ސަރުކާރުން ބޭނުންވާ ގޮތަށް އަންނަ ކޮންމެ ޓޫރިސްޓެއްގެ ބޮލަކަށް ޑޮލަރު މާރުކުރަން މަޖުބޫރު ކުރާ މައްސަލައިގައި ނުރުހުންވެވަޑައިގެން، ވިޔަފާރިކުރަނީ ސަރުކާރުގެ ސިޔާސީ ލޯނުތައް ދައްކަން ނޫން ކަމަށް މަޝްހޫރު ވިޔަފާރިވެރިޔާ އަދި އެސްޓީއޯގެ ޗެއާމަން އާމިރު މަންސޫރު ވިދާޅުވެއްޖެ އެވެ.
ރިސޯޓުތަކާއި ސަފާރި ވިޔަފާރީގައި ވެސް ހަރަކާތްތެރިވާ އާމިރުގެ މި އުދާސްތައް ބަންޑުންކޮށްލެއްވީ ޓޫރިޒަމް ވިޔަފާރިވެރިން ތިބޭ ގްރޫޕެއްގަ އެވެ. އެ ގްރޫޕުގައި އޭނާ ދެއްކި ވާހަކަތަކުގެ ސްކްރީންޝޮޓުތައް އާންމުވެފައިވާއިރު، "އަދަދު" އަށް ވެސް ވަނީ އެ ސްކްރީންޝޮޓުތައް ލިބިފަ އެވެ.
ރިސޯޓު ހިންގާ ފަރާތްތަކުން އެކުއިޒިޝަން ކޮސްޓާއި ޓީޖީއެސްޓީ އާއި އާމްދަނީގެ ޓެކްސްގެ އިތުރުން ބިމު ކުލި ވެސް ވިޔަފާރިވެރިން ދައްކާ ކަމަށާއި، އޭގެ ބަދަލުގައި ސަރުކާރުން ދެނީ "ސުމެއް" ކަމަށް އާމިރު ފާހަގަކުރައްވަމުންނެވެ. އަދި ވިޔަފާރިކުރަނީ ސިޔާސީ ލޯނު ދައްކަން ނޫން ކަމަށް ވެސް އޭނާ ވިދާޅުވި އެވެ.
ޑޮލަރު މާރުކުރަން މަޖުބޫރުކުރާ މައްސަލައިގައި ޓޫރިޒަމްގައި ހަރަކާތްތެރިވާ ދިވެހި ވިޔަފާރިވެރިން ނުރުހުން ފާޅުކުރަމުން އަންނައިރު، ގިނަ ވިޔަފާރިތަކުން ވަނީ އެމްއެމްއޭއިން އެކުލަވާލާފައިވާ ގަވާއިދުގައިވާ ގޮތަށް ޑޮލަރު މާރުނުކުރެވޭނެ ކަމަށް ބުނެ، އެ ގަވާއިދަށް އަމަލުކުރުން މަޑުޖައްސާލަން އެދީ މަރުކަޒީ ބޭންކަށް ސިޓީ ފޮނުވާފަ އެވެ.
އެ ވިޔަފާރިތަކުން މައިގަނޑު ކަންބޮޑުވުމަކީ، މަސްލަހަތުވެރިންނާ މަޝްވަރާކުރުމެއް ނެތި މިގޮތަށް ގަވާއިދު އެކުލަވާލުމުން ވިޔަފާރިއަށް އަސަރުކުރާނެތީ އެވެ. އަދި މިއާ ގުޅިގެން މުވައްޒަފުންނަށް ދެމުންދާ މުސާރަތައް ކުޑަކުރަން ޖެހި ހިންގުމަށް ބުރޫއަރާނެ ކަމަށް އެ ވިޔާރިތަކުން އަންނަނީ ބުނަމުންނެވެ.
އާ ގަވާއިދަށް އަމަލުނުކުރެވޭނެ ކަމަށް 50 ރިސޯޓަކުން އެމްއެމްއޭއަށް ސިޓީ ފޮނުވާފައިވާއިރު، އޭގެ ތެރޭގައި ޓޫރިޒަމް ސިނާއަތުގެ މޭސްތިރިންގެ ތެރޭގައި ހިމެނޭ ޔުނިވާސަލް ރިސޯޓްސް އާއި ކްރައުން އެންޑް ޗަމްޕާ ރިސޯޓްސް ހިމެނެ އެވެ. އެމްއެމްއޭއަށް ސިޓީ ފޮނުވި ގިނަ ރިސޯޓުތަކަކީ ދިވެހި ވިޔަފާރިވެރިން ހިންގާ ރިސޯޓުތައް ކަމަށް ވެސް މައުލޫމާތު ލިބެ އެވެ.
އެމްއެމްއޭގެ އާ ގަވާއިދުގެ ދަށުން ރިސޯޓުތަކަށާއި ސަފާރީތަކަށް ވަންނަ ހުރިހާ އާމްދަނީއެއް ރާއްޖޭގެ ބޭންކުތަކަށް ޖަމާކުރަން ޖެހެ އެވެ. އަދި މިގޮތަށް ޖަމާކުރާ ފައިސާގެ ތެރެއިން ރިސޯޓު ނޫނީ ސަފާރީއަށް އަންނަ ކޮންމެ ޓޫރިސްޓަކަށް 500 ޑޮލަރު ބޭންކުން މާރުކުރަން ޖެހެ އެވެ. މާރުކުރާ ޑޮލަރުގެ ބޭންކުތަކުގައި ބެހެއްޓެނީ 40 ޕަސެންޓެވެ. ބާކީ 60 ޕަސެންޓު ބޭންކުތަކުން މާރުކުރަން ޖެހެނީ އެމްއެމްއޭއަށެވެ.
