އިޒްރޭލުން އިރާނުގެ އަސްކަރީ ތަންތަނަށް އަމާޒުކޮށް ރޭ ދިން ހަމަލާގައި ހަތަރު ސިފައިން މަރުވެފައިވާ ކަމަށް އިރާނުން ބުނެފި އެވެ.
އިރާނުން ބުނީ އެ ހަތަރު ސިފައިންނަކީ އިރާނުގެ އެއާ ޑިފެންސްގައި މަސައްކަތް ކުރަމުންދިޔަ ސިފައިން ކަމަށާއި ރާޑާ ސިސްޓަމްތަކަށް ވެސް ގެއްލުންތަކެއް ލިބުނު ކަމަށެވެ.
އިޒްރޭލުން އިރާނަށް ދިން ހަމަލާތަކުގެ ތެރެއިން ގިނަ ހަމަލާތައް ވަނީ ނާކާމިޔާބުވެފަ އެވެ. ބައެއް ތަންތަނަށް އެކަމަކު ހަމަލާތައް އަމާޒުވި އެވެ.
ރިޕޯޓްތައް ބުނާ ގޮތުން އިޒްރޭލުން ހަމަލާ ދީފައި ވަނީ އިރާނުގެ ތިން ޕްރޮވިންސެއްގައި ހިމެނޭ 20 ތަނަކަށެވެ.
މިއީ އިޒްރޭލުން ހާމަކަން ބޮޑު ގޮތެއްގައި އިރާނަށް ހަމަލާދިން ފުރަތަމަ ފަހަރެވެ.
އިޒްރޭލުން އިރާނަށް ހަމަލާ ދިނީ އޮކްޓޯބަރު 1، ގައި އިރާނުން އިޒްރޭލަށް ފޮނުވާލި 200 މިސައިލުގެ ރައްދުގަ އެވެ. އެ ހަމަލާގައި އިޒްރޭލުގެ އަސްކަރީ ގިނަ ތަންތަނަށް ބޮޑެތި ގެއްލުންތަކެއްވި އެވެ.
އިރާނުން ވަނީ އިޒްރޭލުގެ ހަމަލާތަކުގެ ރައްދުގައި ހަމަލާ ދޭނެ ކަމުގެ ޔަގީންކަން ދީފަ އެވެ. އިޒްރޭލުން ވަނީ އިރާނުން ހަމަލާ ނުދިނުމަށް ވެސް އިންޒާރު ދީފަ އެވެ.
މެދުއިރުމަތީގެ ހާލަތު ދުވަހަކަށްވުރެ ދުވަހެއް ގޯސްވަމުންދާއިރު އިޒްރޭލުން ދަނީ މެދުނުކެނޑި ފަލަސްތީނުގެ ގާޒާ އާއި ލުބްނާނަށް ވަރުގަދަ ހަމަލާތައް ދެމުންނެވެ. އެ ހަމަލާތަކުގައި އެތައް ހާސް ބަޔަކު ވަނީ މަރުވެފަ އެވެ.
އިޒްރޭލުން ހިންގާ ގަތުލްއާންމު ހުއްޓާލަން ގިނަ ގައުމުތަކުން ގޮވާލި ނަމަވެސް، އެ ގޮވާލުންތަކަށް އިޒްރޭލުން އިޖާބަ ދީފައެއް ނުވެ އެވެ. އެމެރިކާ އާއި އިނގިރޭސިވިލާތް އަދި ޖަރުމަން ފަދަ ބޮޑެތި ގައުމުތަކުން ދަނީ އިޒްރެލަށް ވާގިވެރިވަމުންނެވެ.
