މީގެ ހަތަރު އަހަރު ފަހުން ބާއްވާ ރިޔާސީ އިންތިހާބުގައި ވާދަކުރާނެ ކެންޑިޑޭޓަކު ކަނޑައެޅުމަށް ވެރިކަން ކުރާ ޕީއެންސީ އިން ޕްރައިމަރީއެއް ނުބާއްވާނެ ކަމަށާއި އެ އަހަރު ވެސް ޕީއެންސީގެ ރިޔާސީ ކެންޑިޑޭޓަކަށް ވެގެންދާނީ ރައީސް ޑރ. މުހައްމަދު މުއިއްޒު ކަމަށް އެ ޕާޓީގެ ޗެއާޕާސަން އަބްދުއްރަހީމް އަބްދުﷲ ވިދާޅުވެއްޖެ އެވެ.
މިއަދު ބޭއްވި އެ ޕާޓީގެ އެތެރޭގެ އިންތިހާބުތަކާ ގުޅިގެން ބޭއްވި ނޫސްވެރިންގެ ބައްދަލުވުމެއްގައި ވާހަކަދައްކަވަމުން، އެމަނިކުފާނު ވިދާޅުވީ ޕީއެންސީގެ އަސާސީ ގަވާއިދާ އެއްގޮތަށް 2028 ގެ ރިޔާސީ ޓިކެޓު ލިބިވަޑައިގަންނަވާނީ ރައީސް މުއިއްޒުއަށް ކަމަށެވެ.
"އަޅުގަނޑުމެންގެ އަސާސީ ގަވާއިދު ބުނަނީ ޕީއެންސީގެ ޓިކެޓުގައި ނިކުމެވަޑައިގެން ރާއްޖޭގެ ވެރިކަމަށް އަންނަވާ ބޭފުޅަކު އެ މަގާމުގަ ހުންނަވާ ދެވަނަ ދައުރަކަށް ކުރިމަތިލައްވަން ބޭނުންފުޅު ވަންޏާ ރިޔާސީ ޕްރައިމަރީ އަކާ ނުލާ އެ ޓިކެޓު އެ ބޭފުޅަކަށް ލިބިވަޑައިގަންނަވާނެ ކަމަށް،" ރައްޔިތުންގެ މަޖިލީހުގެ ރައީސްގެ މަގާމުގައިވެސް ހުންނެވި އަބްދުއްރަހީމް ވިދާޅުވި އެވެ.
އޭގެއިތުރުން، ރިޔާސީ އިންތިހާބެއްގައި ވާދަކުރުމުގެ އަދި ރާއްޖޭގެ ވެރިކަން ކުރުމުގެ ނުވަތަ ވެރިކަމަށް އަންނަން އުޅުމުގެ އެއްވެސް ނިޔަތެއް ނެތް ކަމަށް ވެސް އެމަނިކުފާނު މިރޭ ވިދާޅުވި އެވެ.
"ދިވެހިރާއްޖޭގެ ވެރިކަމަށް ކުރިމަތިލުމުގެ ވިސްނުމެއް ދުވަހަކުވެސް ނުގެންގުޅެން. އަދި ކުރިއަށް އޮތްތާކުވެސް ނުގެންގުޅޭނަން. ވާދައެއް ނުވެސް ކުރާނަން. އެފަދަ ފުރުސަތެއް ލިބުނަސް އެކަމުން ސަލާމަތް ވާނަން،" އެމަނިކުފާނު ވިދާޅުވި އެވެ.
ރައީސް މުއިއްޒުއާ އެމަނިކުފާނާ ދެމެދު ސިޔާސީ ނުތަނަވަސްކަމެއް އޮތް ކަމަށް ބުނެ ފެތުރޭ އަޑުތައް އަބްދުއްރަހީމް މިރޭ ވަނީ ދޮގުކުރައްވާފަ އެވެ. މި ވެރިކަމުގެ ކުރިން އެންމެ ގާތް ގުޅުމެއް ނެތް ކަމަށް އެއްބަސްވެވަޑައިގެން، އެމަނިކުފާނު ވިދާޅުވީ ރައީސާއެކު އޮތް ގުޅުން ދުވަހަކަށްވުރެ ދުވަހެއް ދަނީ ވަރުގަދަ ވަމުން ކަމަށެވެ.
އެކަމުގެ ހެއްކެއްގެ ގޮތުގައި ދެއްކެވީ މީގެ ހަ މަސް ކުރިން މަޖިލީހުގެ ރައީސްގެ މަގާމަށް އަބްދުއްރަހީމުގެ ނަން، ރައީސް މުއިއްޒު ހުށަހެޅުއްވުމެވެ. ނަމަވެސް ދެ ރައީސުންގެ ނުތަނަވަސްކަމުގެ އަޑުތައް ފެތުރެން ފެށީ އޭގެ ފަހުންނެވެ.
ރައީސް މުއިއްޒު މިދިޔަ ރިޔާސީ އިންތިހާބުގައި ވާދަކުރެއްވީ ޕީއެންސީ ކޯލިޝަނުގެ ފަހު އޮޕްޝަނުގެ ގޮތުގަ އެވެ. އެގޮތުން އޭރު އެ ކޯލިޝަނުގެ ލީޑަރު، ކުރީގެ ރައީސް އަބްދުﷲ ޔާމީނަށް ރިޔާސީ އިންތިހާބުގައި ވާދަނުކުރެއްވުމުން ޕީއެންސީގެ ޓިކެޓު އެމަނިކުފާނު ހޯއްދެވީ އެ ޕާޓީގެ ސެނެޓުގައި ނެގި ވޯޓަކުންނެވެ.
އެމަނިކުފާނުގެ ކެބިނެޓުގައި ހިމެނިވަޑައިގަންނަވާ ލޯކަލް ގަވަމަންޓު މިނިސްޓަރު އާދަމް ޝަރީފާ ވާދަކުރައްވާ ރައީސް މުއިއްޒު ޓިކެޓު ކާމިޔާބު ކުރެއްވީ އެންމެ ދެ ވޯޓުގެ ތަފާތަކުންނެވެ. ޕީއެންސީގެ ސެނެޓުގެ 48 މެމްބަރުން ތެރެއިން 25 ވޯޓު ރައީސް މުއިއްޒުއަށް ލިބިވަޑައިގެންނެވިއިރު އާދަމް ޝަރީފަށް ލިބިވަޑައިގަތީ 23 ވޯޓެވެ.
