ރާއްޖޭގެ އެންމެ ކާމިޔާބު ފުޓުބޯޅަ ކްލަބްތަކުގެ ތެރޭގައި ހިމެނޭ ނިއު ރޭޑިއަންޓްސް ސްޕޯޓްސް ކްލަބްގެ ކޮންގްރެސް މި މަހު 20 ގައި ބާއްވާ އެ ކުލަބުން ނިންމައިފި އެވެ.
ރާއްޖޭގެ އެންމެ ކާމިޔާބު ފުޓުބޯޅަ ކްލަބް ނިއު މި ވަގުތު އޮތީ ދެ ވަނަ ޑިވިޝަނުގަ އެވެ. އެ ކްލަބުން މި މަހުގެ 20 ވަނަ ދުވަހު ކޮންގްރެސް ބާއްވަން ތައްޔާރުވަމުން އަންނައިރު، އެ ކްލަބްގެ ޗެއާމަން, އަހުމަދު ވާސިފް ވަނީ އިސްތިއުފާ ދީފަ އެވެ.
ނިއު އިން މި މަހު އެ ކްލަބްގެ ކޮންގްރެސް ބާއްވަން ނިންމާފައިވާއިރު, އެ ކްލަބްގެ ޗެއާމަންކަމުގެ މަގާމަށް ޝައުގުވެރިވާ ކަމަށް ރީޖަނަލް އެއާޕޯޓްސްގެ މެނޭޖިންގް ޑިރެކްޓަރު އަހުމަދު މުބީން ވަނީ ވިދާޅުވެފަ އެވެ. މުބީންގެ އިތުރުން ނިއުގެ ކުރީގެ ޗެއާމަން އަލީ ވަހީދު (ބަލަކް) ވެސް ވަނީ މީގެ ކުރިން ނިއުއިން ފުރުސަތު ދީފި ނަމަ އެ ކްލަބްގެ ޗެއާމަންކަން ކުރަން ތައްޔާރަށް ހުރި ކަމަށް ވިދާޅުވެފަ އެވެ.
ރައްޔިތުންގެ މަޖިލީހުގެ މެމްބަރުކަން ވެސް ކުރެއްވި، މުބީން ވަނީ މި ފަހުން ނިއުގެ ޗެއާމަންކަމަށް އަންނަން އުޅުއްވާ ކަމުގެ އިޝާރާތެއް ސޯޝަލް މީޑިއާގައި ދެއްވައިފަ އެވެ. އެ ގޮތުން މުބީން ކުރި ޕޯސްޓެއްގައި ވިދާޅުވީ, "މާތް الله ގެ ވާގިފުޅާ އެކު މި ފަށާ ދަތުރުގައި ދިވެހިރާއްޖޭގެ އެންމެ ސަޕޯޓަރުން ގިނަ ކްލަބް އަލުން އަނބުރާ އިހު އޮތް މަގާމަށް ގެނެސް ނިއުގެ ސަޕޯޓަރުން ހެއްވާލަ ދޭނަން." ކަމަށެވެ.
ކުޅުންތެރިންނަށް މުސާރަ ނުދޭ މައްސަލަ ގޯހުން ގޯހަށް ގޮސްފައި އޮއްވައި، ނިއު އިން އެފްއޭއެމްގެ ރައީސް ބައްސާމް އަދީލް ޖަލީލްގެ ލީޑަޝިޕް ބަދަލުކުރަން ކުރި މަސައްކަތުގައި، ބައިވެރިވުމުން، 2019 ވަނަ އަހަރު އެފްއޭއެމް އިން ނިއު ސަސްޕެންޑްކުރި އެވެ.
ނިއު ސަސްޕެންޑް ކުރަން އެފްއޭއެމް އިން ދެއްކި ސަބަބަކީ، ނިއު އިން މުސާރަަ ނުދީ ހުރި މައްސަލަތަކެވެ.
އެ އަޑިގަނޑުން ނިއު އަރައިގަނެ، 2022 ވަނަ އަހަރު ކުޅުނު ދެ ވަނަ ޑިވިޝަން މުބާރާތަށް ނިއު އިން ނުކުމެވޭވަރު ކުރީ ވާސިފް ހިމެނޭހެން ނިއުގެ އެކި ސަޕޯޓަރުންގެ ގްރޫޕެއް އިސްނަގައިގެން ކުރި މަސައްކަތުންނެވެ.
ވާސިފާ އެކު މަސައްކަތް ކުރި ނިއުގެ ސަޕޯޓަރުން، ނިއު ރޭޑިއަންޓްގެ ނަން ފުޓްބޯޅައިގައި ދިރުވޭތޯ، ރޭޑިއަންޓްގެ ނަމުގައި ޓީމެއް ހަދައިގެން ކުރިއަށްދެވޭތޯ ވެސް ބެލި އެވެ. އެކަމަކު، އެކަން ކުރެވޭގޮތް ނުވުމުން، ނިއު ރޭޑިއަންޓްގެ ކަންކަން ހަމަޔަކަށް އަޅުވައި، ކުރިއަށްދާން ނިންމައި، ސަސްޕެންޝަނުން ސަލާމަތްވީ އެވެ.
ނިއު އިން މިދިޔަ ސީޒަނުގެ ދެ ވަނަ ޑިވިޝަނުގައި، ބަލިވީ ސެމީ ފައިނަލުގައި ބުރު ސްޕޯޓްސް ކްލަބް އަތުންނެވެ. ބުރު ވަނީ، އެ ފަހަރު، ދެ ވަނަ ޑިވިޝަން ކާމިޔާބުކޮށް، ފުރަތަމަ ޑިވިޝަނަށް ޕްރޮމޯޓްވެފަ އެވެ. އެ ފަހަރު، އެފްއޭއެމުން ފުރަތަމަ ޑިވިޝަނުގެ ޖާގަ ދޭން ނިންމީ ދެ ވަނަ ޑިވިޝަނުގެ ޗެމްޕިއަނުންނަށް އެކަންޏެވެ. އެންމެ ފަހުން ބޭއްވި، ދެ ވަނަ ޑިވިޝަނުގައި ފައިނަލަށް ދާ ދެ ޓީމެއް ފުރަތަމަ ޑިވިޝަނަށް ޕްރޮމޯޓްވާ ގޮތަށް އެފްއޭއެމް އިން ގަވާއިދު ހެދި އެވެ. ނިއު އަށް ދެ ވަނަ ފަހަރު ވެސް އެކަން ނާކާމިޔާބުވީ، ސެމީއާ ހަމައިންނެވެ. ސެމީގައި ވާދަވެރި ވިކްޓަރީ ސްޕޯޓްސް ކްލަބް އަތުން ނިއު ވަނީ 2-0 އިން ބަލިވެފަ އެވެ.
