ގެދޮރު އިމާރާތް ކުރުމަށް ފަސް ޕަސެންޓަށް ވުރެ ކުޑަ އިންޓަރެސްޓު ރޭޓުގައި ލޯނު ދޫކުރާ ހިޔާވެހި ފައިނޭންސިން ސްކީމުން 3 މިލިއަން ރުފިޔާގެ ލޯނު ހާއްސަކޮށްފައި ވަނީ އައްޑޫ ސިޓީ ހިމެނޭ ގޮތަށް އެންމެ 29 ރަށަކަށެވެ.
ގެޒެޓުކޮށްފައިވާ އުސޫލުގައި އެ ލޯނުން އިސްތިސްނާކޮށްފައި ވަނީ ކ.، އއ. އަދި ތ. އަތޮޅެވެ. ގދ. ތިނަދޫ ވެސް ލިސްޓުގައި ހިމެނީ ސިޓީއެއްގެ ދަރަޖައިގައި ބަލާ ރަށަކަށް ވާތީ އެވެ.
3 މިލިއަންގެ ލޯނު ލިބޭ ރަށްތައް
- ހއ. ހޯރަފުށި
- ހއ. ދިއްދޫ
- ހދ. ކުޅުދުއްފުށި ސިޓީ
- ހދ. ހަނިމާދޫ
- ހދ. ނޮޅިވަރަންފަރު
- ހދ. ނޮޅިވަރަމް
- ށ. ފުނަދޫ
- ނ. މާފަރު
- ނ. މަނަދޫ
- ރ. އުނގޫފާރު
- ރ. އަލިފުށި
- ރ. ދުވާފަރު
- ބ. ތުޅާދޫ
- ބ. އޭދަފުށި
- ޅ. ނައިފަރު
- ޅ. ހިންނަވަރު
- އދ. މަހިބަދޫ
- އދ. މާމިގިލި
- ފ. ނިލަންދޫ
- ދ. ކުޑަހުވަދޫ
- ލ. ގަން
- ލ. ފޮނަދޫ
- ގއ. ވިލިނގިލި
- ގދ. ތިނަދޫ ސިޓީ
- ފުވައްމުލައް ސިޓީ
- އައްޑޫ ސިޓީ (ފޭދޫ، ހިތަދޫ، މަރަދޫ އަދި މަރަދޫފޭދޫ)
މި މަހުގެ 8 ގައި މި ލޯނު ސްކީމް ބަހާލާފައި ވަނީ ތިން ކެޓަގަރީ އަކަށެވެ.
އެންމެ ބޮޑުކޮށް ލޯނު ލިބެނީ މާލެ އަށެވެ. މާލޭގައި ގެދޮރު އިމާރާތް ކުރަން 6 މިލިއަން ރުފިޔާ ލިބޭއިރު، ތިން މިލިއަންގެ ލޯނު ލިބޭ ރަށްތައް ފިޔަވައި އެހެން ރަށްރަށުގައި ގެދޮރު އިމާރާތް ކުރަން ލިބޭނީ އެއް މިލިއަން ރުފިޔާގެ ލޯނަށެވެ.
ސަރުކާރުން އަންނަ އަހަރަށް ލަފާކޮށް މިދިޔަ މަހު މަޖިލީހަށް ހުށަހެޅި ބަޖެޓުގައި މި ސްކީމުގެ ދަށުން ލޯނު ދޫކުރުމަށް ދެ ބިލިއަނާއި ފަސް ބިލިއަނާ ދެމެދުގެ އަދަދެއް ވަނީ ހިމަނާފަ އެވެ.
