ގައުމީ ތަރައްގީގެ 20 އަހަރުގެ މާސްޓާ ޕްލޭން އެކުލަވާލުމުގައި ސިޔާސީ ޕާޓީތައް ބައިވެރި ކުރާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.
އެ ޕްލޭން އެކުލަވާލުމުގެ މަސައްކަތް ފެށުމުގެ ރަސްމިއްޔާތުގައި ރައީސް މުއިއްޒު ވިދާޅުވީ އެ ޕްލޭން އެކުލަވާލުމަކީ ހުރިހާ ބައެއް ބައިވެރިވާން ޖެހޭ ކަމެއް ކަމަށާއި އެކަމުގައި ސިޔާސީ ޕާޓީތަކުން ވެސް ގޮތް ކިޔަން ޖެހޭ ކަމަށެވެ.
"ސިޔާސީ ޕާޓީތައް ވެސް ބައިވެރިވާން ޖެހޭ. މިދެންނެވީ ނޫންތޯ މިއީ ހުރިހާ އެންމެންގެ ކަމެކޭ. ސިޔާސީ ޕާޓީތައް ވެސް މިއަށް ގޮތް ކިޔަންވާނެ. މިހާރު އަޅުގަނޑު ބޭނުންވަނީ ރައްޔިތުން ބައިވެރިވެގެން ނިންމަން ކުރިއަށް އޮތް 20 އަހަރު ރާއްޖެ ތަރައްގީވެގެންދާނެ ގޮތް،" ރައީސް ވިދާޅުވި އެވެ.
ކޮންމެ ވެރިކަމަކަށް ފަހު ސިޔާސަތުތައް ވަރަށް ބޮޑަށް ބަދަލުވެގެންދާކަން ފާހަގަ ކުރައްވާ ރައީސް ވިދާޅުވީ އޭގެ ސަބަބުން ރައްޔިތުންނަށް ވަރަށް ބޮޑެތި ގެއްލުންތަކެއްވެ، ގައުމު ބޭނުންވާ ސްޕީޑުގައި ތަރައްގީވެގެން ވެސް ނުދާ ކަމަށެވެ.
ރައީސް މުއިއްޒު ވިދާޅުވީ ސިޔާސީ ހިޔާލުތަފާތުވުންތަކުގެ ވާހަކައަށްވުރެ ހުރިހާ ސިޔާސީ ޕާޓީތައް އެއް ޕްލެޓްފޯމަކަށް ގެނެސް ވާހަކަ ދެއްކުމަށް ދައުވަތު ވެސް ދެއްވާނެ ކަމަށެވެ.
އެއް އަހަރު ތެރޭގައި ނިންމުމަށް އަމާޒު ހިފާފައިވާ 20 އަހަރުގެ ތަރައްގީގެ ޕްލޭން އެކުލަވާލަނީ ޔޫއެންޑީޕީ އަދި އޮސްޓްރޭލިއާ ސަރުކާރުގެ އެހީގަ އެވެ.
އެ ޕްލޭނަށް ސިޔާސީ ޕާޓީގެ އިތުރުން ކަމާ ބެހޭ ހުރިހާ ރައްޔިތުންގެ ބައިވެރި ކުރުމަށް އެކި ދާއިރާތަކާއި ޖަމިއްޔާ އާއި ޖަމާއަތްތަކުގެ އިތުރުން ކަމާ ބެހޭ ހުރިހާ ފަރާތްތައް ބައިވެރި ކުރުމަށް ވަނީ ހަމަޖެހިފަ އެވެ.
