އެންމެ ހަތަރު މަސްދުވަސް ތެރޭގައި ފަރުމާކޮށް ބިނާކޮށް އިމާރާތް ނިންމައިލެވޭ ޕްރީކާސްޓު މޮޑިއުލާ ހައުސިން އީއެލްއެސް ލިޔޯއިން ރާއްޖެއަށް ތައާރަފުކޮށްފި އެވެ.
އެ ޔުނިޓުތައް ތައާރަފު ކުރީ ކ. ހިންމަފުށީގައި އޮތް ހާއްސަ ރަސްމިއްޔާތެއްގަ އެވެ.
ޕްރީކާސްޓު މޮޑިއުލާ ހައުސިން ޔުނިޓުތަކަކީ ހިންމަފުށީގައި ހުންނަ އީއެލްއެސް ލިޔޯ ކުންފުނީގެ ކާރުހާނާގައި ތައްޔާރު ކުރާ ހެބިޓެކް ބްލޮކްސްއިން ރާވާ ޔުނިޓުތަކެކެވެ. ބޭނުން ޑިޒައިނަކަށް އެ ޔުނިޓުތައް ތައްޔާރު ކޮށްދީ ރާވައި ދެނީ އެކުންފުނިންނެވެ.
އީއެލްއެސް ލިޔޯ އަކީ ރާއްޖޭގައި އެންމެ ފުޅާ ދާއިރާއެއްގައި ލޮޖިސްޓިކްސް ވިޔަފާރި ކުރާ ލިޔޯ ޓްރޭޑިންގެ ހިއްސާ އޮންނަ ކުންފުންޏެކެވެ. އެ ކުންފުނިން ބުނީ މި ހައުސިން ސޮލިއުޝަނަކީ އަމިއްލަ ގެ އިމާރާތް ކުރުމުގެ އިތުރުން ގެސްޓު ހައުސް އާއި ހޯމްސްޓޭ ފަދަ ފަތުރުވެރިކަމަށް ޝައުގުވެރިވާ ފަރާތްތަކަށް ވެސް ލިބިގެންދާ އަގުހެޔޮ ހައްލެއް ކަމަށެވެ.
"ހިންމަފުށީގައި ގާއިމު ކުރެވިފައިވާ އަޅުގަނޑުމެންގެ އެންމެ ޒަމާނީ ޓެކްނޮލޮޖީ ބޭނުން ކުރާ ފެކްޓަރީގައި އުފައްދައި އިންސްޓޯލް ކުރެވޭ އިންގިލާބީ ހައުސިން ހައްލު، ދިވެހިރާއްޖޭގެ މޫސުމާއި ތިމާވެށްޓަސް އެންމެ އެކަށީގެންވާ އިގުތިސާދީ ގޮތުން ފައިދާ ހުރި އަދި ދިވެހި މުޖުތަމައުގެ ދިރިއުޅުމުގެ ވައްޓަފާޅިއާ ގުޅޭ ހައުސިން އޮޕްޝަނެއް، ތިމާވެށްޓާ ރައްޓެހި ހަކަތަ ޒިންމާދާރު ގޮތެއްގައި ބޭނުން ކުރެވޭ އަދި ދެމެހެއްޓެިވި ތަރައްގީގެ އަމާޒުތަކާ އެއްގޮތް ވާގޮތުގެ މަތިން ފަރުމާ ކޮށްފައިވާ ނަމޫނާ މަޝްރޫއެއް،" ލިޔޯ ކުންފުނީގެ މެނޭޖިން ޑިރެކްޓަރު، އަބްދުﷲ ސަވާދު ވިދާޅުވި އެވެ.
ހެބިޓެކް ބްލޮކްސް ސިސްޓަމް ބޭނުން ކޮށްގެން ރާވާ ގެއެއްގެ އިންޓީރިއާ ޑިޒައިނިން ހަދާއިރު، ފާރުތަކުގައި ޕްލާސްޓަރިންގެ އެއްވެސް މަސައްކަތެއް ކުރާކަށް ނުޖެހޭނެ އެވެ. އަދި މި ސިސްޓަމް ބޭނުން ކޮށްގެން ރާވާފައި ހުންނަ ގެއެއްގެ ތަނބުތަކާއި ބީމްތައް ފެންނާކަށް ނުހުންނާނެ އެވެ. އެހެންކަމުން ފަރުނީޗަރު އެތުރުމާއި އެހެނިހެން ބޭނުންތަކަށް އެތެރޭގައި އޮންނަ ޖާގަ ވަރަށް ބޮޑުވާނެ އެވެ.
އޭގެ އިތުރުން މި ސިސްޓަމަކީ ހަރަދު ކުޑަވުމާއެކު މަސައްކަތް ވަރަށް ބޮޑަށް އަވަސް ވެގެންދާ ގޮތަށް ފަރުމާ ކޮށްފައިވާ ސިސްޓަމެކެވެ. ހެބިޓެކް ބްލޮކްސް ސިސްޓަމް ބޭނުން ކޮށްގެން ތިން ބުރީގެ އިމާރާތް ކުރެވެ އެވެ.
