އިޒްރޭލުގެ ޑިފެންސް މިނިސްޓަރުގެ ޔޯވް ގަލަންޓް މަގާމުން ވަކިކޮށް، އެ މަގާމަށް ފޮރިން މިނިސްޓަރު އިޒްރާއީލް ކަޓްޒް ހަމަޖައްސައިފި އެވެ.
ޑިފެންސް މިނިސްޓަރުގެ މަގާމުން ގަލަންޓް ވަކި ކުރުމަށްފަހު ބޮޑުވަޒީރު ނަތަންޔާހޫ ވިދާޅުވީ ބޮޑުވަޒީރާއި ޑިފެންސް މިނިސްޓަަރާއި ދެމެދު އިތުބާރު އޮންނަން ޖެހޭ ކަމަށާއި ދެބޭފުޅުންގެ މެދުގައި އުފެދުނު ހިޔާލު ތަފާތުވުންތަކާއެކު ކުރިއަށް ނުދެވުނީ ކަމަށެވެ.
"ޑިފެންސް މިނިސްޓަރަށް އޮތް އިތުބާރުގެ މައްސަލައާ ގުޅިގެން ހަނގުރާމައިގައި ކުރިއަށް ދެވޭނެ ކަމަށް ގަބޫލު ނުކުރެވުނު. އެއާއެކު އޭނާ މަގާމުން ވަނީ ވަކިކޮށްފައި،" ނަތަންޔާހޫ ވިދާޅުވި އެވެ.
ޑިފެންސް މިނިސްޓަރުގެ މަގާމަށް އައްޔަނުކުރި ކަޓްޒްއާ އެކު ކެބިނެޓަށް އޮތް އިތުބާރު ބޮޑުވެގެންދާނެ ކަމަށާއި އެ ނިންމުމަކީ މިވަގުތު އެންމެ ރަނގަޅު ނިންމުން ކަމަށް ވެސް އޭނާ ވިދާޅުވި އެވެ.
ގަލަންޓް މަގާމުން ވަކި ކުރަން ނިންމުމާ ގުޅިގެން އެކަމާ ދެކޮޅަށް އިޒްރޭލުގައި ދަނީ މުޒާހަރާ ކުރަމުންނެވެ.
ނަތަންޔާހޫ އާއި ގަލަންޓްއާ ދެމެދު ހިޔާލު ތަފާތުވުންތަކެއް އުފެދިފައިވާ ކަމަށް މީގެ ކުރިން ވެސް މީޑިއާތަކުން ދިޔައީ ރިޕޯޓް ކުރަމުންނެވެ.
ނަތަންޔާހޫ މިދިޔަ މަހު އެމެރިކާއަށް ވަޑައިގަތީ، ފުރަތަމަ ގަލަންޓް ވަޑައިގަންނަވަން ހަމަޖެހިފައި އޮއްވާ އެކަމަށް ފުރުސަތު ނުދީ ކަމަށް ވެސް ރިޕޯޓްތައް ދިޔައީ ބުނަމުންނެވެ. އަދި ފަހުން ވެސް ގަލަންޓް އެމެރިކާއަށް ދިޔުމަށް ހުއްދަ ދީފައި ނުވާ ކަމަށް ރިޕޯޓްތައް ބުންޏެވެ.
އިޒްރޭލުން ފަލަސްތީނުގެ ގާޒާގައި އަދި ލުބްނާނުގައި ހިންގަމުންދާ ގަތުލްއާންމުގައި އެތައް ހާސް ބަޔަކު ވަނީ މަރުވެފަ އެވެ. އޭގެ ތެރޭގައި ގިނައީ އަންހެނުންނާއި ކުޑަކުދިންނެވެ.
އިޒްރޭލުން ހިންގަމުންދާ ގަތުލްއާންމު ހުއްޓާލުމަށް ގިނަ ގައުމުތަކުން ގޮވާލަމުން ދިޔަ ނަމަވެސް، މިހާތަނަށް ވެސް ހަނގުރާ ހުއްޓާލުމަށް އެއްވެސް އެއްބަސްވުމެއް އިޒްރޭލުން ގަބޫލުކޮށްފައެއް ނުވެ އެވެ.
