މަޖިލީހަށް މެންބަރުން އިންތިހާބު ކުރާ ރައްޔިތުންގެ ވިންދާއި ފިކުރާ ދެކޮޅަށް ވަކާލާތު ކުރައްވާ މެންބަރުން ވަކި ކުރެވޭނެ ގޮތް ގާނޫނުގައި އޮންނަންޖެހޭ ކަމަށް މަޖިލީހުގެ ރައީސް އަބްދުއްރަހީމް އަބްދުﷲ ވިދާޅުވެއްޖެ އެވެ.
ދަައުލަތުގެ ޓީވީ، "ޕީއެސްއެމް" ގެ ޕްރޮގުރާމެއްގައި ވާހަކަދައްކަވަމުން އަބްދުއްރަހީމް ވިދާޅުވީ ރައީސުލްޖުމްހޫރިއްޔާގެ މަގާމަކީ މުޅި ރާއްޖޭގެ ރައްޔިތުން ވޯޓު ދީގެން އިންތިހާބު ކުރާ މަގާމަކަށް ވާއިރު، އެ މަގާމުގައި ހުންނަވާ ބޭފުޅަކު މަގާމުން ދުރު ކުރެވޭނެ ގޮތް ވަރަށް ސާފުކޮށް ގާނޫނުގައި ބަޔާން ކޮށްފައި އޮންނަ ކަމަށެވެ.
ނަމަވެސް އެންމެ 5000 ރައްޔިތުންގެ ވޯޓާއެކު އިންތިހާބުވާ މަޖިލިސް މެންބަރު ވަކި ކުރެވޭނެ ގޮތެއް ގާނޫނުގައި ނެތް ކަމަށެވެ. އެއީ ރަނގަޅު ގޮތެއް ނޫން ކަމަށް އޭނާ ވިދާޅުވި އެވެ.
"މިސާލަކަށް އަޅުގަނޑު އިންތިހާބު ކުރީ ފޮނަދޫ ދާއިރާގެ ރައްޔިތުން، އަޅުގަނޑު އެ ރައްޔިތުންގެ ވިންދާ ދެކޮޅަށް ނޫނީ އެ ރައްޔިތުން އިންތިހާބު ކުރި ފިކުރާ ދެކޮޅަށް މަސައްކަތް ކުރަން ފަށައިފިއްޔާ ނޫނީ އެ ނޫން ވެސް ސަބަބެއް މެދުވެރިވެއްޖެއްޔާ އެ ރައްޔިތުންނަށް އޮންނަންވާނެ ކަމަށް އަޅުގަނޑަށް ގަބޫލު ކުރެވެނީ ނޫނީ އޭނާ އެ މަގާމުން ދުރު ކުރެވޭނެ ކޮންމެވެސް ގޮތެއް ގާނޫނުގެ ތެރެއިން ފަހިވެފައި އޮންނަން ޖެހޭނެ ކަމަށް އަޅުގަނޑު ގަބޫލު ކުރަނީ،" އަބްދުއްރަހީމް ވިދާޅުވި އެވެ.
އޭނާ ވިދާޅުވީ އެއީ މިއަދަކު އެކަނި އޭނާ ގަބޫލު ކުރައްވާ ކަމެއް ނޫން ކަމަށާއި އަބަދު ވެސް އެކަން އެގޮތަށް ގަބޫލު ކުރައްވާ ކަމަށެވެ. އަދި އެ ބަދަލު އައިސްގެން ނޫނީ ރާއްޖޭގެ ވެރިކަމުގެ ނިޒާމު މި ޒަމާނަށް ނުފެތޭނެ ކަމަށް އަބްދުއްރަހީމް ވިދާޅުވި އެވެ.
"އަޅުގަނޑަކަށް ގަބޫލެއް ނުކުރެވޭ އެންމެ މަތީ ވެރިމީހާ ބަދަލު ކުރެވޭނެ ފުރުސަތު ފަހިވެފައި އޮވެފައި، ދެން އޭގެ ދަށަށް އިންތިހާބު ކުރާ މީހުން ވަކި ކުރާނެ ފުރުސަތެއް ނެތި އޮތުން އެއީ މި ޒަމާނާ ފައި ހަމަވާ ކަމެއް ކަމަކަށެއް،" އެ މަނިކުފާނު ވިދާޅުވި އެވެ.
އަބްދުއްރަހީމް މިހެން ވިދާޅުވިއިރު، މަޖިލިސް މެމްބަރުން ރިކޯލް ކުރެވޭ ގޮތަށް ގާނޫނުތައް ބަދަލުކުރުމަކީ މި ސަރުކާރުގެ ލެޖިސްލޭޓިވް އެޖެންޑާގައި ހިމެނޭ ކަމެކެވެ.
