ބޭރުގެ އެހީގައި، އަތޮޅުތަކުގައި ހުރި ސިފައިންގެ މަރުކަޒުތައް ތަރައްގީކޮށް، ހަތިޔާރު ހޯދަން މަސައްކަތް ކުރަމުންދާ ކަމަށް ރައީސް ޑރ. މުހައްމަދު މުއިއްޒު ރޭ ވިދާޅުވެއްޖެ އެވެ.
ނަސްރުގެ ދުވަސް ފާހަގަ ކުރަން ރޭ ދަރުބާރުގޭގައި ބޭއްވި ޖަލްސާގައި ރައީސް މުއިއްޒު ވިދާޅުވީ ރަށްރަށުގައި ހުރި ސިފައިންގެ މަރުކަޒުތައް ނުބެލެހެއްޓުމުގެ ސަބަބުން ވޭތުވެދިޔަ އަހަރުތަކުގައި ވަރަށް ބޮޑަށް ވީރާނާވެފައިވާ ކަމަށާއި އެ މަރުކަޒުތައް އެކުވެރި ދައުލަތްތަކުގެ އެހީތެރިކަމާ އެކު އަންނަ އަހަރު ހަދަން ފަށާނެ ކަމަށެވެ.
"މުޅި ރާއްޖޭގެ އެކި ކަންކޮޅުތަކުގައި ހުރި ސިފައިންގެ މަރުކަޒުތައް ހުރީ ފަހަކަށްއައިސް ނުބެލެހެއްޓުމުގެ ސަބަބުން، މި ވޭތުވެދިޔަ ހަތަރު ފަސް އަހަރެއްގެ ތެރޭގައި، އަމުދުން ނުބެލެހެއްޓުމުގެ ސަބަބުން، ވަރަށް ބޮޑަށް ވީރާނާވާން ފަށާފައި. އެކުވެރި ދައުލަތްތަކުގެ އެހީތެރިކަމަށް މިހާރުވާނީ އެދިފައި. އިރާދަކުރެއްވީތީ އެ ކަންކަން މި އަންނަ އަހަރުގެ ތެރޭގައި، މި ދެންނެވި ހުރިހާ މަރުކަޒުތައް، އެފަދަ ފަރާތްތަކުގެ އެހީތެރިކަމާ އެކީގައި ހެދިގެންދާނެ،" ރައީސް ވިދާޅުވި އެވެ.
ރައީސް މުއިއްޒު ވިދާޅުވީ ހަތިޔާރު ހޯދައި، އެކިއެކި އާލާތްތައް ހޯދަންޖެހޭ ކަމަށާއި މިހާރުވެސް އެކުވެރި ބައެއް ދައުލަތްތަކާ އެކުގައި މަސައްކަތްތަކެއް ފެށިފައިވާ ކަމަށެވެ. އަދި ދައުލަތުގެ ބަޖެޓުން ވެސް ސިފައިންނަށް އަހްނަން އަހަރު ހަތިޔާރާއި ގިނަ އަދަދެއްގެ އާލާތްތައް ހޯދޭނެ ކަމަށް ވެސް ވިދާޅުވި އެވެ.
ކިޔެވުމުގެ ފެންވަރު ދަށްވުމުގެ ސަބަބުން މަތީ ތައުލީމުގެ ފުރުސަތުތަކާއި ވަޒީފާތަކުން ބާކީވެފައި ތިބި ފުރާވަރު އުމުރުގެ ޒުވާނުން ސިފައިންނާއި ފުލުހުންގެ ހިދުމަތަށް މަޖުބޫރުކޮށް ވެއްދުމަށް އަންނަ އަހަރު ގައުމީ ހިދުމަތުގެ ޕްރޮގްރާމެއް ފަށަން ވެސް ވަނީ ނިންމައިފަ އެވެ.
އެ ޕްރޮގްރާމުގެ ތެރެއިން ސިފައިންގެ ހިދުމަތަށް އަހަރަކު 1،000 މީހުން އަދި ފުލުހަށް އަހަރަކު 250 މީހުން މަގުން، ކުރިއަށް އޮތް ހަތަރު އަހަރުގެ ތެރޭގައި 5،000 ޒުވާނުން ތަމްރީނުކުރާނެ ކަމަށް ރައީސް ވިދާޅުވި އެވެ.
