި ރޭވުމެއް ކަމަށް ވިދާޅުވެ ކުރީގެ ރައީސް ޔާމީން ސަރުކާރަށް ވަރަށް ބޮޑަށް ފާޑުވިދާޅުވެއްޖެއެވެ. މި މަޝްރޫއުގެ ސަބަބުން ރައީސް މުއިއްޒު ރައްޔިތުންގެ ކުރިމަތީގައި ބޭޒާރުވެފައިވާ ކަމަށާއި، މި ސަރުކާރަށް ދެވަނަ ދައުރެއް ރައްޔިތުން ނުދޭނެ ކަމަށް ޔާމީން ވިދާޅުވިއެވެ.

ރަސްމާލެ ދޫކޮށްލުމާ ދެކޮޅުވެރިކަމެއް ނެތްކަމުގެ އިޝާރާތެއް

ރަސްމާލެއިން ބައެއް ބޭރުގެ ކުންފުންޏަކަށް ދޫކޮށްލުމާ ދެކޮޅު ހަދަނީ މަދު ބަޔަކު ކަމަށާއި، ދިވެހިން އަބަދުވެސް އިސްކުރަނީ ގައުމީ ތަރައްގީކަން މުއިއްޒު ފާހަގަކުރެއްވި. މީގެކުރިންވެސް ރާއްޖެއަށް އައި ބޮޑެތި ބަދަލުތަކާ ބައެއް މީހުން ދެކޮޅު ހެދި ނަމަވެސް، ގިނަ ރައްޔިތުން ތާއީދުކުރީ ގައުމީ ކުރިއެރުމަށްކަން އެމަނިކުފާނު ބަޔާންކޮށްދެއްވި.

ހުލާސާކޮށް އިއްޔެ: ސިޔާސީ ޕާޓީތަކުގެ ދަފްތަރަށް އައި ބޮޑު ބަދަލު

ޕީއެންސީގެ މެންބަރުންގެ އަދަދު އެއްލައްކައަށް އެރުމާއެކު، ޖުމްހޫރީ ޕާޓީ އާއި އަދާލަތު ޕާޓީ ފަދަ ދުވަސްވީ ޕާޓީތަކުން ގިނަ އަދަދެއްގެ މެންބަރުންނާއި އިސް ބޭފުޅުން ވަނީ ވަކިވެފައެވެ. މީގެ އިތުރުން، ރަސްމީ ޖަލްސާތަކުގެ ޕްރޮޓޮކޯލަށް ބަދަލުތަކެއް ގެނެސްފައިވާއިރު، ރަސްމާލެ މަޝްރޫއާ ގުޅޭގޮތުން އިލްމުވެރިންނާއި ސިޔާސީ ފަރާތްތަކުގެ މެދުގައި ވަނީ ޚިޔާލުތަފާތުވުންތަކެއް އުފެދިފައެވެ.

ވަޒީފާގެ ބިރުދައްކައިގެން އެއްލައްކަ މެންބަރުން ހަމަކޮށްފި

ސަރުކާރު ހިންގާ ޕީއެންސީގެ މެންބަރުންގެ އަދަދު އެއްލައްކައަށް އަރާފައިވާއިރު، މިއީ ވަޒީފާގެ ބިރުދައްކައިގެންނާއި ރިޝްވަތު ދީގެން ހޯދި އަދަދެއް ކަމަށް ވަނީ ތުހުމަތުކުރެވިފައި. އިލެކްޝަންސް ކޮމިޝަނުގެ ދަފްތަރުން ދައްކާގޮތުގައި މިދިޔަ އަހަރާ އަޅާބަލާއިރު އެ ޕާޓީގެ މެންބަރުންގެ އަދަދު ވަނީ 26،000 އަށްވުރެ އިތުރުވެފައި.

Newsletter

Get the latest news delivered straight to your inbox