ހަންގޭރީގައި ތަމްރީން ހަދަމުން އަންނަ ގައުމީ ސްވިމިން ޓީމުގެ ހަމްނާ އަހުމަދު، ފަސް އަހަރުވީ ގައުމީ ރެކޯޑެއް މުގުރާލައިފި އެވެ.
ހަންގޭރީގައި މިހާރު ކުރިއަށްދާ އެ ގައުމުގެ 20 ވަނަ ނެޝަނަލް ޝޯޓްޓްރެކް ޗެމްޕިއަންޝިޕްގައި ވާދަކޮށް ހަމްނާ ވަނީ، އަންހެނުންގެ ޝޯޓް ކޯސް 200 މީޓަރު ބްރެސްޓްސްޓްރޯކް އިވެންޓުގެ ގައުމީ ރެކޯޑް މުގުރާލައިފަ އެވެ.
މި ރެކޯޑް އެންމެ ފަހުން ހެދީ، މީގެ ފަސް އަހަރު ކުރިން 2019 ވަނަ އަހަރު ނޭޕާލުގައި ބޭއްވި ސައުތު އޭޝިއަން ގޭމްސްގައި، ގައުމީ ޓީމުގެ ފެތުންތެރިޔާ، އައިޝަތު ސާޖިނާ އެވެ. ސާޖިނާ އެ ފަހަރު ރެކޯޑް ހެދީ 03:08.91 އިން ރޭސް ފުރިހަމަ ކޮށްގެންނެވެ. ހަމްނާ، އެ ރެކޯޑް މުގުރާލި ޓައިމިން އަކީ، 03:00.53 އެވެ.
ހަމްނާ ވަނީ ދާދި ފަހުން ދެ ރެކޯޑެއް ހަދައިފަ އެެވެ. އެއީ، އަންހެނުންގެ ޝޯޓްކޯސް 100 މީޓަރު ބްރެސްޓްސްޓްރޯކް އިވެންޓުގެ ގައުމީ ރެކޯޑާއި އަންހެނުންގެ ޝޯޓްކޯސް 50 މީޓަރު ބްރެސްޓްސްޓްރޯކް އިވެންޓުގެ ގައުމީ ރެކޯޑް އެވެ.
ދާދި ފަހުން، ތިން ރެކޯޑެއް މުގުރާލި، މުހައްމަދު އާން ހުސެއިން ވަނީ އަނެއްކާ ވެސް އިތުރު ތިން ރެކޯޑެއް މުގުރާލައިފަ އެވެ. މި ފަހަރު މުގުރާލީ ފިރިހެނުންގެ ޝޯޓްކޯސް 50 މީޓަރު ފްރީސްޓައިލް އިވެންޓާއި ފިރިހެނުންގެ ޝޯޓް ކޯސް 200 މީޓަރު ފްރީ ސްޓައިލް އިވެންޓްގެ އިތުރުން، ފިރިހެނުންގެ ޝޯޓް ކޯސް 50 މީޓަރު ބަޓަފްލައި އިވެންޓުންނެވެ.
ފިރިހެނުންގެ ޝޯޓްކޯސް 50 މީޓަރު ފްރީސްޓައިލް އިވެންޓުން އާން ރެކޯޑް ހެދީ 00.23.79 އިން ރޭސް ނިންމައިގެންނެވެ. މި އިވެންޓުގެ ޤައުމީ ރެކޯޑް އެންމެ ފަހުން އޮތީ ވެސް އާން އަތުގަ އެވެ. އެއީ، މިދިޔަ މަހު ބޭއްވުނު ދެ ވަނަ ޝޯޓް ޓްރެކް ބުޑަ ކަޕްގައި 00:24.29 އިން ރޭސް ފުރިހަމަ ކޮށްގެން ހެދި ރެކޯޑެކެވެ.
ފިރިހެނުންގެ ޝޯޓްކޯސް 200 މީޓަރު ފްރީސްޓައިލް އިވެންޓުގެ ގައުމީ ރެކޯޑް އާން އާ ކުރީ 02:01.08 އިން ރޭސް ނިންމައިގެންނެވެ. މިއީ، އެންމެ ފަހުން މުހައްމަދު ރިހާން ޝިހާމް އާ ކުރި ރެކޯޑެކެވެ. އެއީ، މި އަހަރު މެދުތެރޭގައި ބޭއްވި އޭއޯއެސްއައި ޝޯޓްކޯސް އޭޖްގްރޫޕް ސްވިމިން ޗެމްޕިއަންޝިޕްގައި ރިހާން އޭރު މި އިވެންޓްގެ ރެކޯޑް ހެދީ 02.03.06 ގެ ޓައިމިން އަކުންނެވެ.
ފިރިހެނުންގެ ޝޯޓްކޯސް 50 މީޓަރު ބަޓަފްލައި އިވެންޓުގެ އާން އާކުރީ 00:26.67 އިން ރޭސް ނިންމައިގެންނެވެ. މި އިވެންޓުގެ ގައުމީ ރެކޯޑް ވެސް އެންމެ ފަހުން އޮތީ ރިހާން އަތުގަ އެވެ. ރިހާން ރެކޯޑް ހެދި ވަގުތަކީ 00:27.06 އިންނެވެ.
