ރާއްޖޭގައި އެންމެ ޕްރޮފެޝަނަލްކޮށް، ހިންގަމުން އަންނަ ބެޑްމިންޓަން ކްލަބް، ރިވައިވަލް ސްޕޯޓްސްގެ ފިޓްނަސް ޕާޓްނަރަކަށް ޓޯޓަލް ފިޓްނަސް ގްރޫޕް (ޓީއެފްޖީ) ހަމަޖައްސައި އެއްބަސްވުމުގައި ސޮއިކޮށްފި އެވެ.
ގައުމީ ލެވަލާއި ބައިނަލްއަގުވާމީ މައިދާނުގަ ވެސް ގިނަ ކާމިޔާބީތަކެއް ހޯދާފައިވާ ބެޑްމިންޓަން ކުޅުންތެރިން ހިމެނޭ ރިވައިވަލް ސްޕޯޓްސްގެ އެތުލީޓުންގެ ފިޓްނަސް ކަންކަަން އެންމެ އެކަށޭނެ ގޮތަށް ގެންދިއުމުގެ ޕްލޭނެއްގެ ދަށުން ޓީއެފްޖީ އާއި ރިވައިވަލް އިން މި ހެދި އެއްބަސްވުމުގެ މުއްދަތަކީ އެއް އަހަރެވެ.
ރިވައިވަލް އިން ބުނީ މި އެއްބަސްވުމާ ގުޅިގެން، އެ ކްލަބްގެ ހައި ޕާފޯމަންސް އެތުލީޓުންގެ ސްޓްރެންތާއި ކޮންޑިޝަނިން ޓްރެއިނިން، ރިކަވަރީ އާއި ޖުމްްލަކޮށް، އެތުލީޓަކު، ފިޓްކޮށް ހުންނަން ބޭނުންވާ ހުރިހާ ޓްރެެއިނިންގެ ކަންކަމަށް ޓީއެފްޖީގެ ވަސީލަތްތަކުގެ އެހީތެރިކަން އެ ކްލަބްގެ އެތުލީޓުންނަށް ލިބިގެންދާނެ ކަމަށެވެ.
ޓީއެފްޖީ އަކީ ރިވައިވަލް އިން ބޭނުންވާ ޓްރެއިނިންތައް ފޯރުކޮށްދީ އެ ކްލަބްގެ ލަނޑުދަނޑިތައް ހާސިލްކުރަން ބަލާއިރު، ތަފާތު ދެއްކޭނެ ފަދަ ބައެއްކަން، މީގެ ކުރިން ޓީއެފްޖީން ކޮށްފައިވާ މަސައްކަތްތަކުން އެނގިގެންދާ ކަމަށް ވެސް ރިވައިވަލް އިން ވަނީ ބުނެފަ އެވެ.
އެ ގޮތުން، ކޮންމެ އުމުރެއްގެ މީހުންގެ ފިޓްނަސްގެ ކަންކަމަށް އަމާޒުކޮށް، ޓީއެފްޖީން ކުރާ މަސައްކަތް ފާހަގަކުރާ ކަމަށް ވެސް ރިވައިވަލް އިން ވަނީ ބުނެފަ އެވެ.
މީގެ އިތުރުން، ޓީއެފްޖީއާ އެކު، މި ވެވުނު އެއްބަސްވުމުގެ ސަބަބުން، ރިވައިވަލް އިން ބެޑްމިންޓަނުން، ރާއްޖެ އަށް ރީތި ނަން ހޯދައިދޭން ބައިނަލްއަގުވާމީ ލެވަލްގައި ކުރާ މަސައްކަތުގައި ބޮޑު ހިތްވަރެއް ލިބިގެންދާނެ ކަމަށް ވެސް ރިވައިވަލް އިން ވަނީ ބުނެފަ އެވެ.
