ސަރުކާރުގެ އިކޮނޮމިކް ރިފޯމް އެޖެންޑާގައި ހަރަދު ކުޑަކުރުމަށް އެޅުމަށް ރާވާފައިވާ ފިޔަވަޅުތައް ތަންފީޒުކުރުން ލަސްވާ ކޮންމެ މަހެއްގައި ހަރަދުތައް އިތުރުވެ، ބަޖެޓު ޑެފިސިޓަށް އަސަރު ކުރާނެ ކަމަށް ފިނޭންސް މިނިސްޓްރީން އިލްތިމާސްކޮށްފި އެވެ.
އަންނަ އަހަރަށް ލަފާކޮށް ހުށަހަޅާފައިވާ ބަޖެޓުގައި ހަރަދުތައް ކުޑަކުރުމުގެ ގޮތުން ގިނަ ކަންތައްތަކެއް ކުރަން ރާވާފައިވެ އެވެ. އޭގެ ތެރޭގައި ހިމެނެނީ އިންޑައިރެކްޓް ސަބްސިޑީތައް އުވާލުމާއި އާސަންދަ އާއި ވެލްފެއާ ނިޒާމު ރިފޯމުކުރުމާއި ސަރުކާރު ކުންފުނިތައް ރިފޯމްކުރުމެވެ.
މިއީ މި އަހަރަށް ފާސްކުރި ބަޖެޓުގައި ވެސް ހަރަދު ކުޑަކުރަން ހިމެނި ކަންކަމެކެވެ. އެހެން ނަމަވެސް އެކި ސަބަބުތަކާ ހުރެ މި އަހަރުގެ ތެރޭގައި މިއިން އެއްވެސް ސިޔާސަތެއް ތަންފީޒު ނުވެ، ދައުލަތުގެ ބަޖެޓުން އެކަންކަމަށް ބޮޑު ހަރަދެއް ކުރަން ޖެހުނެ އެވެ.
މި އަހަރެކޭ އެއް ފަދައިން އަންނަ އަހަރުގެ ތެރޭގައި ވެސް ހަރަދު ކުޑަކުރުމުގެ ސިޔާސަތުތައް ތަންފީޒުކުރުން ލަސްވެއްޖެ ނަމަ، ސަބްސިޑީ އާއި އާސަންދަ އާއި ވެލްފެއާ ހަަރަދުތަކަށް ކޮންމެ މަހެއްގައި 254 މިލިއަން ރުފިޔާ އިތުރަށް ހަރަދު ކުރަން ޖެހޭނެ ކަމަށް ފިނޭންސުން އަންދާޒާކުރެ އެވެ.
ލަސްވާ ކޮންމެ މަހަކަށް ހަރަދަށް އިތުރުވާ އަދަދު
- ސަބްސިޑީ - 176.1 މިލިއަން ރުފިޔާ
- އާސަންދަ - 58.3 މިލިއަން ރުފިޔާ
- ވެލްފެއާ - 19.8 މިލިއަން ރުފިޔާ
މިއާ އެކީ، ޖުމްލަ ހަރަދު 51.4 ބިލިއަން ރުފިޔާއަށް އިތުރުވެ، 2.3 ބިލިއަން ރުފިޔާ އިތުރަށް ހޯދަން ޖެހޭނެ ކަމަށް ވެސް ފިނޭންސުގެ ލަފާކުރުންތަކުން ދައްކަ އެވެ. މިއާ އެކީގައި މިހާރު 9.3 ބިލިއަން ރުފިޔާގައި ހުރި ބަޖެޓު ޑެފިސިޓު 11.7 ބިލިއަން ރުފިޔާއަށް އަރާނެ އެވެ.
ސަރުކާރުން ރާވާފައި ވަނީ އަންނަ އަހަރުގެ އޭޕްރީލް މަހުން ފެށިގެން ހަރަދު ކުޑަކުރުމުގެ ފިޔަވަޅުތައް ތަންފީޒުކުރާށެވެ.
