މެންޗެސްޓާ (ނޮވެމްބަރު 4) - މެންޗެސްޓާ ޔުނައިޓެޑްގައި އޭނާގެ މުސްތަގުބަލު އޮތްގޮތެއް މި ހަފްތާ ތެރޭގައި އޮޅުންފިލުވަންޖެހޭ ކަމަށް ޔުނައިޓެޑާ ވަގުތީ ގޮތުން ހަވާލުވެހުރި ކޯޗު ރޫޑް ވެން ނިސްޓަލްރޫއި ބުނެފި އެވެ.
އެރިކް ޓެން ހާގްގެ އެސިސްޓަންޓް ކޯޗަކަށް މި ސީޒަނުގައި ބަދަލުވި ނިސްޓަލްރޫއިއާ ޓީމުގެ ވަގުތީ ކޯޗުކަން ހަވާލުކުރީ ޓެން ހާގް ވަކިކުރުމުންނެވެ. ޔުނައިޓެޑުން އެންމެ ފަހުން ކުޅުނު ދެ މެޗުގައި ވެސް ވާދަކުރީ ނިސްޓަލްރޫއިގެ އިރުޝާދުގެ ދަށުންނެވެ. އެ ގޮތުން، ލީގު ކަޕްގައި ލެސްޓާ ސިޓީ އަތުން 5-2 އިން މޮޅުވިއިރު، ރޭ ލީގުގައި ކުޅުުނު މެޗުން ޗެލްސީއާ ވަނީ 1-1 އިން އެއްވަރުވެފަ އެވެ.
ނިސްޓަލްރޫއި ވަނީ މީގެ ކުރިން ޔުނައިޓެޑްގައި މަޑުކުރަން ބޭނުންވާ ކަމަށް ބުނެފަ އެވެ. އެކަމަކު، ޔުނައިޓެޑްގެ ކޯޗަކަށް ސްޕޯޓިން ލިޒްބަންގައި ހުރި ރުބެން އަމޮރިމް ހަމަޖައްސައި، މި މަހު 11 ވަނަ ދުވަހު އޭނާ ޓީމާ ހަވާލުވާނެ ކަމަށް ބުނުމުން، ނިސްޓަލްރޫއީ މި ވަނީ މުސްތަގުބަލާ ގުޅޭގޮތުން އަވަސް ނިންމުމެއް ނިންމަން ޖެހިފަ އެވެ.
"ވަރަށް އަވަހަށް ކްލަބާ އެކު ވާހަކަތައް ފަށާނަން. އަހަރެން އަދި އޭނަ (އަމޮރިމް)އާ ވާހަަކަ ނުދައްކަން،" ޗެލްސީއާ އެއްވަރުވި މެޗަށް ފަހު ނިސްޓަލްރޫއީ ބުންޏެވެ.
ރިޕޯޓްތައް ބުނާގޮތުން، އަމޮރިމް، ޔުނައިޓެޑަށް އަންނަނީ އޭނާގެ ކޯޗިން ޓީމާ އެކުގައި ކަމަށްވާތީވެ، ނިސްޓަލްރޫއީ އަށް ޔުނައިޓެޑްގައި މަޑުކުރެވޭނެ މާ ބޮޑު ފުރުސަތެއް ނެތެވެ. އެހެންވެ، އޭނާގެ ވިސްނުމަކީ ވެސް ޔުނައިޓެޑް ދޫކޮށް ޓީމެއްގެ ހެޑް ކޯޗުކަމާ ހަވާލުވުމެވެ.
ޔުނައިޓެޑަށް ފަސް އަހަރު ކުޅެދިން ނިސްޓަލްރޫއީ، މިދިޔަ ސީޒަނުގައި ހުރީ ޕީއެސްވީ އައިންދޯވަންގެ ކޯޗަކަށެވެ.
