ރާއްޖޭގައި ގަވާއިދާ ހިލާފަށް ހިންގާ މަސާޖު ޕާލާތަކާއި ބިއުޓީ ސެލޫންތައް ބަލައި ފާސްކުރުމަށް ފުލުހުން ހިންގަމުން ދިޔަ އޮޕަރޭޝަންތަކާ ގުޅޭ ގޮތުން ރައީސް މުހައްމަދު މުއިއްޒު ހާމަކުރެއްވި ތަފާސްހިސާބުތަކާއި، ފުލުހުން ދިން މައުލޫމާތުގައި ބޮޑު ފަރަގެއް ހުރިކަން ހާމަ ވެއްޖެ އެވެ.
މިކަން ހާމަވެފައިވަނީ "އަދަދު" ނޫހުން މައުލޫމާތު ހޯދައި ލިބިގަތުމުގެ ހައްގުގެ ގާނޫނުގެ ދަށުން ފުލުހުންގެ އިދާރާއަށް ހުށަހެޅި ފޯމަށް އެ އިދާރާއިން ދިން ޖަވާބުންނެވެ.
މޯލްޑިވްސް ޕޮލިސް ސާވިސް އިން ބުނެފައި ވަނީ ޑިސެންބަރު 9، 2025 އިން ފެށިގެން ޖެނުއަރީ 18، 2026 ގެ ނިޔަލަށް ފުލުހުން ބަލައި ފާސްކޮށްފައިވާ ބިއުޓީ ސެލޫން އަދި ސްޕާގެ އަދަދަކީ 71 ކަމަށެވެ. މިއީ ގާތްގަނޑަކަށް 40 ދުވަހުގެ މުއްދަތެއްގެ ތެރޭގައި ކުރިއަށްދިޔަ މަސައްކަތްތަކުގެ ޖުމްލަ އަދަދެވެ.
ނަމަވެސް ޖެނުއަރީ 8 ގައި މުއިއްޒު ވިދާޅުވީ ޑިސެންބަރު 9 އިން ފެށިގެން ޖެނުއަރީ 8 ވަނަ ދުވަހުގެ ނިޔަލަށް 104 މަސާޖު ޕާލާއެއް ބަންދުކޮށްފައިވާ ކަމަށެވެ.
"ޑިސެމްބަރު މަހުގެ 9 ވަނަ ދުވަހު އެކަން ރަނގަޅު ކުރުމަށް މަސައްކަތްތަކެއް ފެށި، އެތައް ގުނައަކަށް މައްޗަށް ޖެއްސި. ޑިސެމްބަރު 9 އިން މިއަދަށް، އެއް މަސް ދުވަސް މިވީ، މި މަސްދުވަސް ތެރޭ މާލެ ސިޓީން 104 މަސާޖު ޕާލާ ވަނީ ބަންދު ކޮށްފައި،" މުއިއްޒު ވިދާޅުވެފައިވެ އެވެ.
ފުލުހުން ބަލައި ފާސްކުރި ތަންތަނުގެ އަދަދާއި، ބަންދުކުރި ކަމަށް މުއިއްޒު ވިދާޅުވި މަސާޖުކުރާ ތަންތަނުގެ އަދަދުގައި 33 ގެ ފަރަގެއް އެބަ އުޅެ އެވެ.
ދައުލަތުގެ އެންމެ މަތީ ވެރިޔާ ހާމަކުރައްވާ މައުލޫމާތާއި، ތަންފީޒީ އިދާރާތަކުން ލިޔުމުން ދޭ މައުލޫމާތު ދިމާނުވުމަކީ ބޮޑު މައްސަލަ އެކެވެ. އަދި އެކަމުން، ސަރުކާރުން މައުލޫމާތު ބެލެހެއްޓުމުގައި ހުރި ދޯދިޔާކަން ހާމަވެ އެވެ. އަދި ސަރުކާރުގެ ހާމަކަން ބޮޑު މިންވަރާ މެދު ކަންބޮޑުވުން އުފެދެ އެވެ.
މައުލޫމާތު ހޯދައި ލިބިގަތުމުގެ ހައްގުގެ ގާނޫނުގެ ދަށުން އަދަދު ނޫހަށް ފުލުހުން ދިން ޖަވާބުގައި ބުނެފައި ވަނީ 71 ތަނެއް ބަލައި ފާސްކުރި ނަމަވެސް، ބަންދުކުރި ތަންތަނުގެ ތަފްސީލާއި އަލުން ހުއްދަ ދިން ތަންތަނުގެ ތަފްސީލާއި އަދަދުގެ މައުލޫމާތަކީ ފުލުހުން ރިކޯޑުކޮށް ބަލަހައްޓާ މައުލޫމެއް ނޫން ކަމަށެވެ. އެ މައުލޫމާތު ބަލަހައްޓަނީ އިކޮނޮމިކް މިނިސްޓްރީން ކަމަށް ފުލުހުން ބުނެ އެވެ.
މަސާޖު ޕާލާގެ ނަމުގައި މާލޭގައި ހަށިވިއްކުމުގެ ވިޔަފާރިކުރާ ތަންތަން ހުއްޓުވުމަށް ސަރުކާރުން އަމާޒު ހިފައި، ހަފުތާއެއްހާ ދުވަހުގެ ތެރޭގައި 52 ތަނެއް ބަންދު ކޮށްފައިވާ ކަމަށް މިދިޔަ އަހަރުގެ ޑިސެންބަރު މަހު މުއިއްޒު ވިދާޅުވެފައިވެ އެވެ.
އެއަށް ފަހު ޖެނުއަރީ 8 ގައި އެ މަނިކުފާނު ވިދާޅުވީ ފާހިޝް އަމަލުތައް ހިންގާތީ ބަންދުކުރަންޖެހޭ 200 އަށް ވުރެ ގިނަ މަސާޖު ޕާލާ މާލޭގައި އެބަހުރި ކަމަށެވެ. ނަމަވެސް އެ އޮޕަރޭޝަންގެ އަޑެއް މިހާރު ނީވެ އެވެ.
ޑިސެންބަރު މަހު ހިފި އަމާޒާ އެކު، މަސާޖުކުރާ ހުރިހާ ތަނެއް ބަލައި ފާސްކޮށް ނިންމި ކަމެއް، އަދި އެޅި ފިޔަވަޅެއް ވެސް ހާމައެއް ނުކުރެ އެވެ.
