ނައިންޓީ ޕްލަސް އިން އިންތިޒާމްކުރާ، ގޯލްޑް ކަޕް ފުޓްބޯޅަ މުބާރާތަކީ ރާއްޖޭގެ އަތޮޅު ފުޓްބޯޅަ އަށް ބޭނުންތެރި ފުުރުސަތެއް ފަހިވެގެންދާނެ މުބާރާތެއް ކަމަށް އެ މުބާރާތުގެ އިސް ފަރާތެއްގެ ގޮތުގައި މަސައްކަތްކުރަމުން އަންނަ ޕްރޯ ލައިސަންސް ކޯޗު، މުހައްމަދު ޝާޒްލީ (ޝާޒް) ބުނެފި އެވެ.
ރާއްޖޭގެ ފުޓްބޯޅައިގެ ފޯރި އަލުން ވީހާވެސް ބޮޑަށް ގަދަ ކުރުމުގެ ބޭނުމުގައި "ގޯލްޑް ކަޕް"ގެ ނަމުގައި މުޅި ރާއްޖެ އަށް ހުޅުވާލައިގެން ބޭއްވޭ ފުޓްބޯޅަ މުބާރާތެއް ނައިންޓީ ޕްލަސް އާއި ސްޕޯޓްސް މިނިސްޓްރީން ގުޅިގެން ބޭއްވުމަށް ލޯންޗްކުރީ ސެޕްޓެމްބަރު މަހުގެ ތެރޭގަ އެވެ.
ގަލޮޅު ރަސްމީ ދަނޑުގައި ކުޅޭ ގޯލްޑް ކަޕް ތާވަލުކޮށްފައި އޮތީ، މި މަހު 20 އިން އަންނަ މަހުގެ 25 އާ ހަމައަށް ކުރިއަށްދާ ގޮތަށެވެ. ނައިންޓީ ޕްލަސް އިން އިއުލާނުކުރި ގޯލްޑް ކަޕްގައި ބައިވެރިވުމަށް ހުޅުވާލައި، މުއްދަތު ހަމަވިއިރު، 22 ޓީމެއް (ރަށެއް ނޫނީ ސިޓީއެއް) ވަނީ ބައިވެރިވެފަ އެވެ.
މުބާރާތް ފަށާ ތާރީހު ގާތްވެފައިވާއިރު، "އަދަދު ސްޕޯޓްސް" އިން ކުރި ސުވާލަކަށް ދިން ޖަވާބުގައި ޝާޒް ބުނީ، މުބާރާތުގައި ބައިވެރިވި ރަށްރަށުގެ ފަރާތުން ލިބެމުން އަންނަ ފީޑްބެކް ވަރަށް ރަނގަޅު ކަަަމަށެވެ.
"ހަގީގަތުގައި ރަށްރަށުން، އަތޮޅުތަކުން ވަރަށް ބޭނުންވެފައި ހުރި ފުރުސަތެއް މި ފަހިކޮށްދެވެނީ، އަތޮޅު ފުޓްބޯޅަ އަށް ހާއްސަކޮށް، ދެން ރާއްޖޭގެ މުޅި ފުޓްބޯޅަ އަށް ވެސް ފައިދާކުރާނެ ފުރުސަތެއް. މި ފަހަރު ބައިވެރިވާ 22 ޓީމުން ވެސް ވަރަށް ބޮޑަށް އެބަ މަސައްކަތްކުރޭ ހަގީގަތުގައި، އެއީ ގަލޮޅު ދަނޑުގައި އަމިއްލަ ރަށް ތަމްސީލްކޮށްލަން ލިބޭ ފުރުސަތެއް މިއީ،" ޝާޒް ބުންޏެވެ.
