މާލެ ސިޓީގެ އަންހެނުން ތަރައްގީއަށް މަސައްކަތް ކުރާ ކޮމެޓީ (ޑަބްލިއުޑީސީ) އާއި ޕޮލިޓެކްނިކް ގުޅިގެން ކުރިއަށްދާ ޒުވާނުންނާއި އަންހެނުންނަށް އަމާޒުކޮށްގެން ކުރިއަށްގެންދާ "100 ހުނަރުވެރިން ޕްރޮގްރާމު" ގެ އަމަލީ ތަމްރީނުތައް ފަށައިފި އެވެ.
އެ ޕްރޮގްރާމުގެ މަގްސަދަކީ އިލެކްޓްރިކް، ގޭގެ ސާމާނު މަރާމާތުކުރުން، އަތްތެރި މަސައްކަތް، ހިރި ގެތުން، ދިގުހެދުން ފެހުން އަދި ބޯވަޅަށް ލިބާސް ފެހުމުގެ ކޯސްތަކެއް ހިންގުމެވެ.
އެ ކޯސްތަކުގެ ސަބަބުން މާލޭގެ ޒުވާނުންނާއި އަންހެނުންނަށް ފަންނީ އަދި ސަގާފީ ހުނަރުތައް ދަސްކުރުމުގެ ފުރުސަތު ލިބިގެންދާނެ ކަމަށް ސިޓީ ކައުންސިލުން ބުންޏެވެ.
ޑަބްލިއުޑީސީން އެ ކޯސްތަކާ ގުޅޭ އެންމެހައި ހަރަދުތައް ބެލެހެއްޓުމަށް ވަނީ ހަމަޖެހިފަ އެވެ. އަދި ހިރި ގެތުން، ދިގުހެދުން ފެހުން އަދި ބޯވަޅަށް ލިބާސް ފެހުމުގެ ކޯސްތަކަށް މުދައްރިސުން ވެސް ޑަބްލިއުޑީސީން ހަމަޖައްސާނެ އެވެ.
މޯލްޑިވްސް ޕޮލިޓެކްނިކުން އިލެކްޓްރިކް، ގޭގެ ސާމާނު މަރާމާތުކުރުން އަދި އަތްތެރި މަސައްކަތުގެ ކޯސްތައް ކުރިޔަށް ގެންދިޔުމަށް މުދައްރިސުން ފޯރުކޮށްދިނުމަށް ވަނީ ހަމަޖެހިފަ އެވެ.
މާލެ ސިޓީ ކައުންސިލާއި ޕޮލިޓެކްނިކާ ދެމެދު ހެދި އެއްބަސްވުމުގެ ދަށުން އެ ޕްރޮގްރާމަކީ ދެ ހަފްތާގެ ޕްރޮގްރާމެއް ނަމަވެސް، ކުރިޔަށް އޮތް ތަނުގައި ވެސް އެފަދަ ޕްރޮގްރާމްތައް ގަވާއިދުން ކުރިޔަށް ގެންދިޔުމަށް ވަނީ ރޭވިފަ އެވެ.
މިއީ މާލޭގެ ޒުވާނުންނާއި އަންހެނުންގެ ހުނަރު އިތުރުކޮށް، ދެމެހެއްޓެނިވި ވަޒީފާގެ ފުރުސަތުތައް އިތުރުކުރުމަށް އެޅޭ މުހިންމު ފިޔަވަޅަކަށް ވެގެންދާނެ ކަމަށް މާލެ ސިޓީ ކައުންސިލުން ބުންޏެވެ.
