ބަންގްލަދޭޝްއިން އެކްސްޕޯޓް ކުރާ ގާމެންޓްސް އިންޑިއާ މެދުވެރިކޮށް އެކްސްޕޯޓް ކުރުމުގެ ބަދަލުގައި ރާއްޖެ މެދުވެރިކޮށް އެހެން ގައުމުތަކަށް އެކްސްޕޯޓް ކުރަން ފަށައިފި އެވެ.
އިންޑިއާގެ ނޫސްތަކުން ބުނާ ގޮތުގައި ބަންގްލަދޭޝްއިން ކަނޑު މަގުން ރާއްޖެއަށް ގާމެންޓްސް ގެނައުމަށްފަހު، އެ އެއްޗެހި އެހެން ގައުމުތަކަށް އެކްސްޕޯޓް ކުރަނީ ވައިގެ މަގުންނެވެ. އޭގެ ތެރޭގައި އެޗް އެންޑް އެމް އަދި ޒާރާއަށް ފޮނުވާ ގާމަންޓްސް ވެސް ހިމެނޭ ކަމަށް ރިޕޯޓްތައް ބުނެ އެވެ.
އިންޑިއާގެ އެމްއެސްސީ އެޖެންސީގެ އެމްޑީ ދީޕަކް ތިވާރީ ވިދާޅުވީ މީގެ ކުރިން ބަންގްލަދޭޝްގެ މުދާތައް ބޭރު ކުރަނީ އިންޑިއާގެ އެއާޕޯޓްތައް މެދުވެރިކޮށް ކަމަށާއި ނަމަވެސް އެ ޝިޕްމަންޓްތައް މިހާރު ރީރޫޓް ކުރަމުންދަނީ އެހެން ސަރަހައްދުތަކުން ކަމަށެވެ.
"މި ބަދަލާ އެކު އިންޑިއާ އެއާޕޯޓްތަކަށް އަދި ޕޯޓުތަކަށް އެ މުދާތައް ފޮނުވައިގެން ލިބެމުންދިޔަ އާމްދަނީ ދަށްވެގެންދާނެ،" އޭނާ ވިދާޅުވި އެވެ.
ރިޕޯޓްތައް ބުނާގޮތުން ބަންގްލަދޭޝްއިން މުދާ ބޭރު ކުރުމުގައި ނިންމި ނިންމުމާ ގުޅިގެން އެ ގައުމާއި އިންޑިއާއާ ދެމެދު އޮތް ވިޔަފާރީގެ ގުޅުމަށް ހީނަރުކަން އަންނާނެ އެވެ.
އިންޑިއާ މެދުވެރިކޮށް މުދާތައް ބޭރު ކުރުން ބަންގްލަދޭޝް އިން މެދުކަނޑާލައި، ރާއްޖެ މެދުވެރިކޮށް މުދާ ބޭރު ކުރަން ފެށީ އިންޑިއާއިން މުދާ ބޭރު ކުރަން ނަގާ ވަގުތު ދިގުވުމުންނެވެ.
ބަންގްލަދޭޝްގެ އެކްސްޕޯޓްކުރާ މުދަލުގެ ތެރެއިން 80 ޕަސަންޓަކީ ގާމެންޓްސް އެވެ. އަދި އޭގެ ތެރެއިން 13 ޕަސަންޓު އެ ގައުމުގެ ޖީޑީޕީ ހިއްސާ ކުރެ އެވެ.
