ދަރިޔަކު ވިހާއިރު މައިންގެ ގައިގައި އަޅާ ވޭން އެހެން މީހުންނަށް ނޭނގޭހެން، މަޖިލިސް މެންބަރުކަން ކުރުމުގެ ބުރަ އެހެން މީހުންނަށް ނޭނގޭނެ ކަމަށް ވިދާޅުވެ ވެރިކަން ކުރާ ޕީއެންސީގެ ޕީޖީ ލީޑަރު، އިބްރާހިމް ފަލާހު އިއްޔެ މަޖިލީހުގައި ދެއްކެވި ވާހަކައާ ގުޅިގެން ގިނަބައެއް ނުރުހުމާއި ފާޑުކިޔުން އޭނާއަށް އަމާޒުވެއްޖެ އެވެ.
އިއްޔެ މަޖިލީހުގެ ޖަލްސާގައި ވާހަކަދައްކަވަމުން ފަލާހު ވިދާޅުވީ މަޖިލިސް މެންބަރުންނަށް ކުރިމަތިވާ ޕްރެޝަރާއި ދިމާވާ ދަތިތައް އަދި ކުރަންޖެހޭ ބުރަ މަސައްކަތްތައް އެކަން ނުކުރާ މީހުންނަށް ނޭނގޭނެ ކަމަށެވެ. އަދި ދުވާލުގެ ހަތަރު ދަން މަޖިލިސް މެންބަރުން ހޭދަކުރައްވަނީ މަސައްކަތުގައި ކަމަށް ވެސް އޭނާ ވިދާޅުވި އެވެ.
"މިއީ ހަމަ މަންމައަކު ދަރިޔަކު ވިހާއިރުގައި، އެ މަންމައަކަށް އެ އަޅާ ވޭން އެހެން މީހަކަށް، އެކަން ނުވާ މީހަކަށް ނުކުރާ މީހަކަށް ނުވަތަ އެ އިހުސާސް ނުކުރާ މީހަކަށް ނޭނގޭ ފަދައިން ހަމަ ވާވަރު ކަމެއް ރައްޔިތުންގެ މަޖިލިސް މެންބަރުކަން ކުރުމަކީ،" ފަލާހު ވިދާޅުވި އެވެ.
މަޖިލިސް މެންބަރުން ހަމައެކަނި ކުރާ މަސައްކަތަކީ ތަޅުމުން އެ ފެންނަ މަންޒަރު ނޫން ކަމަށާއި އޭގެ އިތުރުން ކުރާ ކަންކަން އިހުސާސް ކޮށްލަން އާންމުންނަށާއި މެންބަރުކަން ނުކުރާ މީހުންނަށް އުނދަގޫ ވާނެ ކަމަށް ވެސް ފަލާހު ވިދާޅުވި އެވެ.
ފަލާހުގެ އެ ވާހަކަތަކާ ގުޅިގެން ސޯޝަލްމީޑިއާގައި ވަރަށް ގިނަ ބަޔަކު ނުރުހުން ފާޅުކޮށް ފާޑުކިޔާފައިވެ އެވެ. އެގޮތުން ފާޑުކީ ބައެއް މީހުން ބުނީ މަޔަކު ގައިގައި އަޅާ ވޭނާއި މަޖިލިސް މެންބަރުކަން ކުރުމާ އެއީ އަޅާ ކިޔާވަރަށް ވުރެ ބޮޑުކަމެއް ކަމަށެވެ.
"ދަރިއެއް ވިހާއިރު މައިމީހާ [ގައިގައި] އަޅާ ވޭނުގެ ވާހަކަ ގުރުއާނުގައި ވެސް އިނދޭ ބުނެފައި، ގޮނޑީގައި އިނދެގެން އަޅާ ވޭނެއްގެ ވާހަކަ ނުއިނދޭ އެކަމަކު. މިސާލު ޖަހާއިރު ވެސް ތަންކޮޅެއް ރަނގަޅު ގޮތަކަށް ކަމާބެހޭ މިސާލު ޖައްސަވާ،" މުހައްމަދު ފާރިޝްގެ ނަމުގައި ފޭސްބުކް އެކައުންޓެއް ހިންގާ މީހަކު ބުނެފައިވެ އެވެ.
ފަލާހުއަށް ފާޑުކީ އެހެން މީހަކު ބުނީ ދަރިއަކު ވިހާއިރު މައެއްގެ ގައިގައި އަޅާ ވޭނުގެ ކުޑަ މިންވަރެއް އެނގޭ ނަމަވެސް، މަޖިލިސް މެންބަރުކަމާ ގުޅުވާފައި އެފަދަ ވާހަކައެއް ދައްކަން އަނގަ ހުޅުވައިލަން ވެސް ނުކެރުނީސް ކަމަށެވެ. ފަލާހު ފަދަ ވިސްނުން ކޮށި މީހުން މަޖިލީހަށް އިންތިހާބުވެފައި ތިބޭތީ ހިތާމަކުރާ ކަމަށް ވެސް އޭނާ ބުނެފައިވެ އެވެ.
