ދަރިމައިވުމުގައި ދަތިތަކާ ކުތިމަތިލާންޖެހޭ ފަރާތްތަކަށް ދޭ އައިވީއެފްގެ ފަރުވާ، އާސަންދަ ސްކީމުގެ ދަށުން ހޯދުމަށް ދެވަނަ ފަހަރަށް ހުޅުވައިލި ފުރުސަތުގައި ހުށަހެޅި މީހުންގެ ތެރެއިން ޝަރުތު ހަމަވި 63 މީހުން ލިސްޓު ނޭޝަނަލް ސޯޝަލް ޕްރޮޓެކްޝަން އޭޖެންސީ (އެންސްޕާ) އިން މިއަދު އިއުލާނު ކޮށްފި އެވެ.
އެންސްޕާއިން މިއަދު ގެޒެޓުކުރި އިއުލާނާއެކު އާސަންދައިގެ ދަށުން އައިވީއެފްގެ ފަރުވާ ހޯދުމަށް އެދި ހުށަހެޅި ފަރާތްތަކުގެ ލިސްޓު ވެސް އާންމުކުރި އެވެ. އެ ލިސްޓުގައި ޝަރުތު ހަމަވި މީހުންނާއި ޝަރުތު ހަމަ ނުވާ މީހުން، ޝަރުތު ހަމަނުވި ސަބަބާއެކު ބަޔާން ކޮށްފައިވެ އެވެ.
މިއަދު އާންމުކުރި ލިސްޓަށް ޝަކުވާ ހުށަހެޅުމުގެ ފުރުސަތު ވެސް އެންސްޕާއިން ވަނީ ހުޅުވާލައިފަ އެވެ. އެގޮތުން އާސަންދައިގެ ދަށުން އައިވީއެފްގެ ފަރުވާ ލިބޭ މީހުންގެ ލިސްޓާ މެދު ޝަކުވާއެއް އޮތް ނަމަ ނޮވެމްބަރު 10، ގެ މެންދުރު 2:00 ގެ ކުރިން complaints@nspa.gov.mv އަށް އީމެއިލް ކުރުމަށް އެ އޭޖެންސީން އެދިފައިވެ އެވެ.
ޝަކުވާތަކަށް ބެލުމަށްފަހު މިހާރު އިއުލާނު ކޮށްފައިވާ ލިސްޓަށް ބަދަލެއް ގެންނަޖެހޭ ކަމަށް ފެންނަ ނަމަ، އެ ބަދަލެއް ގެނައުމަށްފަހު ނޮވެމްބަރު 15، ގައި ދާއިމީ ލިސްޓު އިއުލާނު ކުރާނެ ކަމަށް ވެސް އެންސްޕާގެ އިއުލާނުގައި ބުނެފައިވެ އެވެ.
ދެވަނަ ބުރުގައި ޝަރުތު ހަމަވި މީހުންނަށް ފަރުވާ ކުރިއަށް ދާނެ ގޮތުގެ ޕްލޭން ނޮވެމްބަރު 30 ގެ ކުރިން ހިއްސާ ކުރާނެ ކަމަށް މިއަދު ކުރި އިއުލާނުގައި ބުނެފައިވެ އެވެ.
ސަރުކާރުން ނިންމާފައި ވަނީ މި އާސަންދައިގެ ދަށުން އައިވީއެފްގެ ފަރުވާ 100 ދެމަފިރިއަކަށް ދިނުމަށެވެ. އެގޮތުން މިދިޔަ ޖުލައި މަހު ވެސް 37 މީހަކަށް އެ ފުރުސަތު އެންސްޕާއިން ދިނެވެ.
