އިލެކްޝަންސް ކޮމިޝަން (އީސީ) އާއި އެންޓި ކޮރަޕްޝަން ކޮމިޝަން (އޭސީސީ) ގެ މައްޗަށް ރައީސުލްޖުމްހޫރިއްޔާއަށް ނުފޫޒު ފޯރުވޭ ގޮތަށް, އެ ދެ ކޮމިޝަނުގެ ރައީސް އާއި ނައިބު ރައީސް އައްޔަނު ކުރުމުގެ ބާރު ދިނުމަށް ގާނޫނަށް ބަދަލުގެންނަން ސަރުކާރުން ކުރަމުންދާ މަސައްކަތް ހުއްޓާލަން އިދިކޮޅު އެމްޑީޕީން ގޮވާލައިފި އެވެ.
ރާއްޖޭގައި މިހާރު އޮތް އެންމެ މުހިންމު ދެ މިނިވަން މުއައްސަސާ އަށް ސީދާ ރައީސް ގެ ބާރު ފޯރުވޭގޮތަށް ގާނޫނަށް އިސްލާހު ގެނައުމަށް ސަރުކާރުގެ ފަރާތުން މަޖިލީހަށް ދެ ބިލެއް ފޮނުވީ އިއްޔެ އެވެ. އެ ބިލުގެ ފުރަތަމަ ކިޔުން މިއަދު އިއްވި އެވެ.
އެކަމާ ގުޅިގެން އެމްޑީޕީން މިއަދު ނެރުނު ބަޔާނެއްގައި ބުނީ، އެ ބިލްތަކަކީ ގާނޫނުއަސާސީން އެކުލަވާލާފައިވާ ފާރަވެރިވުމުގެ ނިޒާމު ފުނޑާލާ، ބާރުތައް އެއްކޮށްލުމަށް މި ސަރުކާރުން ކުރަމުންދާ ސިލްސިލާ މަސައްކަތްތަކަށް އިތުރުވި ބޮޅެއް ކަމަށާއި މިކަން ކުށްވެރި ކުރާ ކަމަށެވެ.
އީސީ އަދި އޭސީސީ އަކީ މިނިވަން މުސްތަގިއްލު ދެ ކޮމިޝަން ކަން ގާނޫނު އަސާސީން ކަނޑައަޅާފަ އޮންނަ އޮތުން މި އިސްލާހާއެކު ނިމިގެންދާނެ ކަމަށްވެސް އެމްޑީޕީން ސިފަކޮށްފައިވެ އެވެ.
"އެ ކޮމިޝަންތަކުގެ އިދާރީ ހިންގުމުގެ ހުރިހާ ޒިންމާއެއް އުފުލާ މީހުންނަކީ ރައީސުލްޖުމްހޫރިއްޔާ ކަނޑައަޅާ ބަޔަކަށް ހެދުމަކީ ވެރިކަން ހިންގާ ބާރުގެ ސީދާ ނުފޫޒު އެކޮމިޝަންތަކުގެ މައްޗަށް ފޯރުވުމުގެ ނާތަހުޒީބު އަމަލެއް. އަދި އެއީ ޑިމޮކްރެސީގައި ދިވެހިން މިކުރާ ދަތުރުގައި، އެތައް ބައެއްގެ މިންނެތް މަސައްކަތުން އެކަށައެޅި ނިޒާމުގައި ފަހަތަށް އެޅޭ ފިޔަވަޅެއް،" އެމްޑީޕީގެ ބަޔާނުގައި ބުނެފައިވެ އެވެ.
މި ދެ ކޮމިޝަނުގެ ވެރިންނަކީ އެ މުއައްސަސާތަކުގެ އެންމެ އިސް ދައުރެއް އަދާކުރަން ޖެހޭ ފަރާތްތައް ކަމަށާއި ކޮމިޝަނުގެ މެންބަރުންގެ މެދުގައި ނަގާ ވޯޓުން އެ މަގާމުތަކަށް ބޭފުޅުން އައްޔަނު ކުރެވޭ ގޮތަށް އޮތް މާއްދާތައް ބަދަލުކުރަނީ ސަރުކާރުން މި ކޮމިޝަންތަކުގެ މިނިވަންކަމާއި މުސްތަގިއްލުކަން ނަގާލައި ސިޔާސީ ނުފޫޒު ފޯރުވުމަށް ކަމަށް ވެސް އިދިކޮޅުން ބުންޏެވެ.
މިއީ ސަރުކާރުން މަޖިލީހުގައި އޮތް ސުޕަ މެޖޯރިޓީގެ ނަހަމަ ބޭނުން ހިފާ، ރައީސް ޑރ. މުހައްމަދު މުއިއްޒަށް މުޅި ދައުލަތުގެ ހުރިހާ ބާރަކަށް ނުފޫޒު ފޯރުވޭ ގޮތަށް ރައީސް އޮފީހަށް ހުރިހާ ބާރެއް ޖަމާކުރުމަށް ކުރަމުންދާ މަސައްކަތެއް ކަމަށާއި އެކަން ވަގުތުން ވަގުތައް ހުއްޓާލަން ޖެހޭ ކަމަށްވެސް އެމްޑީޕީން ގޮވާލާފައިވެ އެވެ.
ސަރުކާރުން ހުށަހަޅާފައިވާ އިސްލާހުތަކުގައި ދެ ގާނޫނު ވެސް ބަދަލުކުރަނީ ކޮމިޝަނުގެ މެންބަރުންގެ ތެރެއިން ރައީސާއި ނައިބު ރައީސް ރައީސުލްޖުމްހޫރިއްޔާ އައްޔަނު ކުރާ ގޮތަށެވެ. އެ މަގާމުތަކަށް އައްޔަނު ކުރާ މީހުންގެ ނަން ރައްޔިތުންގެ މަޖިލީހަށް ހުށަހަޅައި ފާސްކުރަން ޖެހޭނެ ކަމަށް ވެސް ދެ ބިލުގައި ބަޔާންކޮށްފައިވެ އެވެ.
އޭގެ އިތުރުން މަގާމުން އިސްތިއުފާ ހުށަހަަޅަން ޖެހެނީ ވެސް ރައީސުލްޖުމްހޫރިއްޔާއަށް ކަމަށް ހުށަހަޅާފައިވާ ދެ ބިލުގައި ވެސް ބަޔާންކޮށްފައިވެ އެވެ.
