މި އަހަރަށް ފާސްކޮށްފައިވާ 49.8 ބިލިއަން ރުފިޔާގެ ބަޖެޓުން ނުވާނެ ކަމަށް ނިންމައި، ބަޖެޓު ސަޕްލިމެންޓުގެ ގޮތުގައި ފަސް ބިލިއަނަށް ވުރެ ގިނަ ރުފިޔާ ހޯދަން ފިނޭންސް މިނިސްޓްރީން ރައްޔިތުންގެ މަޖިލީހަށް ސަޕްލިމެންޓްރީ ބަޖެޓެއް މިއަދު ހުށަހަޅައިފި އެވެ.
ސަޕްލިމެންޓަރީ ބަޖެޓު ހުށަހަޅަން ޖެހުނު ސަބަބު ސާފުކޮށްދެމުން ފިނޭންސުން މައިގަނޑު ގޮތެއްގައި ބުނީ މިހާރު ފާސްކޮށްފައިވާ ބަޖެޓަކީ ކުރީ ސަރުކާރުން ފާސްކޮށްފައިވާ ބަޖެޓެއް ކަމަށާއި، ބަޖެޓު އެގޮތަށް ތަންފީޒުކުރުމުގައި ގިނަ ގޮންޖެހުންތަކެއް އެބަހުރި ކަމަށެވެ.
އެގޮތުން ފާހަގަކުރި މައްސަލަތަކުގެ ތެރޭގައި މި އަހަރުގެ ޖުލައިން ފެށިގެން ހަރަދު ކުޑަކުރުމަށްޓަކައި ރިފޯމްތަކެއް ގެންނަން ބަޖެޓުގައި އޮތް ނަމަވެސް، އެ ރިފޯމްތައް ތަންފީޒުކުރެވާނެ ގޮތެއް އެކުލަވާލާފައި ނުވާ ކަމަށެވެ. އެކަމަށްޓަކައި ކުރަން ޖެހުނު ޓެކްނިކަލް މަސައްކަތްތައް ކުރަން ޖެހުނީ މި ސަރުކާރުން ކަމަށް ފާހަގަކުރަމުން ފިނޭންސުން ތުހުމަތުކުރީ ކުރީ ސަރުކާރުން އެ ޒިންމާއިން ރެކިގެންފައިވާ ކަމަށެވެ.
ސަޕްލިމެންޓަރީ ބަޖެޓުގެ އުސްއަލިތައް
- ޕީއެސްއައިޕީއަށް - ދެ ބިލިއަން ރުފިޔާ
- ސަބްސިޑީއަށް - 1.02 ބިލިއަން ރުފިޔާ
- ސަރުކާރު ކުންފުނިތަކަށް ފައިސާ ދޫކުރަން - 441.4 ބިލިއަން ރުފިޔާ
- ކޮންޓިންޖެންސީ ބަޖެޓަށް - 650 މިލިއަން ރުފިޔާ
- ސްޓޫޑެންޓު ލޯނު ދޫކުރުމަށް - 458.4 މިލިއަން ރުފިޔާ
- މެޑިކަލް ކޮންސިއުމަބަލްސްއަށް - 200 މިލިއަން ރުފިޔާ
- ބޭސްފަރުވާގެ އެހީއަށް - 262.6 މިލިއަން ރުފިޔާ
- މުސާރަ އާއި އުޖޫރައަށް - 24.4 މިލިއަން ރުފިޔާ
އޭގެ އިތުރުން ޕީއެސްއައިޕީ މަޝްރޫއުތަކަށް ކުދި އަދަދުތަކުން ބަޖެޓު ކުރުމަށް ފަހު ހުއްޓިފައި ހުރި ޕްރޮޖެކްޓުތައް ހިންގުން މި ސަރުކާރަށް ޖައްސާފައިވާ ކަމަށް ވެސް ފިނޭންސުން ބުންޏެވެ. އަދި މިކަން މިގޮތަށް ކުރީ މިދިޔަ އަހަރުގެ ތެރޭގައި މި މަޝްރޫއުތައް ބޮޑެތި އަދަދުތަކުން ކޮންޓްރެކްޓު ކުރުމަށް ފަހު އެޑްވާންސް ޕޭމަންޓުތައް ދޫކުރުމަށް ފަހުގައި ކަމަށް ވެސް އެ މިނިސްޓްރީން ބުނެފައިވެ އެވެ.
ހަމައެހެންމެ ފާއިތުވި އަހަރުގެ ބިލުތަކަށް ފައިސާ ދެއްކުމަށާއި، އަލަށް ފަށާފައިވާ މެގަ މަޝްރުއޫތަކުގެ ދުވެލި އަންދާޒާކުރި މިންވަރަށް ވުރެ ބާރަށް ހިނގާފައިވާތީ އެ މަޝްރޫއުތަކަށް ފައިސާ ދެއްކުމަށް ވެސް ބަޖެޓު ސަޕްލިމެންޓު ކުރަން ޖެހޭ ކަމަށް ފިނޭންސުން ބުނެފައިވެ އެވެ. ސަޕްލިމެންޓު ކުރާ ފަސް ބިލިއަންގެ ތެރެއިން ދެ ބިލިއަން ހަރަދު ކުރަނީ ޕީއެސްއައިޕީއަށެވެ.
