ރާއްޖޭގެ ހޭންޑްބޯލް އެސޯސިއޭޝަން، ހޭންޑްބޯލް މޯލްޑިވްސްގެ މައްސަލައެއް އެންޓި ކޮރަޕްޝަން ކޮމިޝަން (އޭސީސީ) އަށް ހުށަހަޅައިފި އެވެ.
އެ ގޮތުން، އާންމު ފަރާތަކުން، އޭސީސީ އަށް މައްސަލަ ހުށަހަޅާފައި މި ވަނީ ދާދި ފަހުން ހިޔާނާތުގެ މައްސަލައެއްގައި މަގާމުން ވަކިކުރި ހޭންޑްބޯލް އެސޯސިއޭޝަންގެ ޖެނެރަލް ސެކްރެޓަރީ، އަބްދުﷲ އަންވަރު އާއި އެސޯސިއޭޝަންގެ ރައީސް، އަހުމަދު މުޖުތަބާ (މުޖޭ)އާ ގުޅޭ މައްސަލައެކެވެ.
އެނގިފައިވާ ގޮތުގައި، އަންވަރާ ގުޅޭގޮތުން ތުހުމަތުކުރެވޭ ހިޔާނާތުގެ މައްސަލައިގައި، އެސޯސިއޭޝަނުން ފިޔަވަޅު އަޅާފައިވަނީ ހެކި ވެސް ހޯދުމަށް ފަހު އެވެ. އަދި އެސޯސިއޭޝަންގެ އިތުބާރު ހިފޭ މަގާމެއްގައި ހުރެ، އެ ފަދަ އަމަލެއް ކޮށްފައިވާތީ، ވަގުތުން ވަގުތަށް ފިޔަވަޅު އަޅައި، އެސޯސިއޭޝަން ހިންގުމުގައި ކަންކަން ރަނގަޅު ކުރަން އިސްނެގީ އެވެ.
އެ ގޮތުން، ވަކިކުރި ހޭންޑްބޯލް މޯލްޑިވްސްގެ ޖެނެރަލް ސެކްރެޓަރީ އަންވަރުގެ 500،000 އެއްހާ ރުފިޔާ އަށް ހިޔާނަތްތެރިވި މި މައްސަލަ އެސޯސިއޭޝަންގެ ޑިސިޕްލިނަރީ ކޮމިޓީން އަންނަނީ ބަލަމުންނެވެ. އަދި މި ކަމަށް އަންވަރުގެ އެއްބާރުލުން ލިބޭ ކަމުގެ މައުލޫމާތު ވެސް ލިބިފައިވެ އެވެ.
ހޭންޑްބޯލް މޯލްޑިވްސްގެ ރައީސް، މުޖުތަބާގެ މައްޗަށް އެޑްވާންސަށް ގިނަ މަސްތަކެއްގެ މުސާރަ އަށް ވާ ފައިސާ ނެގި ކަމުގެ ތުހުމަތު ކުރެވޭއިރު، މީޑިއާ އަށް ދިން އިންޓަވިއުއެއްގައި އޭނާ ވަނީ އެ ވާހަކަ ދޮގުކޮށްފަ އެވެ.
ހޭންޑްބޯލް މޯލްޑިވްސް އަކީ ސަރުކާރުން ދޭ މޯލްޑިވްސް ސްޕޯޓްސް އެވޯޑްސްގައި މި ފަހަރު އެންމެ މޮޅު އެސޯސިއޭޝަންގެ އެވޯޑް ލިބުނު އެސޯސިއޭޝަން އެވެ. މީގެ ކުރިން، މޯލްޑިވްސް ސްޕޯޓްސް އެވޯޑްސްގައި އެންމެ މޮޅު އެސޯސިއޭޝަނަކަށް ހޮވުނު ބެޑްމިންޓަން އެސޯސިއޭޝަން އޮފް މޯލްޑިވްސް (ބީއޭއެމް)ގެ މައްސަލައެއް ވެސް މި ވަގުތު އޭސީސީން އަންނަނީ ތަހުގީގު ކުރަމުންނެވެ.
ކުޅިވަރާ ބެހޭ އެކިއެކި މުއައްސަސާތަކުން ކޮރަޕްޝަން މަދުކުރުމުގެ ގޮތުން، އެންޓި ކޮރަޕްޝަން ކޮމިޝަން (އޭސީސީ) އާއި ސްޕޯޓްސް މިނިސްޓްރީ ގުޅިގެން، "ޕްރޮމޯޓިން އެންޓި ކޮރަޕްޝަން އޮނެސްޓީ އެންޑް އެކައުންޓަބިލިޓީ އިން ސްޕޯޓްސް - ޕަޗަސް" ގެ ނަމުގައި މިދިޔަ ޖުލައި މަހު ކެމްޕެއިނެއް ފެށި އެވެ.
ފުޓްބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް)އާ ގުޅޭ ކޮރަޕްޝަންގެ ގިނަ މައްސަލަތަކެއް އޭސީސީން މީގެކުރިން ބަލާފައިވާއިރު، ޕޮލިހުން މިހާރު ވެސް އަންނަނީ އެފްއޭއެމްގެ މާލީ ހިޔާނާތުގެ ގިނަ މައްސަލަތަކެއް ތަހުގީގު ކުރަމުންނެެވެ.
