މިހާރު ކުރިއަށްދާ ޒެމްބިއާ އިންޓަނޭޝަނަލް 2024، ބެޑްމިންޓަން މުބާރާތުގެ ފިރިހެން ޑަބަލްސް ބައިން، ޒަޔާން ޒަކީ އާއި ނިބާލް އަހުމަދުގެ ޕެއާ ވެސް ކުއާޓާ ފައިނަލަށް ދަތުރުކޮށްފި އެވެ.
ޒަޔާން އާއި ނިބާލްގެ ޕެއާ އިން އިއްޔެ ކުޅުނު މެޗުގައި ވަނީ ޒެމްބިއާގެ ޕެއާ އެއް ކަމަށްވާ މަބޯ ޑޮނާލްޑް އާއި ވީރަޕަންޑީ ޖޭރަމަންގެ ޕެއާ އަތުން މޮޅުވެފަ އެވެ. ނިބާލް އާއި ޒަޔާންގެ ޕެއާ މި މެޗުގެ ސެޓުތައް ގެންގޮސްފައިވަނީ، 21-07، 21-13 އިންނެވެ.
ފިރިހެން ޑަބަލްސްގެ ކުއާޓާ ފައިނަލުގައި ނިބާލް އާއި ޒަޔާންގެ ޕެއާ ކުޅޭނީ އަޒަރުބައިޖާންގެ ގަބީލޯވް އާއި ޕެންގެސްޓޫގެ ޕެއާއާ ދެކޮޅަށެވެ.
މީގެ އިތުރުން، އަންހެން ސިންގަލްސް އާއި އަންހެން ޑަބަލްސް އަދި މިކްސް ޑަބަލްސްގައި ރާއްޖޭގެ ދެ ޕެއާއެއް ކުއާޓާ ފައިނަލުގައި ކުޅޭނެ އެވެ. އެއީ، ޒަޔާން އާއި ނަބާގެ ޕެއާ އާއި ނިބާލް އާއި ނަބީގެ ޕެއާ އެވެ.
ފިރިހެން ސިންގަލްސް ބައިން ވާދަކުރި ރާއްޖޭގެ ނިބާލް އަހުމަދު އާއި ޒަޔާން ޒަކީ ވަނީ ފުރަތަމަ ބުރުން ބަލިވެފަ އެވެ. އެ ގޮތުން، ނިބާލް ބަލިވީ ޔޫއޭއީގެ ބާރަތު ލަތީޝް އަތުންނެވެ. އަދި ޒަޔާން ބަލިވީ ލަގްޒެމްބޯގެ ޖެރޯމް ޕަކޭ އަތުންނެވެ.
ކުއާޓާ ފައިނަލުގައި، ޒަޔާން އާއި ނަބާގެ ޕެއާ ކުޅޭނީ ޒެމްބިއާގެ އަލިންޓޫލާ ހަބޯވާ އާއި އަންޖުމަން ބަރްދްވާޖުގެ ޕެއާއާ އެވެ. އަދި ނިބާލް އާއި ނަބީގެ ޕެއާ ކުއާޓާގައި ނުކުންނާނީ، އަޒަރުބައިޖާންގެ ޖާހިދު އަލްހަސަނޯފް އާއި ހާޖަރު ނުރިޔޭވާގެ ޕެއާއާ ދެކޮޅަށެވެ. އަންހެން ސިންގަލްސް ކުއާޓާ ފައިނަލުގައި ނަބީ ކުޅޭނީ އަޒަރުބައިޖާންގެ ހާޖަރު ނުރިޔޭވާއާ ދެކޮޅަށެވެ. އަދި ނަބާ ބައްދަލުކުރާނީ، ޒެމްބިއާގެ ސަލިފްޔަންޖީ ސިމްވަކާއާ އެވެ. އަންހެން ޑަބަލަސް ކުއާޓާގައި ނަބީ އާއި ނަބާގެ ޕެއާ ކުއާޓާގައި ކުޅޭނީ ބޫޕޭ މާބޯ އާއި ޓުކޫޒާ އެމްބޭވޭގެ ޕެއާއާ އެވެ.
