އިޒްރޭލްގެ ޕާސްޕޯޓުގައި ރާއްޖެއަށް އެތެރެވުން މަނާކުރަން އިދިކޮޅު އެމްޑީޕީން ރައްޔިތުންގެ މަޖިލީހަށް ބިލެއް ހުށަހެޅީ ރައްޔިތުން ކުރިމަތީ ސަރުކާރުގެ އަގު ވައްޓާލަން ކަމަށް ސަރުކާރާ އެކު މަސައްކަތްކުރާ އެމްއެންޕީގެ ރައީސް އަދި މާފަންނު އުތުރު ދާއިރާގެ މެންބަރު މުހައްމަދު ނާޒިމް މިއަދު ވިދާޅުވެއްޖެ އެވެ.
އެ ބިލުގެ މަސައްކަތް އަންނަ ފެބްރުއަރީގެ ނިޔަލަށް ދިގުދަންމާލަން ފާސްކުރި 241 ކޮމިޓީގެ ބައްދަލުވުމުގައި ވާހަކަ ދައްކަވަމުން، ނާޒިމް ވިދާޅުވީ، މިދިޔަ ސަރުކާރުގައި ވެސް މި މައްސަލަ އޮތް ކަމަށާއި އެކަމަށް ގޮތެއް ނުނިންމައި، މިހާރު އެ ވާހަކަ ދައްކަނީ ރައްޔިތުންގެ ކުރިމަތީ މި ސަރުކާރުގެ އަގު ވައްޓާލަން ކަމަށެވެ.
"ސަރުކާރަށް ނުފޫޒު ހިންގުމަށްޓަކައި އަދި ސަރުކާރު ރައްޔިތުންގެ ކުރިމަތީގަ ނިކަމެތިކުރުމަށްޓަކައި ހުށަހެޅިފަ އޮތް އެއްޗެއް ކަމަށް އަޅުގަނޑު ގަބޫލުކުރަން،" ނާޒިމް ވިދާޅުވި އެވެ.
އަދި މި ބިލުގެ ނިޔަތް ސާފު ނޫން ކަމަށް ވެސް ނާޒިމް ވިދާޅުވި އެވެ. ނަމަވެސް މި ބިލުގައިވާ ގޮތަށް އިޒްރޭލު ޕާސްޕޯޓު މަނާކުރަން ވަޒީރުންގެ މަޖިލީހުން ވެސް ވަނީ ނިންމާފަ އެވެ. އެކަން އިއުލާނުކުރީ ބިލު ބަލައިގަތުމުގެ ހަފުތާއެއް ކުރިން ޖޫން 2، ގަ އެވެ. އެމްޑީޕީން ހުށަހެޅި ބިލު ބަލައިގަނެ ކޮމިޓީއަށް ފޮނުވީ އެ މަހު 10 ގަ އެވެ.
މިއަދުގެ ބައްދަލުވުމުގައި އިތުރަށް ވާހަކަ ދައްކަވަމުން ނާޒިމް ވަނީ މި ބިލާއެކު ރާއްޖެއަށް ކުރާނެ އަސަރުތައް ދެނެގަންނަން ޖެހޭ ކަމަށް ވިދާޅުވެފަ އެވެ. އަދި މާލީ ގޮތުން ދަތި ހާލަތެއްގައި މިފަދަ ފިޔަވަޅެއް އެޅުމާމެދު ވިސްނަން ޖެހޭނެ ކަމަށް ވެސް ނާޒިމް ވިދާޅުވި އެވެ. ކުއްލިއަކަށް މި ބިލަށް ގޮތެއް ނިންމުމާ ދެކޮޅުކަން ވެސް އޭނާ ފާހަގަކުރެއްވި އެވެ.
އެ ބިލުގެ މަސައްކަތް ދިގުދަންމާލަން ކޮމިޓީން ނިންމާފައިވާއިރު، އިދިކޮޅުން ހުށަހެޅި ބިލަށް ބަދަލުތަކެއް ގެންނަ ޖެހޭ ކަމަށް އެޓާނީ ޖެނެރަލް އަހުމަދު އުޝާމް ވަނީ ވިދާޅުވެފަ އެވެ.
"މިހާރު ހުށަހަޅާފަ އޮތް ބިލަށް ކޮންމެވެސް ވަރެއްގެ ބަދަލެއް ގެންނަންޖެހޭ. ދެން ކެބިނެޓުގަ ނިންމާފަ އޮތް ނިންމުންތަކާ އެއްގޮތަށް ބިލު އިސްލާހުކޮށްގެން މަޖިލީހުން ކުރިއަށް ގެންދަން ޖެހޭނީ،" ޖޫން 6، ގައި އުޝާމް ވިދާޅުވި އެވެ.
ނަމަވެސް އޭޖީ އޮފީހުން ހުށަހަޅާނެ އިސްލާހުތަކެއް މިހާތަނަށް އެ އޮފީހުން ހާމަކޮށްފައެއް ނުވެ އެވެ.
