ކޮމަންވެލްތު ގައުމުތަކުގެ އިސްވެރިންނަށް އިނގިރޭސި ރަސްގެފާނު، ޗާލްސް ދެއްވި ފަރިއްކޮޅެއްގެ ތެރެއިން ނައިބުރައީސް ހުސެއިން މުހައްމަދު ލަތީފް ރަސްގެފާނާ ބައްދަލު ކުރައްވައި، ރާއްޖެއަށް ވަޑައިގަތުމަށް ދައުވަތު ދެއްވައިފި އެވެ.
ނައިބު ރައީސް "އެކްސް" ގައި ކުރެއްވި ޕޯސްޓެއްގައި ވިދާޅުވީ ކިންގް ޗާލްސްއާ ބައްދަލު ކުރައްވަން ފުރުސަތު ލިބުމަކީ ޝަރަފެއް ކަމަށެވެ. ރަސްގެފާނު ރާއްޖެ ވަޑައިގަތުމަށް ދައުވަރު އެރުވީ ރައީސް މުހައްމދު މުއިއްޒުގެ ފަރާތްޕުޅުން ކަމަށް ވެސް ނައިބު ރައީސް ވިދާޅުވި އެވެ.
ރައީސް މުއިއްޒު ވެސް ވަނީ ޑިސެމްބަރު، 2024، ގައި ދުބާއީގައި ބޭއްވި ކޮޕް-28 ގެ ހަވާސާގައި ރަސްގެފާނު ޗާލްސްއާ ބައްދަލު ކުރައްވައިފަ އެވެ. އެ ބައްދަލުކުރެއްވުމުގައި ދެބޭފުޅުން ވަނީ ރާއްޖެ އާއި އިނގިރޭސިވިލާތާ ދެމެދުގައިވާ ޒަމާންވީ ގުޅުމުގެ މައްޗަށް އަލިއަޅުއްވާލައްވައި، މި ގުޅުން އިތުރަށް ބަދަހިކުރެއްވުމާ ގުޅޭ ގޮތުން ވާހަކަ ދައްކަވައިފަ އެވެ.
ކޮމަންވެލްތުގެ އިސްވެރިންގެ މެދުގައި ކޮންމެ ދެ އަހަރަކުން ބާއްވާ ބައްދަލުވުމަށް ނައިބު ރައީސް ހުސެއިން މުހައްމަދު ލަތީފް ސަމޯއާއަށް ވަޑައިގެންނެވީ މަތީ ފަންތީގެ ވަފުދަކާ އެކުގަ އެވެ.
އާންމުކޮށް ކޮމަންވެލްތުގެ ހުރިހާ ގައުމެއްގެ ވެސް އިސްވެރިން ބައިވެރިވެވަޑައިގަންނަވާ އެ ބައްދަލުވުމުގައި މީގެ ކުރިން ރާއްޖޭގެ ފަރާތުން ވެސް އާންމުކޮށް ބައިވެރިވެވަޑައިގެންފައި ވަނީ ރައީސުންނެވެ.
