އިކޮނޮމިކް މިނިސްޓްރީން ޗެނަލް 13 ގެ މައި ކުންފުނި "މީޑިއާ ރިންގް ޕްރައިވެޓް ލިމިޓެޑް" ކުންފުނި އުވާލުމުގެ މަރުހަލާއިން ރަޖިސްޓާޑްއަށް ބަދަލު ކުރުމުން ލައިސަންސް ބާތިލް ނުކުރަން ބްރޯޑްކާސްޓިން ކޮމިޝަން (ބްރޮޑްކޮމް) އިން ނިންމައިފި އެވެ.
ބްރޮޑްކޮމްގެ ނައިބު ރައީސް މުހައްމަދު ފަޒީން "އަދަދު" އަށް ވިދާޅުވީ ޗެނަލް 13 ގެ މައި ކުންފުނި އުވާލުމުގެ މަރުހަލާއިން ރަޖިސްޓާޑްއަށް ބަދަލު ކުރުމާ ގުޅިގެން، ލައިސަންސް ބާތިލު ކުރުމުގެ މަސައްކަތް ހުއްޓާލާފައިވާ ކަމަށެވެ.
ބްރޮޑްކޮމްއިން ކުރިން ޗެނަލް 13 އަށް ފޮނުވި ސިޓީގައި ބުނީ އިކޮނޮމިކް މިނިސްޓްރީގެ ކުންފުނިތަކުގެ ރަޖިސްޓްރީގައި މީޑިއާ ރިންގް ޕްރައިވެޓް ލިމިޓެޑް އުވާލާ ކުންފުނީގެ ލިސްޓުގައި ހިމަނާފައިވާތީ، އެ ކުންފުނީގެ އެއް ހިއްސާދާރު އަދި މެނޭޖިން ޑިރެކްޓަރު އަހުމަދު ނާސިފް އެ ހާލަތުގައި ޓީވީން ބްރޯޑްކާސްޓް ކުރަމުންދާތީ އެކަމާ ކަންބޮޑުވުން ފާޅުކޮށް އެ ކޮމިޝަނަށް ސިޓީ ހުށަހަޅާފައިވާ ކަމަށެވެ.
ޗެނަލް 13 އިން އެކަމަށް ޖަވާބުދާރީވާން އަންގާފައި ވަނިކޮށް، މިއަދު ބްރޮޑްކޮމްއާ އެކު އެ ޗެނަލްއިން ވަނީ ބައްދަލުވުމެއް ބާއްވާފަ އެވެ.
ބްރޮޑްކޮމްއިން އަންނަނީ އެ ޗެނަލްއިން ގެނެސްދިން "ބެލްކަނި" ޑޮކިއުމެންޓްރީގެ މައްސަލަ ވެސް ކޮމިޝަނުން ބަލަމުންދާ ދަނޑިވަޅެއްގަ އެވެ. އެ މައްސަލައާ ގުޅިގެން ޗެނަލް 13 އިން ގެނެސްދިން އެ ޑޮކިއުމެންޓްރީގެ ހުރިހާ ކޮންޓެންޓެއް ދެއްކުން ހުއްޓާލައި، ސޯޝަލް މީޑިއާ ޕްލެޓްފޯމްތަކުން ވެސް އެއާ ބެހޭ ކޮންޓެންޓްތައް ނަގަން އެންގި އެވެ.
ނަމަވެސް އެ މައްސަލައާ ގުޅޭ ގޮތުން މިހާތަނަށް އަޅާނެ ފިޔަވަޅެއް ބްރޮޑްކޮމްއިން ނިންމާފައެއް ނުވެ އެވެ.
