ހަންގޭރީގައި މިހާރު ކުރިއަށްދާ އެ ގައުމުގެ 20 ވަނަ ނެޝަނަލް ޝޯރޓް ޓްރެކް ޗެމްޕިއަންޝިޕާއި ހަމަ އެ ގައުމުގައި ކުރިއަށްދިޔަ ހާޖޮސް އަލްފްރެޑް ކުޕާ 3 ގައި ރާއްޖޭގެ މުހައްމަދު އާން ހުސެއިން އާއި ހަމްނާ އަހުމަދު، ގިނަ ގައުމީ ރެކޯޑްތަކެއް މުގުރާލައިފި އެވެ.
އެ ގޮތުން، އާން ތިން ރެކޯޑެއް މުގުރާލިއިރު، ހަމްނާ ވަނީ ދެ ރެކޯޑެއް ހަދައިފަ އެވެ. އާން، ހެދި ރެކޯޑްތަކަކީ ފިރިހެނުންގެ ޝޯޓް ކޯސް 50 މީޓަރު ބެކްސްޓްރޯކް އިވެންޓާއި، ފިރިހެނުންގެ ޝޯޓް ކޯސް 100 މީޓަރު ފްރީ ސްޓައިލް އިވެންޓްގެ އިތުރުން، ފިރިހެނުންގެ 50 މީޓަރު ޝޯޓް ކޯސް ފްރީ ސްޓައިލް އިވެންޓް އެވެ.
މީގެ ތެރެއިން، ފިރިހެނުންގެ ޝޯޓްކޯސް 100 މީޓަރު ފްރީސްޓައިލް ރެކޯޑަަކީ އަށް އަހަރު ވަންދެން މުގުރައިނުލެވި އޮތް ރެކޯޑެކެވެ. އެ ގޮތުން، 2016 ވަނަ އަހަރު ފީނާ ވޯލްޑް ޗެމްޕިއަންޝިޕްގައި ނިޝްވާން އިބްރާހިމް ހެދި ރެކޯޑް، އާން މި ވަނީ އެއް މަސް ތެރޭ ދެ ފަހަރަށް އާ ކޮށްފަ އެވެ. މިދިޔަ މަހު އޮތް، ދެ ވަނަ ޝޯޓް ޓްރެކް ބުޑަ ކަޕްގައި، ފިރިހެނުންގެ ޝޯޓްކޯސް 100 މީޓަރު އިވެންޓް، 00:54.89 އިން ރޭސް ފުރިހަމަކޮށްގެން، އާން ރެކޯޑް މުގުރާލީ، ނިޝްވާންގެ ޓައިމިން ބީޓުކޮށްފަ އެވެ. ނިޝްވާން، އަށް އަހަރު ކުރިން ރެކޯޑް ހެދި ޓައިމިން އަކީ، 00:56.25 އިންނެވެ.
އާން، އަނެއްކާ ވެސް، މި ރެކޯޑް އާ ކުރީ، 00:53.45 އިން ރޭސް ނިންމައިގެންނެވެ.
ފިރިހެނުންގެ ޝޯޓްކޯސް 50 މީޓަރު ބެކްސްޓްރޯކް އިވެންޓުގެ ގައުމީ ރެކޯރޑް އާން އާކުރީ، 00:28.22 އިން ރޭސް ނިންމައިގެންނެވެ. މި އިވެންޓުގެ ގައުމީ ރެކޯޑް އެންމެ ފަހުން އާކޮށްފައިވަނީ މިއަހަރު މެދުތެރޭގައި ބޭއްވި އޭއޯއެސްއައި ޝޯޓްކޯސް އޭޖް ގްރޫޕް ސްވިމިން ޗެމްޕިއަންޝިޕްގައި މުޙައްމަދު ރިހާން ޝިހާމް އެވެ. ރިހާން ރެކޯޑް ހެދިއިރު، އިވެންޓް ނިންމާފައިވަނީ 00.29.06 އިންނެވެ.
ފިރިހެނުންގެ ޝޯޓްކޯސް 50 މީޓަރު ފްރީސްޓައިލް އިވެންޓު، 00:24.29 އިން ނިންމައިގެން، އާން ވަނީ މި އިވެންޓްގެ ރެކޯޑް ވެސް އާ ކޮށްފަ އެވެ. މި އިވެންޓްގެ ރެކޯޑް ކުރިން އޮތީ ވެސް އާން އަތުގަ އެވެ. އޭނާ ރެކޯޑް ހެދީ، 2021 ވަނަ އަހަރު ބޭއްވުނު 15 ވަނަ ފީނާ ވޯލްޑް ސްވިމިންް ޗެމްޕިއަންޝިޕް (25 މީޓަރ) ގައި 00:25.00 އިން ރޭސް ފުރިހަމަ ކޮށްގެންނެވެ.
އަންހެނުންގެ ޝޯޓްކޯސް 100 މީޓަރު ބްރެސްޓްސްޓްރޯކް އިވެންޓުގެ ގައުމީ ރެކޯޑް ހަމްނާ އާ ކުރީ ހަންގޭރީގައި ކުރިއަށްދިޔަ ހާޖޮސް އަލްފްރެޑް ކުޕާ 3 ގައި 01.23.76 އިން ރޭސް ނިންމައިގެންނެވެ. މިއީ ފަސް އަހަރު ވަންދެން މުގުރާނުލެވި އޮތް ރެކޯޑެކެވެ. މި އިވެންޓުގެ ގައުމީ ރެކޯޑް އެންމެ ފަހުން އާ ކޮށްފައިވަނީ 2019 ވަނަ އަހަރު ނޭޕާލްގައި ކުރިއަށްދިޔަ 13 ވަނަ ސައުތު އޭޝިއަން ގޭމްސްގައި 01.23.81 އިން ރޭސް ފުރިހަމަކުރި އައިޝަތު ސާޖިނާ އެވެ.
އަންހެނުންގެ ޝޯޓްކޯސް 50 މީޓަރު ބްރެސްޓްސްޓްރޯކް އިވެންޓުގެ ގައުމީ ރެކޯޑް ޙަމްނާ އާކުރީ 00.37.13 އިން ރޭސް ނިންމައިގެންނެވެ. މި އިވެންޓުގެ ގައުމީ ރެކޯޑް އެންމެ ފަހުން އާކޮށްފައިވަނީ ވެސް ޙަމްނާ އެވެ. އެއީ، މިދިޔަ އަހަރު ހަންގޭރީގައި ބޭއްވުނު އެ ގައުމުގެ ޝޯޓްކޯސް ޤައުމީ މުބާރާތުގައި 00.37.88 އިން ރޭސް ފުރިހަމަ ކޮށްގެންނެވެ.
