ރައްޔިތުންގެ މަޖިލީހުގެ އިންތިހާބާއި ރިޔާސީ އިންތިހާބު އެއްކޮށް ބޭއްވުމުގެެ ވާހަކައެއް ރައީސް މުހައްމަދު މުއިއްޒު ވެރިކަމަށް ވަޑައިގަތުމަށް ވިއްކެވި މެނިފެސްޓޯގައި ނެތް ކަމަށް ކުރީގެ ރައީސް އިބްރާހިމް މުހައްމަދު ސޯލިހު ރޭ ވިދާޅުވި އެވެ.
ކުރިއަށް އޮތް ލޯކަލް ކައުންސިލް އިންތިހާބާއެކު، ރައީސް މުހައްމަދު މުއިއްޒުގެ ސަރުކާރުން ހުށަހަޅައިގެން ރައްޔިތުންގެ މަޖިލީހުގެ އިންތިހާބާއި ރިޔާސީ އިންތިހާބު އެއްކޮށް ބާއްވަން ފެނޭތޯ ރައްޔިތުންގެ ފެންނަ ނުފެންނަ ވޯޓެއް ނަގާނެ އެވެ.
ކ. މާފުށީގައި ބޭއްވި އެމްޑީޕީގެ ކެމްޕޭން ޖަލްސާއެއްގައި ވާހަކަ ދައްކަވަމުން ސޯލިހު ވިދާޅުވި ގޮތުގައި އެއީ ގޮތް ނޭނގޭ ގޮތެއްގައި ނަގަން އުޅޭ ވޯޓެކެވެ. އެ ވޯޓުގެ ސަބަބުން ނުކުންނާނެ ނަތީޖާ ރައްޔިތުންނަށް ބަޔާންކޮށްދޭން ޖެހޭ ކަމަށް ސޯލިހު ވިދާޅުވި އެވެ.
"ވެރިޔަކު ވެރިކަމަށް މި އަންނަނީ ރައްޔިތުންނަށް ވައުދުތަކެއް ވެ، މެނިފެސްޓޯއެއް އެކުލަވާލައިގެން. މިހާރު ވެރިކަމުގައި މި ހުންނެވި ރައީސް މުއިއްޒުގެ އެ ވައުދު ފޮތުގައި އެކަން އެބައޮތްތޯ؟،" ސޯލިހު ސުވާލު އުފެއްދެވި އެވެ.
ވެރިކަމަށް ވަޑައިގަތުމަށް ފަހު ޖެހިގެން އައި ރައްޔިތުންގެ މަޖިލީހުގެ އިންތިހާބުގެ ކެމްޕޭން ތެރޭގައި ވެސް މުއިއްޒު އެފަދަ ވާހަކައެއް ދައްކަވާފައި ނުވާކަން ސޯލިހު ފާހަގަކުރެއްވި އެވެ.
"ފަސް އަހަރު ދުވަހަށް އިންތިހާބު ކުރެއްވި ބޭފުޅުން މި ތިއްބެވީ. އޭގައި ދެއްކިތޯ މި އިންތިހާބު ކުރަނީ ހަތަރު އަހަރާއި ހަ މަސްދުވަހަށޭ. އެ ވާހަކައެއް ވެސް ނެތް. ހަމަ ހިތަށް، ވިސްނުމަށް އައީމައި އެކަން ކޮށްލަން ގެނެސްފައި އެ އޮތީ،" ސޯލިހު ވިދާޅުވި އެވެ.
ޖުމުލަ 60 މިލިއަން ރުފިޔާ ސަލާމަތް ކުރުމުގެ ނަމުގައި ދެ އިންތިހާބު އެއްކޮށްލުމަށް ރައްޔިތުން ނޭދޭ ކަމަށާއި އެކަމުގެ ސަބަބުން ލިބޭނެ ގެއްލުންތައް ބޮޑު ކަމަށް 25 އަހަރު މަޖިލީހުގެ މެންބަރުކަން ކުރެއްވި ސޯލިހު ވިދާޅުވި އެވެ.
ފެންނަ ނުފެންނަ ވޯޓުގައި އަހާނީ ކޮން ސުވާލެއް؟
މި ވޯޓުގައި ރައްޔިތުންނާ ކުރިމަތިލާނީ ގާނޫނުއަސާސީއަށް ގެންނަން ނިންމާފައިވާ އިސްލާހާ ގުޅޭ ސުވާލެކެވެ. އެއީ؛
"ރިޔާސީ އިންތިހާބާއި ރައްޔިތުންގެ މަޖިލީހުގެ އިންތިހާބު އެކުގައި ބޭއްވުމަށާއި ރައްޔިތުންގެ މަޖިލީހުގެ އުމުރު ގުނުމުގެ އުސޫލު ބަޔާންކުރުމަށްޓަކައި، ރައްޔިތުންގެ މަޖިލީހުން ފާސްކުރައްވާފައިވާ ގާނޫނުއަސާސީ އަށް 8 ވަނަ އިސްލާހު ގެނައުމުގެ ބިލު ރައީސުލްޖުމްހޫރިއްޔާ ތަސްދީގު ކުރައްވަން ފެނޭ ހެއްޔެވެ؟"
މި ވޯޓުގައި ރައްޔިތުންގެ ތާއިދު އޮތް ކަމަށް ފާސްވެއްޖެނަމަ، 2028 ވަނަ އަހަރުގެ ރިޔާސީ އިންތިހާބާއި މަޖިލިސް އިންތިހާބު ބާއްވާނީ އެކުއެކީގައެވެ. ފާހަގަކޮށްލެވޭ ގޮތުގައި، 2028 ގެ ރިޔާސީ އިންތިހާބުގައި ވާދަކުރައްވާނެކަން މިހާތަނަށް ރަސްމީކޮށް އިއުލާން ކުރައްވާފައިވާ ހަމައެކަނި ކެންޑިޑޭޓަކީ މިހާރުގެ ރައީސުލްޖުމްހޫރިއްޔާ ޑރ. މުހައްމަދު މުއިއްޒު އެވެ.
