ރިވައިވަލް ސްޕޯޓްސް ކްލަބުން މެޑަލް ޓާގެޓަކާ އެކު، އިންޓަނޭޝަނަލް ދެ މުބާރާތުގައި ވާދަކުރުމަށް، ޒަމްބިއާ އާއި ބޮޓްސްވާނާ އަށް ފުރައިފި އެވެ.
އެ ގޮތުން، މި މަހު 14-17 އަށް ބާއްވާ ޒަމްބިއާ އިންޓަނޭޝަނަލް މުބާރާތާއި މި މަހު 21-24 އަށް ބާއްވާ ބޮޓްސްވާނާ އިންޓަނޭޝަނަލްގައި ވާދަކުރަން ފުރި ރިވައިވަލް ސްޕޯޓްސްގެ ކުޅުންތެރިންނަކީ، ނިބާލް އަހުމަދު އާއި ޒަޔާން ޒަކީ އަދި ޓީމުގެ ކޯޗު، ނަޝްފާން މުހައްމަދު އެވެ.
މީގެ އިތުރުން، ގައުމީ ބެޑްމިންޓަން ޓީމުގެ ދެ ކުޅުންތެރިން ކަމަށްވާ، އައިމިނަތު ނަބީހާ (ނަބީ) އާއި ފާތިމަތު ނަބާހާ (ނަބާ) ވެސް މި މުބާރާތުގައި ރިވައިވަލްއާ އެކު، ބައިވެރިވާނެ އެވެ.
މި ދެ މުބާރާތަށް ވެސް ރިވައިވަލް އިން ތައްޔާރުވީ މެޑަލް ޓާގެޓްތަކަކާ އެކު ކަމަށް އެ ކްލަބުން ވަނީ މައުލޫމާތު ދީފަ އެވެ.
މުބާރާތްތަކުގައި ވާދަކުރަން ހަމަޖެހިފައިވަނީ، ސިންގަލްސް، ޑަބަލްސް އަދި މިކްސް ޑަބަލްސް އިވެންޓްތަކުގަ އެވެ. އެ ގޮތުން، ޑަބަލްސް ޕެއާ އިންގެ ގޮތުގައި، ފިރިހެން ޑަބަލްސް ޕެއާ އަކީ، ނިބާލް އާއި ޒަޔާންގެ ޕެއާ އަދި އަންހެން ޑަަބަލްސް ޕެއާ އަކީ ނަބާހާ އާއި ނަބީހާގެ ޕެއާ އެެވެ. މިކްސް ޑަބަލްސް ޕެއާތަކަކީ، ރާއްޖެ އަށް މެޑަލް ހޯދައިދީފައިވާ، ނަބާހާ އާއި ޒަޔާންގެ ޕެއާގެ އިތުރުން، ބައިނަލްއަގުވާމީ ލެވަލްގައި ކުރިއެރުން ހޯދަމުން އަންނަ، ނިބާލް އާއި ނަބީހާގެ ޕެއާ އެވެ.
ރިވައިވަލް އިން އެންމެ ފަހުން، މިދިޔަ މަހު ވާދަކުރި ޔޫގާންޑާ މުބާރާތަށް ރިވައިވަލްއާ ގުޅުނު ނަބީހާ އާއި ނަބާހާ ވަނީ އެ މުބާރާތުގެ އަންހެން ޑަބަލްސް އިން ލޯ މެޑަލް ހޯދައިފަ އެވެ.