"ދެން، ހަގީގަތުގައި މުބާރާތް އިތުރު ފޭސްތަކަކަށް ބެހިގެންދާއިރު، އަތޮޅުތަކުގައި ކޮލިފައި ކުޅޭ ގޮތަށް ކުރިއަށް އޮތްތާގައި ހަމަޖެހިގެން ދާ ގޮތަށް މި އޮތީ. މިއީ ވެސް ރަށްރަށުން މި މުބާރާތާ މެދު ޝައުގުވެރިކަން އިތުރުވާ ކަމެއް. އެހެންވީމަ، ވަރަށް ބޮޑު ތަރުހީބަކާ އެކީގައި ކުރިއަށް މި ދަނީ،"
މި ފަަހަރުގެ ގޯލްޑް ކަޕްގައި، ބައިވެރިވެފައިވާ ރަށްތަކަކީ، ހއ. ދިއްދޫ، ހދ. ނޭކުރެންދޫ، ރ. އަލިފުށި، ބ. އޭދަފުށި. ބ. ތުޅާދޫ، ބ. ކެންދޫ، ޅ. ނައިފަރު، ޅ. ހިންނަވަރު، ޅ. ކުރެންދޫ، މާލެ ސިޓީ، ކ. މާފުށި، ކ. ހުރާ، ކ. ގުރައިދޫ، އއ. ތޮއްޑޫ، ފ. ނިލަންދޫ، ދ. މީދޫ، ދ. ކުޑަހުވަދޫ، ތ. ތިމަރަފުށި، ގއ. ދެއްވަދޫ، ގދ. ފަރެސްމާތޮޑާ، ފުވައްމުލައް ސިޓީ އަދި އައްޑޫ ސިޓީ އެވެ.
މުބާރާތުގެ ގުރުއަތުލުން ބޭއްވުމަށް ހަމަޖެހިފައިވަނީ، މި މަހު 12 ވަަނަ ދުވަހު (އަންނަ އަންގާރަ ދުވަހުގެރޭ) ކަމަށް ނައިންޓީ ޕްލަސް އިން ވަނީ މައުލޫމާތުދީފަ އެވެ.
ގޯލްޑް ކަޕްގައި ކުޅޭ ކޮންމެ ޓީމަކަށް ރަށުންބޭރުން ދެ ކުޅުންތެރިއަކު ޓީމުގައި ޖެހޭނެ އެވެ. ރަށުންބޭރުން ޖެހޭ ދެ ކުޅުންތެރިންގެ ތެރޭގައި، ގޯލްޑް ކަޕްގައި ކުޅޭ އެހެން ރަށެއްގެ ކުޅުންތެރިއަކު ވެސް ހިމެނިދާނެ އެވެ. ޝާޒް ބުނީ، އެ ގޮތަށް ގަވާއިދުން ވެސް ޖާގަދިނުމުގެ ބޭނުމަކީ ކުޅުންތެރިއަކަށް ބޭނުން ޓީމަކަށް ކުޅުމުގެ ހައްގު އޮންނާތީ އެ ފުރުސަތު ދިނުމުގެ ގޮތުން ކަމަށެވެ.
ގޯލްޑް ކަޕް ފުޓްބޯޅަ މުބާރާތާއި އެފްއޭއެމް އިން މޯލްޑިވްސް ސޮކަ މޭޓްސް (އެމްއެސްމޭޓްސް)އާ ގުޅިގެން ބާއްވާ އެފްއޭއެމް ޔޫތު ލީގު އެއް ދުވަސްވަރެއްގައި ގަލޮޅު ދަނޑުގައި ކުޅެން ތާވަލުތަކެއް އައުމާ އެކު އެކަމާ ގުޅޭ ފުށުއެރުންތަކެއްގެ މައްސަލަތަކެއްގައި ގިނަ ބަޔަކު ވަނީ ޝުއޫރުފާޅުކޮށްފަ އެވެ. މިހާރު އެ ކަމަށް ހައްލު ހޯދައިފައިވަނީ، ގޯލްޑް ކަޕް ނިމުމުން، ޔޫތު ލީގުގެ މެޗުތައް ގަލޮޅު ދަނޑުގައި ކުޅޭ ގޮތަށެވެ.
