ޓެކްސް އެޕީލް ޓްރައިބިއުނަލުން ހުސްވެފައިވާ އެ ޓްރައިބިއުނަލްގެ މެންބަރުކަމުގެ ހަތަރު މަގާމަށް އައްޔަން ކުރަން މަޖިލީހުން މިއަދު ރުހުން ދިން ހަތަރު ބޭފުޅުންގެ ތެރޭގައި ސުޕްރީމްކޯޓުގެ ފަނޑިޔާރު ކަމުން 2019 ވަނަ އަހަރު ވަކިކުރި އަބްދުލް ޣަނީ މުހައްމަދު ހިމެނިއްޖެ އެވެ.
ލޭބަ ޓްރައިބިއުނަލަށް ހަތަރު ބޭފުޅަކު އައްޔަންކުރުމަށް އެ މަގާމުތަކަށް ކުރިމަތިލާން ރައީސް އޮފީހުން ހުޅުވައިލުމުން ކުރިމަތިލެއްވި ބޭފުޅުންގެ ތެރެއިން ޝަރުތުހަމަވާ 13 ބޭފުޅެއްގެ ނަން ރައީސް ޑރ. މުހައްމަދު މުއިއްޒު މަޖިލީހަށް ފޮނުއްވި އިރު އެ ލިސްޓްގައި ޣަނީގެ ނަން އޮތީ ނުވަ ވަނައިގަ އެވެ.
އެހެން ނަމަވެސް އެ ބޭފުޅުންގެ ތެރެއިން ހަތަރު ބޭފުޅަކަށް ރުހުން ދިނުމަށް މަޖިލީހުގެ ޖުޑީޝަރީ ކޮމިޓީން ދިރާސާކޮށް، މ އިންޓަވިއުކުރުމަށް ފަހު އެންމެ މަތީ މާކްސް ލިބިވަޑައިގެންނެވި ހަތް ބޭފުޅެއް ހިމެނޭ ލިސްޓެއް އެކުލަވައިލި އިރު، 93 ޕަސެންޓް މާކުހާ އެކު އެއް ވަނައިގައި އޮތީ ޣަނީގެ ނަމެވެ.
އެ ރިޕޯޓްގައިވާ ތަރުތީބުން މިއަދުގެ ޖަލްސާގައި ނެގި ވޯޓުގައި، ޓެކްސް އެޕީލް ޓްރައިބިއުނަލަށް އައްޔަންކުރަން ރުހުން ދިނީ (1) ވަނަ، (2) ވަނަ، (3) ވަނަ އަދި (7) ވަނައިގައި ކޮމިޓީން ހިމަނާފައި އޮތް ބޭފުޅުންނަށެވެ.
އެ ހުރިހާ ބޭފުޅުންނަށް ވެސް ރުހުން ދޭން ފެންނަ ކަމަށް ފާސްކުރީ މަޖިލީހުގެ މިއަދުގެ ޖަލްސާގައި ބައިވެރިވަޑައިގެން ވޯޓު ދެއްވި 68 މެންބަރުންގެ އިއްތިފާގުންނެވެ.
މަޖިލީހުން މި ގޮތަށް ފާސްކުރި އިރު ޖުޑީޝަރީ ކޮމިޓީން މާކްސްދީ އެކުލަވައިލި ހަތް ބޭފުޅުންގެ ލިސްޓުގައި ޝިފްޒާގެ ނަން އޮތީ ހަތް ވަނަައިގަ އެވެ. މަޖިލީހުން ރުހުން ނުދިނީ އެ ލިސްޓްގެ ފަސްވަނައިގައި އޮތް މުހަމަދު އަމީން ޒާހިރު އާއި ހަވަނައިގައި އޮތް އަބްދުﷲ އަބްދުލް ހަކީމް އަށެވެ.
ޣަނީ ސްޕްރީމްކޯޓުގެ ފަނޑިޔާރުކަމުން ވަކިކުރީ އޭނާ ވަކިކުރަން ޖުޑީޝަލް ސާވިސް ކޮމިޝަނުން ނިންމައި އެކަން ރައްޔިތުންގެ މަޖިލީހަށް ހުށަހެޅުމުން ޖުޑީޝަރީ ކޮމިޓީން އެ މައްސަލަ ބަލައި އެކުލަވައިލި ރިޕޯޓަށް ބަހުސްކޮށް، ޑިސެމްބަރު 4، 2019 ގައި މަޖިލީހުގެ ޖަލްސާއެއްގައި ނެގި ވޯޓެއްގަ އެވެ.
އެވޯޓްގައި އޭނާ ވަކިކުރަން 64 މެންބަރަކު ވޯޓު ދެއްވި އެވެ.
އޭނާ ސުޕްރީމް ކޯޓަށް އައްޔަން ކުރީ ކުރީގެ އުއްތަމަ ފަނޑިޔާރު ޑރ. އަބްދުﷲ ސައީދާއި ފަނޑިޔާރު އަލީ ހަމީދާ ދެކޮޅަށް ކުރީގެ ރައީސް އަބްދުﷲ ޔާމީނުގެ ސަރުކާރުން ޖިނާއީ ދައުވާ ކުރުމުން، އެ ދެބޭފުޅުން ވަކިކުރުމަށް ފަހު 2018 ވަނަ އަހަރު އެވެ.
