ދިވެހި ޔޫތު ލީގުގެ 16 އަހަރުން ދަށުގެ ކެޓަގަރީގައި ޓީސީ ސްޕޯޓްސް ކްލަބުން ކުޅުނު ފުރަތަމަ މެޗުގައި ބޮޑު މޮޅެއް ހޯދިއިރު, ވިކްޓްރީ ސްޕޯޓްސް ކްލަބްގެ މައްޗަށް ކްލަބް ވެލެންސިއާ ކުރިހޯދައިފި އެވެ.
މި މުބާރާތުގެ 16 އަހަރުން ދަށުގެ ކެޓަގަރީގެ ކުޅުން ފެށީ އިއްޔެ އެވެ. އިއްޔެ ފުރަތަމަ މެޗުގައި ޓީސީން ނުކުތީ ޔުނައިޓެޑް ވިކްޓްރީ (ޔޫވީ)އާ ދެކޮޅަށެވެ. މި މެޗު އެ ޓީމުން ކާމިޔާބުކުރީ 5-0 ގެ ނަތީޖާ އަކުންނެވެ.
މި މެޗުގެ ފުރަތަމަ ހާފު ޓީސީން ނިންމާލީ ހަތަރު ގޯލުގެ ލީޑެއްގައި އޮވެ އެވެ. އެގޮތުން މެޗުގެ ހަތަރުވަނަ މިނެޓުގައި ޓީސީގެ އައިހަމް އަމްޖަދު ގޯލު ޖަހާ ލީޑު ނެގިއިރު، އޭގެ ހަތަރު މިނެޓު ފަހުން ޓީސީގެ ނާހިލް ޔޫސުފް ވަނީ އިތުރު ގޯލެއް ޖަހާ ލީޑު ފުޅާކޮށްދީފަ އެވެ. އަދި މެޗުގެ 28 ވަނަ މިނެޓުގައި ނާއިލް ވަނީ އިތުރު ގޯލެއް ޖަހައިފަ އެވެ. ފުރަތަމަ ހާފު ނިމުމުގެ ކުރިން ޓީސީގެ ހަތަރު ވަނަ ގޯލު އެ ޓީމަށް ޖަހާދިނީ އައިހަމް އެވެ. މެޗުގައި ޓީސީން ކާމިޔާބުކުރި ފަސް ވަނަ ގޯލު މެޗުގެ 56 ވަނަ މިނެޓުގައި އެ ޓީމަށް ކާމިޔާބު ކޮށްދިނީ މުހައްމަދު ޖޫދު އިސްމާއިލް އެވެ.
މީގެ އިތުރުން އިއްޔެ ކުޅުނު ދެ ވަނަ މެޗުގައި ވިކްޓްރީގެ މައްޗަށް ވެލެންސިއާ ކުރިހޯދީ 1-0 ގެ ނަތީޖާ އަކުންނެވެ. ވާދަވެރި ކުޅުމެއް ފެނިގެންދިޔަ މި މެޗުގައި ވެލެންސިއާ އިން ކާމިޔާބުކުރި ހަމައެކަނި ގޯލު މެޗުގެ 69 ވަނަ މިނެޓުގައި އެ ޓީމަށް ޖަހާދިނީ އަލީ އިލާން އަހުމަދެވެ.
މި މުބާރާތުގައި މިއަދުވެސް ދެ މެޗު ކުޅޭނެ އެވެ. ފުރަތަމަ މެޗުގައި މިއަދު ހަވީރު ކްލަބް އީގަލްސް އިން ނުކުންނާނީ މާޒިޔާ ސްޕޯޓްސް އެންޑް ރެކްރިއޭޝަންއާ ދެކޮޅަށެވެ. ދެވަނަ މެޗުގައި ސުޕަ ޔުނައިޓެޑް ސްޕޯޓްސް (ސަސް) އިން ނުކުންނާނީ ހުއްރިއްޔާ ސްޕޯޓްސް ކްލަބާ ދެކޮޅަށެވެ.
