އިންޓަނޭޝަނަލް ރެސިޑެންސް އެންޑް ސިޓިޒެންޝިޕް އެޑްވައިޒަރީ ފާމު ހެންލީ އެންޑް ޕާޓްނާޒް އިން ދޭ ގްލޯބަލް ސިޓިޒަން އެވޯޑު ކުރީގެ ރައީސް މުހައްމަދު ނަޝީދުއަށް ލިބިއްޖެ އެވެ.
މި އަހަރުގެ އެވޯޑު ނަޝީދަށް ދިނީ، މިހާރު ސިންގަޕޫރުގައި ކުރިއަށްދާ ގްލޯބަލް ސިޓިޒެންޝިޕް ކޮންފަރެންސްގަ އެވެ.
ސްވިޒަލޭންޑުގެ އެންޖީއޯއެއް ކަމަށްވާ އަންޑަން ފައުންޑޭޝަނާ ގުޅިގެން ހެންލީ އެންޑް ޕާޓްނާޒް އިން ދޭ މި އެވޯޑަކީ އެކި ދާއިރާތަކުން ދުނިޔޭގެ ފެންވަރުގައި މަސައްކަތްކޮށް ބައިނަލްއަގުވާމީ މުޖުތަމައު ކުރިއެރުވުމަށް މަސައްކަތް ކުރާ ފަރާތްތަކަށް ދޭ އެވޯޑެކެވެ. މިއީ މި އެވޯޑު ދޭ 18 ވަނަ އަހަރެވެ.
މި އެވޯޑާއެކު އެ ފާމުން ވަނީ ބައިނަލްއަގުވާމީ މައިދާނުގައި އިންސާނީ ހައްގުތަކާއި ތިމާވެށީގެ ދާއިރާއިން ނަޝީދު ކުރައްވަމުން ގެންދަވާ މަސައްކަތްތައް ފާހަގަކޮށްފަ އެވެ. އެމަނިކުފާނަށް މި އެވޯޑު ލިބުނީ ހާއްސަކޮށް މޫސުމީ ބަދަލުތަކާ ޗެލެންޖުކޮށް ވިލުންތެރި މުޖުތަމައެއް ބިނާކުރުމަށް އެމަނިކުފާނު ކުރައްވަމުން ގެންދަވާ މަސައްކަތްތަކުގެ ސަބަބުން ކަމަށް ވެސް އެ ފާމުން ބުނެފައިވެ އެވެ.
ރާއްޖޭގައި ގިނަ ސިޔާސީ ޕާޓީތަކަކަށް ވާދަކުރެވޭ ގޮތަށް ބޭއްވި އިންތިހާބު ކާމިޔާބުކުރެއްވި ނަޝީދަކީ، ރައްޔިތުންގެ މަޖިލީހުގެ މެންބަރުކަމާއި މަޖިލީހުގެ ރައީސްކަން ވެސް ކުރެއްވި ބޭފުޅެވެ. ނަމަވެސް، އެމަނިކުފާނު މިހާރު ހުންނެވި ދިވެހި ސިޔާސީ މައިދާނުން ވަގުތީ ގޮތުން ފެޔަށް ޖެހިވަޑައިގަންނަވައިގެންނެވެ.
މިހާރު ގާނާގައި ދިރިއުޅުއްވާ ނަޝީދު އަދާކުރައްވަމުން ދަނީ ކްލައިމަޓް ވަލްނެރެބަލް ފޯރަމް ގެ ސެކެޓްރީ ޖެނެރަލްގެ މަގާމެވެ.
މި އެވޯޑާއެކު ގިނަ ބަޔަކު ނަޝީދަށް މަރުހަބާ ދަންނަވަމުން ދާއިރު، އެމަނިކުފާނުގެ ސިޔާސީ ޕާޓީ ދަ ޑިމޮކްރެޓްސް އިން ވެސް ވަނީ މަރުހަބާގެ ބަޔާނެއް ނެރެފަ އެވެ. އެ ބަޔާނުގައި ނަޝީދު ރާއްޖެއަށް އަދި ބައިނަލްއަގުވާމީ މުޖުތަމަށް ކުރައްވަމުން ގެންދަވާ ހިދުމަތާއި ހޯއްދަވަމުން ގެންދަވާ ގިނަގުނަ ކާމީޔާބީތަކަށް ވަނީ މަރުހަބާއާއި ޝުކުރު އަދާކޮށްފަ އެވެ.
