ރާއްޖޭގައި ފުޅާ ދާއިރާއެއްގައި އިންޝުއަރެންސްގެ ހިދުމަތް ދެމުން އަންނަ އަމާނާ ތަކާފުލްއިން ވަގުތީ ގޮތުން ސިއްހީ ދާއިރާއަށް މެދު ކަނޑާލި ކޭޝްލެސް ހިދުމަތް އަލުން ދޭން ފަށައިފި އެވެ.
އަމާނާ ތަކާފުލްއިން ބުނީ އެ ކުންފުނީގެ ޕޯޓަލްއިން ސިއްހީ ހިދުމަތްތަކަށް ކުރިއެކޭ ވެސް އެއްގޮތަށް ކޭޝްލެސް ހިދުމަތް މިހާރު ލިބެމުންދާނެ ކަމަށެވެ.
ފާއިތުވެދިޔަ ދުވަސްތަކުގައި ކަސްޓަމަރުންގެ ފަރާތުން ލިބެމުންދިޔަ އެއްބާރުލުމަށް ވެސް އަމާނާ ތަކާފުލްއިން ވަނީ ޝުކުރު އަދާކޮށްފަ އެވެ. އަދި އިތުރު މައުލޫމާތު ހޯދަން ބޭނުންވާނަމަ medical@takaful.mv އަށް މެއިލް ކުރުމަށް ނުވަތަ 9540045 އަށް ވައިބާއިން މެސެޖު ކުރުމަށް ވަނީ އެދިފަ އެވެ.
ކޭޝްލެސް ހިދުމަތަކީ ހިދުމަތް ހޯދާ ފަރާތްތަކުން ޑޮކްޓަރަށް ދައްކާއިރު އަމިއްލަ ޖީބުން ފައިސާ ދައްކަން ނުޖެހި އިންޝުއަރެންސުން އެބައި ހަމަޖެހުމެވެ. ކޭޝްލެސް ހިދުމަތް ނުލިބޭ ނަމަ ޖެހޭނީ ފުރަތަމަ އަމިއްލައަށް ފައިސާ ދެއްކުމަށްފަހު ފަހުން އެ ފައިސާ ކްލެއިމް ކުރާށެވެ.
ކޭޝްލެސް ހިދުމަތް އަމާނާ ތަކާފުލްއިން މެދުކަނޑައިލީ އަމިއްލަ އިިންޝުއަރެންސް ހުސްނުވަނީސް އާސަންދަ ބޭނުން ނުކުރެވޭ ގޮތަށް ސަރުކާރުން އުސޫލު ބަދަލު ކުރުމުންނެވެ.
އަމިއްލަ އިންޝުއަރެންސް އޮންނަ ފަރާތްތަކުގެ އެ އިންޝުއަރެންސް ހުސް ނުވަނީސް އާސަންދަ ނުލިބޭ ގޮތަށް އުސޫލު ބަދަލު ކުރީ މިދިޔަ ހުކުރު ދުވަހުން ފެށިގެންނެވެ.
އެ ބަދަލާ ގުޅިގެން ބައެއް ޕްރައިވެޓް އިންޝުއަރެންސްގެ ހިދުމަތްދޭ ތަންތަނުން ކޭޝްލެސްގެ ހިދުމަތް މެދުކަނޑާލި އެވެ. ނަމަވެސް ގިނަ ތަންތަނުން މިހާރު އަލުން ވަނީ އެ ހިދުމަތް ދޭން ފަށާފަ އެވެ.