ސަޕްލިމެންޓަރީ ބަޖެޓު ހުށަހަޅަން ފިނޭންސުން ފާހަގަކުރި އިތުރު ސަބަބުތައް
- ރައީސް ޑރ. މުހައްމަދު މުއިއްޒުގެ ސަރުކާރުގެ ތަސައްވުރާއި ވިސްނުން ބަޖެޓުގައި ފުރިހަމައަށް ހިމެނިފައިނުވުން
- މެޑިކަލް ކޮންސިއުމަބަލްސްގެ ހަރަދު އަންދާޒާކޮށްފައިވާ މިންވަރަށްވުރެ އިތުރުވުން
- އިންޑިރެކްޓް ސަބްސިޑީތަކަށް ކުރާ ހޭދަ އިތުރުވާނެކަމަށް ބެލެވުން
- ސްޓުޑަންޓް ލޯން ސްކީމުގެ ދަށުން އިތުރު ދަރިވަރުންނަށް ލޯން ދޫކުރުން
ސަޕްލިމެންޓަރީ ބަޖެޓަށް 5.1 ބިލިއަަން ރުފިޔާ ހުށަހަޅާފައިވާއިރު، މި އަހަރު ބަޖެޓު ކުރީ ސަރުކާރުން ފާސްކުރީ ބަޖެޓަށް 60 ބިލިއަން ރުފިޔާ ހިނގާނެ ކަން އެނގެން އޮއްވާ ކަމަށް ވެސް ފިނޭންސް މިނިސްޓަރު މޫސާ ޒަމީރު މަޖިލީހުގައި ވިދާޅުވި އެވެ. އަދި މި ވަރަށް ސަޕްލިމެންޓު ކުޑަ ކުރެވުނީ ވެސް ހަރަދުތައް ކޮންޓްރޯލް ކުރުމަށް އަޅާފައިވާ ފިޔަވަޅުތަކާ އެކީ ކަމަށް އޭނާ ވިދާޅުވި އެވެ.
ޒަމީރު އިތުރަށް ވިދާޅުވި ގޮތުގައި ކުރީ ސަރުކާރާ ހިލާފަށް މި ސަރުކާރުން މާލިއްޔަތު ގާނޫނުގައިވާ ގޮތަށް ކުރިއަށް އޮތް މަސްތަކުގައި ހިނގާނެ ކަމަށް ލަފާކުރާ ހަރަދުތަކަށް މަޖިލީހުން ހުއްދަ ހޯދާ ގޮތަށެވެ. އަދި ކުރީ ސަރުކާރުން މިކަން މިގޮތަށް ކުރި ކަން އޭރު އޮތް މަޖިލީހުގެ ރިޔާސަތުން ވެސް ތަކުރާރުކޮށް ފާހަގަކުރި ކަމަށް އޭނާ ވިދާޅުވި އެވެ.
ފިނޭންސުން ހިއްސާކުރި އަދަދުތަކުގައިވާ ގޮތުގައި މިދިޔަ މަހުގެ ނިޔަލަށް މި އަހަރަށް ފާސްކުރީ 49.8 ބިލިއަން ރުފިޔާގެ 74 ޕަސެންޓު ހޭދަވެއްޖެ އެވެ. މި ބަޖެޓަށް ފައިނޭންސް ކުރަނީ ބޭރުގެ ބާޒާރުން 1.4 ބިލިއަން ރުފިޔާ އަދި އެތެރޭގެ ބާޒާރުން ތިން ބިލިއަނަށް ވުރެ ގިނަ ރުފިޔާ ހޯދާ ގޮތަށެވެ.
ހަރަދުތަކުގެ އިތުރުން ސަޕްލިމެންޓަރީ ބަޖެޓުގައި އާމްދަނީގެ އަންދާޒާތަކަށް ވެސް ބަދަލުތަކެއް ގެނެސްފައިވެ އެވެ. އެގޮތުން 640 މިލިއަން ރުފިޔާ އިތުރަށް ލިބޭނެ ކަމަށް އަންދާދާކޮށްފާއިރު، މިއާ އެކީގައި ޖުމްލަ އާމްދަނީ 34.1 ބިލިއަން ރުފިޔާއަށް އަރާނެ އެެވެ. ބަޖެޓު ސަޕްލިމެންޓާއެކީ ޖުމްލަ ބަޖެޓު 55 ބިލިއަނާ ގާތްކުރެ އެވެ.