"ކިހާބޮޑު ވަބާއެއް މިއޮތީ ލައްވާލާފައި، ދަރިއަކަށް ބަލިވެ އިނީއްސުރެ ވިހަންވަންދެން އަންހެނާ އެ ކަޑައްތު ކުރާ ކަންކަން ހިތަށް ވެސް ކަލޭމެންނަށް ނުގެނެވޭނެ، އަދި ދަރިއެއް ވިހެއުމުގައި މައިމީހާ އެ އުފުލާ ވޭން ސިކުނޑިއަށް ވެސް ގެންނަން ނޭނގޭނެ. ދެން ކޯއްޗެކޭތަ ގޮވައި މި ނަގަނީ؟ ކިހިނެއްތަ މެންބަރުކަން ކުރުމުގެ ބުރައޭ ކިޔާފައި އަންހެނާ ވިހެއުމުގައި އެ ކުރިމަތިލާ ކަންކަމާ އެއްވަރު ކުރެވޭނީ؟" އައިމިނަތު އަލީގެ ނަމުގައި ފޭސްބުކްގައި ކޮމެންޓު ކުރި މީހަކު ބުނެފައިވެ އެވެ.
"އަންހެނުންނަށް ވެސް ހުތުރު އަރުވަން އުޅޭ މީހެއް. މީނަ އުފަންކުރި މީހާ ގާތު އަހާލަން މަށަށްް ފެނޭ، ޑަންލޮޕަށްވުރެ ވަރުގަދަ އެއްޗަކުން އަނގަ ތަތްކުރަންވެއްޖެ ކަންނޭނގެ މި މީހާގެ، މި ނޫން އަޑެއް ނުއިވޭ. މިއީ ކޮންތަނަކުން ފައިދާ ކޮށްގެން އުޅޭ މީހެއްތަ؟"
ފަލާހުގެ ވާހަކައާ ގުޅިގެން ހިތްހަމަނުޖެހުން ފާޅުކުރި ބައެއް މީހުން ވަނީ މަޖިލިސް މެންބަރުންނަކީ ސިޔާސީ އަވައިގައި ޖެހިފައި ތިބޭ ވަގުންތަކެއް ގޮތަށް ވެސް ސިފަކޮށްފަ އެވެ. އެހެންކަމުން އެފަދަ މަސައްކަތެއް ކުރުމަކީ މަޔަކު ދަރިއެއް ވިހެއުމާ އެއްފަދަ ކުރެވޭނެ ކަމެއް ނޫން ކަމަށް ގިނަ މީހުން ބުނެފައިވެ އެވެ.
އޭގެއިތުރުން ފަލާހު ދެއްކެވި ވާހަކައާ ގުޅިގެން ބައެއް މީހުން އޭނާއަށް މަލާމާތް ވެސް ރައްދު ކޮށްފައިވެ އެވެ. ފަލާހުއަށް ޖޯކުޖެހި ބައެއް މީހުން ބުނެފައި ވަނީ އެފަދަ ވާހަކަތައް ފަލާހު ދައްކަވަނީ މަޖިލިސް މެންބަރުކަން ކުރުމުގެ އުރައްޕެއް އޭނާގެ ކިބައިގައި ނެތީމާ ކަމަށެވެ.
"ތަންދޮރު ނުދަންނަ މީހުން ބޮޑެތި ކަންތައްތަކާ ހަވާލުވީމާ ހުރިހާ ކަމެއް ވެސް ވާނީ ބުރައަކަށް،" ރިޔާސާ ފާތިމަތުގެ ނަމުގައި ފޭސްބުކްގައި ކޮމެންޓު ކުރި މީހަކު ބުނެފައިވެ އެވެ.
ފަލާހު ދެއްކެވި ވާހަކައަށް އެތައް ބަޔަކު ނުރުހުން ފާޅުކޮށް ސޯޝަލްމީޑިއާގައި ވާހަކަދައްކާފައިވާއިރު، މިހައިތަނަށް ދެއްކެވުނު ވާހަކައާ ގުޅިގެން ފަލާހު މާފަށް އެދިފައެެއް ނުވެ އެވެ. އަދި ވެރިކަން ކުރާ ޕީއެންސީން ވެސް އެކަމާ ބެހޭގޮތުން އެއްވެސް އެޗެއް ބުނެފައެއް ނުވެ އެވެ.
