އެންޓި ކޮރަޕްޝަން ކޮމިޝަން އާއި އިލެކްޝަންސް ކޮމިޝަނަށް ރައީސުލްޖުމްހޫރިއްޔާއަށް ނުފޫޒު ފޯރުވޭ ގޮތަށް އެ ދެ ކޮމިޝަނުގެ ވެރިން އައްޔަނު ކުރުމުގެ ބާރު ދިނުމަށް ގާނޫނު ބަދަލުކުރަން ހުށަހަޅާފައިވަނިކޮށް އެ ދެ ކޮމިޝަނުގެ ނައިބު ރައީސުންނާއި މެންބަރުންތަކެއް ވަކިކުރަން ރައްޔިތުންގެ މަޖިލީހުގެ ކޮމިޓީއިން މިއަދު ފާސްކޮށްފި އެވެ.
ސިއްރުކޮށްގެން ކުރިއަށްގެންދިޔަ މަޖިލީހުގެ މިނިވަން މުއައްސަސާތަކުގެ ކޮމިޓީގެ ބައްދަލުވުމުގައި މަގާމުން ވަކިކުރަން ފާސްކުރީ އޭސީސީގެ ނައިބު ރައީސް އަބްދުއްސަލާމް އާއި މެންބަރު ތޯހާ މުހައްމަދު އަދި އިލެކްޝަންސްގެ ނައިބު ރައީސް އަލީ ނަޝާތާއި އެ ކޮމިޝަނުގެ މެންބަރުން ޑރ. މުހައްމަދު ޒާހިރު އަދި މުހައްމަދު އާސިފް އެވެ.
މީގެއިތުރުން، ސިވިލް ސާވިސް ކޮމިޝަން (ސީއެސްސީ) ގެ ރައީސް މުހައްމަދު ނާސިހު ވަކިކުރުމުގެ މައްސަލަ ވެސް މިއަދު ބެލި އެވެ. ކޮމިޓީން ނިންމީ ނާސިހު ވަކިނުކުރުމަށެވެ.
އީސީގެ ނައިބު ރައީސާއި މެންބަރުންތަކެއް ސުލޫކީ މިންގަނޑާ ހިލާފަށް އަމަލުކޮށްފައިވާ ކަމަށް ތުހުމަތުކޮށް މިނިވަން މުއައްސަސާތަކުގެ ކޮމިޓީއަށް ވަނީ އޮކްޓޯބަރު 22, ގައި މައްސަލައެއް ހުށަހަޅާފަ އެވެ. އެކަމަކު ކުރަނީ ކޮން ތުހުމަތުތަކެއް ކަމެއް ނޭނގެ އެވެ.
އޭސީސީގެ ނައިބު ރައީސް އަބްދުއްސަލާމް އާއި މެންބަރު ތޯހާ ވަކިކުރަން ހުށަހެޅީ އެންޓި ކޮރަޕްޝަން ކޮމިޝަނުގެ ގާނޫނުގެ 17 ވަނަ މާއްދާގެ ހ. އަދި ށ. އާ ހިލާފަށް އަމަލުކޮށްފައިވާ ކަމަށް ތުހުމަތުކޮށް މިނިވަން މުއައްސަސާތަކުގެ ކޮމިޓީއަށް ލިބިފައިވާ ދެ މައްސަލައަކާ ގުޅިގެންނެވެ.
މި ތިން މައްސަލަ ވެސް ދިރާސާކުރާނީ މިނިވަން މުއައްސަސާތަކުގެ ކޮމިޓީންނެވެ. މިނިވަން މުއައްސަސާތަކުގެ މެންބަރުންނަށް ތުހުމަތުކޮށް މަޖިލީހަށް ލާފައިވާ ހުރިހާ މައްސަލައެއްގެ ތަފްސީލު ވަނީ ސިއްރުކޮށްފަ އެވެ.
އިތުބާރު ނެތް ކަމުގެ މައްސަލަ ހުށަހަޅާފައި އެންމެންނަކީ ވެސް ކުރީ ސަރުކާރުގެ ދުވަސްވަރު އަދި ރައްޔިތުންގެ މަޖިލީހުގައި އިދިކޮޅު މައި ޕާޓީ، އެމްޑީޕީގެ ސުޕަ މެޖޯރިޓީ އޮތް ދުވަސްވަރު އެ މުއައްސަސާތަކަށް އައްޔަންކޮށްފައިވާ މެންބަރުންނެވެ.
އީސީއަށް ނަޝާތު ދެ ވަނަ ދައުރަކަށް އައްޔަނުކުރީ މިދިޔަ އަހަރުގެ ނޮވެމްބަރު 16، ގަ އެވެ. ޑރ. ޒާހިރު ފެބްރުއަރީ 21, 2021، ގައި އަދި އާސިފް އައްޔަނުކުރީ ސެޕްޓެމްބަރު 6، 2021، ގަ އެވެ. އޭސީސީއަށް ތޯހާ އަދި އަބްދުއްސަލާމް އައްޔަނުކުރީ މާޗު 17، 2022، ގަ އެވެ.
މިއީ ރައީސް ޑރ. މުހައްމަދު މުއިއްޒު ވެރިކަމާ ހަވާލުވެވަޑައިގަތުމަށް ފަހު މިނިވަން މުއައްސަސާއެއްގެ މެންބަރުންތަކެއް ވަކިކުރަން މަޖިލީހުން މަސައްކަތް ކުރާ ފުރަތަމަ ފަހަރެވެ. ބެލެވޭ ގޮތުގައި މާދަމާގެ ޖަލްސާގައި މިކަމަށް ވޯޓު ލާނެ އެވެ.
