ބާސެލޯނާ (އޮކްޓޫބަރު 24) - ޗެމްޕިއަންސް ލީގުގައި ރޭ ލިވަޕޫލާއި ބާސެލޯނާ އަދި މެންޗެސްޓާ ސިޓީ ކުޅުނު މެޗުތަކުން މޮޅުވެއްޖެ އެވެ.
ބާސެލޯނާ އިން ބަޔާން މިއުނިކް ބަލިކުރީ 4-1 އިންނެވެ. ސިޓީން ސްޕާޓާ ޕްރާގުގެ މައްޗަށް ކުރިހޯދީ 5-0 އިންނެވެ. އަދި އާރްބީ ލައިޕްޒިިގު އަތުން 1-0 އިން މޮޅުވެ، ލިވަޕޫލުން ވަނީ މުބާރާތުގައި ފުރިހަމަ ރެކޯޑް ދަމަހައްޓައިފަ އެވެ.
ލިވަޕޫލަށް ރޭގެ މެޗުގައި ހަމައެކަނި ލަނޑު ޖަހައިދިނީ ފުރަތަމަ ހާފުގައި ޑާވިން ނޫނޭޒް އެވެ. މިއީ، މުުހައްމަދު ސަލާހު ބޮލުން ޖައްސާލި ބޯޅައެއް ދަނޑިއަށް އަރައި، ނޫނޭޒް ޖެހި ގޯލެކެވެ.
އެސްޓަން ވިލާ އާއި ލިވަޕޫލަކީ މި ފަހަރުގެ ޗެމްޕިއަންސް ލީގުގައި ކުޅުނު ތިން މެޗުން މޮޅުވި ހަަމައެެކަނި ޓީމެވެ. އަނެއްކޮޅުން، ލިވަޕޫލްގެ އާ ކޯޗު އާނާ ސްލޮޓް އަކީ އިނގިރޭސި ކްލަބަކާ ހަވާލުވެ، ފުރަތަމަ 12 މެޗުގެ ތެރެއިން 11 މެޗުން މޮޅުވި ހަމައެކަނި ޓީމެވެ.
ބަޔާނުން ބާސެލޯނާގެ މައްޗަށް 2020 ވަނަ އަހަރުގެ ޗެމްޕިއަންސް ލީގުގައި 8-2 އިން ކުރިހޯދިއިރު، ބަޔާންގެ ކޯޗަކަށް ހުރި ހަންސީ ފްލިކަކީ މިިހާރު ބާސެލޯނާގެ ކޯޗެވެ. ރޭ ބާސެލޯނާ އިން ބަޔާން ބަލިކުރީ މެޗު ޑޮމިނޭޓްކޮށްގެންނެވެ. ބާސެލޯނާގެ ލަނޑުތައް ޖެހީ، ރަފީނިއާ ހެޓްރިކެއްގެ އިތުރުން، ކުރިން ބަޔާނަށް ކުޅުނު ރޮބަޓް ލެވަންޑޯސްކީ އެވެ.
މި މެޗުގައި، ބަޔާންގެ ހަމައެކަނި ލަނޑު ޖެހީ ހެރީ ކޭން އެވެ. ޗެމްޕިއަންސް ލީގުގައި މި ފަހަރު ބަޔާން ކުޅުނު ތިން މެޗުގެ ތެރެއިން ދެ މެޗުން ބަލިވިއިރު، އެ ޓީމު އޮތީ 23 ވަނައިގަ އެވެ. އެހެންކަމުން، އެ ޓީމުގެ ކޯޗު ވިންސެންޓް ކޮމްޕެނީ އަށް އަންނަނީ ޕްރެޝަރު ކުރިމަތިވަމުންނެވެ.
ސިޓީން ރޭ ސްޕާޓާ ކޮޅަށް ނަތީޖާ ނެރުނުއިރު، އާލިން ބްރައުޓް ހާލަންޑް ވަނީ ދެ ގޯލު ޖަހައިފަ އެވެ. ދެން ލަނޑުތައް ޖެހީ، ފިލް ފޯޑެން، ޖޯން ސްޓޯންސްގެ އިތުރުން، ޕެނަލްޓީ އަކުން މަތެއުސް ނޫނޭޒް އެވެ.
ސިޓީ ހިމެނޭހެން ހަތް ޓީމަކަށް ހަތް ޕޮއިންޓް ލިބިފައިވާއިރު، ސިޓީ ތިން ވަނައިގައި އޮތީ ލަނޑުގެ ތަފާތުންނެވެ.
