ދިވެހި ޔޫތު ލީގުގައި އީގަލްސްއާ ދެކޮޅަށް ކުޅުނު މެޗުތައް ހުއްރިއްޔާ ސްޕޯޓްސް ކްލަބުން (ހުރާ އިން) ކާމިޔާބުކުރިއިރު, ސުޕަ ޔުނައިޓެޑް ސްޕޯޓްސް (ސަސް) އިން މާޒިޔާ ސްޕޯޓްސް އެންޑް ރެކްރިއޭޝަން ބަލިކޮށްފި އެވެ.
އިއްޔެ ހެނދުނު ބޯ ވިއްސާރައިގައި 12 އަހަރުން ދަށުގެ މެޗުގައި ހުރާ އިން އީގަލްސްއާ ދެކޮޅަށް ނުކުތްއިރު, މި މެޗު އެ ޓީމުން ކާމިޔާބުކުރީ 2-1 ގެ ނަތީޖާ އަކުންނެވެ.
މި މެޗު ފަށައިގެން ހަ ވަނަ މިނެޓުގައި ހުރާ އިން ވަނީ ގޯލު ޖަހައި ލީޑު ނަގައިފަ އެވެ. މި ގޯލު އެ ޓީމަށް ޖަހައިދިނީ ޔޫދު މުހައްމަދު ނިޒާމް އެވެ. އޭގެ ފަހުން، މެޗުގެ ދެ ވަނަ ހާފު ފަށައިގެން ދެ ވަނަ މިނެޓުގައި ހުރާގެ ލީޑު ފުޅާކޮށްދިނީ އަލީ އަލްސަން ސާގިބް ޖެހި ގޯލުންނެވެ.
އީގަލްސްގެ ހަމައެކަނި ގޯލު އެޓީމަށް ޖަހާދިނީ މެޗު ނިމެން ދެމިނެޓަށްވެފައި ވަނިކޮށް އަލްޔާން ބިން މުހައްމަދު އެވެ.
އީގަލްސް އިން ހުރާއާ ދެކޮޅަށް ކުޅުނު މެޗުގެ ތެރެއިން.--- ފޮޓޯ: އިމޭޖަސް،އެމްވީ
އިއްޔެ ހެނދުނު ކުޅުނު ދެ ވަނަ މެޗުގައި 14 އަހަރުން ދަށުގައި ހުރާ އާއި އީގަލްސްގެ ކުރިމަތިލުން ނިމުނީ 1-1 ގެ ނަތީޖާ އަކުން އެއްވަރު ވެގެންނެވެ. މި މެޗުގެ ހަ ވަނަ މިނެޓުގައި ހުރާގެ މުހައްމަދު ޔޫނުސް ގޯލް ޖަހައި ލީޑު ނެގި ނަމަވެސް މެޗުގެ 28 ވަނަ މިނެޓުގައި އީގަލްސްގެ ހުސެއިން އިޒާން ވަނީ ގޯލު ޖަހާ ނަތީޖާ ހަމަހަމަ ކޮށްފަ އެވެ.
ބާރަ އަހަރުން ދަށުގެ ދެ ވަނަ މެޗުގައި އިއްޔެ ހަވީރު މާޒިޔާ އިން ނުކުތީ ސަސްއާ ދެކޮޅަށެވެ. އެ މެޗު ސަސް އިން ކާމިޔާބުކުރީ 2-1 ގެ ނަތީޖާ އަކުންނެވެ. މި މެޗެ 14 ވަނަ މިނެޓުގައި މުހައްމަދު ބިން ފަރްހަތު އަލީ ސަސް އަށް ލީޑު ނަގައިދިން އިރު, ދެ ވަނަ ހާފު ފަށައިގެން ދެ ވަނަ މިނެޓުގައި އިބްރާހީމް ލޫތު ބިން އަބްދުالله ވަނީ ދެ ވަނަ ގޯލު ޖަހައި އެ ޓީމުގެ ލީޑު ފުޅާކޮށްދީފަ އެވެ.
މި މެޗުގައި މާޒިޔާ އިން ޖެހި ހަމައެކަނި ގޯލު އެ ޓީމަށް ޖަހާދިނީ އުސައިމިން އިބްރާހީމް އެވެ.
އިއްޔެ ކުޅުނު ފަހު މެޗުގައި 14 އަހަރުން ދަށުގައި މާޒިޔާގެ މައްޗަށް ސަސް ކުރިހޯދީ ފަސޭހަކަމާ އެކު 4-0 ގެ ނަތީޖާ އަކުންނެވެ. މި މެޗުގައި ސަސްގެ ގޯލުތައް އެ ޓީމަށް ޖަހާދިނީ އިހާން ބިން އިބްރާހީމް, އަބްދުލް ހާލިގް އާނިސް އަދި ޔޫސުފް ރައްޔާން ރިޔާޒް އެވެ. ރައްޔާން ވަނީ ދެ ގޯލު ޖަހައިފަ އެވެ.
