އިކޮނޮމިކް މިނިސްޓްރީގެ ކުންފުނިތަކުގެ ރަޖިސްޓްރީގައި ޗެނަލް 13 ހިންގާ "މީޑިއާ ރިންގް ޕްރައިވެޓް ލިމިޓެޑް" ކުންފުނި އުވާލުމުގެ މަރުހަލާގައި އޮތުމުން އެ ޓީވީއަށް ދީފައިވާ ބްރޯޑްކާސްޓް ކުރުމުގެ ލައިސަންސް ބާތިލު ކުރުމުގެ މަސައްކަތް ފަށާފައިވާ ކަމަށް މޯލްޑިވްސް ބްރޯޑްކާސްޓިން ކޮމިޝަން (ބްރޮޑްކޮމް) އެ ޗެނަލްއަށް އަންގައިފި އެވެ.
ބްރޮޑްކޮމްއިން ޗެނަލް 13 އަށް ފޮނުވި ސިޓީގައި ބުނީ އިކޮނޮމިކް މިނިސްޓްރީގެ ކުންފުނިތަކުގެ ރަޖިސްޓްރީގައި މީޑިއާ ރިންގް ޕްރައިވެޓް ލިމިޓެޑް އުވާލާ ކުންފުނީގެ ލިސްޓުގައި ހިމަނާފައިވާތީ، އެ ކުންފުނީގެ އެއް ހިއްސާދާރު އަދި މެނޭޖިން ޑިރެކްޓަރު އަހުމަދު ނާސިފް އެ ހާލަތުގައި ޓީވީން ބްރޯޑްކާސްޓް ކުރަމުންދާތީ އެކަމާ ކަންބޮޑުވުން ފާޅުކޮށް އެ ކޮމިޝަނަށް ސިޓީ ހުށަހަޅާފައިވާ ކަމަށެވެ.
ނާސިފް ފޮނުވި ސިޓީގައި އޭނާގެ ހިއްސާ ބަދަލުކޮށް މަގާމުން ވަކިކޮށް އެދި ކުންފުނީގެ ސެކެޓްރީއަށް ހުށަހަޅާފައިވާ ކަމަށް ބުނެ ލައިސަންސް ބާތިލު ކުރަން އެދުނު ނަމަވެސް، ކުންފުނީގެ އެއްވެސް ނިންމުމެއް (ބޯޑް ރިޒޮލިއުޝަން) އެއް ހުށަހަޅާފައި ނުވާތީ އެކަން އޮޅުން ފިލުވަން ރިންގް ޕްރައިވެޓް ލިމިޓެޑާ އެކު ބައްދަލުވުމެއް ބޭއްވުމަށް ދެ ފަހަރު އެދުނު ނަމަވެސް އެކަން ނުކުރެވޭކަން ބްރޮޑްކޮމް އިން ފާހަގަކުރި އެވެ.
"ގާނުނު ނަންބަރު 7/2023 (ކުންފުންޏާ ބެހޭ ގާނޫނު) ގެ 246 ވަނަ މާއްދާގެ ދަށުން އުވާލުމުގެ މަސައްކަތް ފަށާފައިވާ އަދި އެ މާއްދާގެ ދަށުން ކުންފުނި އުވާލުމަށް ކަނޑައެޅިތާ ތިން މަސް ދުވަހުގެ ތެރޭގައި ފީ ނުވަތަ ޖޫރިމަނާ ދައްކާފައި ނުވާ ކުންފުންޏެއް ކަމާއި އަދި އެއްވެސް ސަބަބަކާއި ހުރެ ކުންފުންޏެއް އުވާލުމަށް އެ މިނިސްޓްރީން ކަނޑައަޅައި، ވިޔަފާރީގެ ރަޖިސްޓްރީގައި ވައިންޑިން އަޕް ސްޓޭޓަސްއަށް ބަދަލު ކުރުމާ އެކު ދައުލަތުގެ އެކި އިދާރާތަކުން ދޫކޮށްފައިވާ ހުއްދަ ނުވަތަ ލައިސަންސް ވެސް ބާތިލު ކުރަން ޖެހޭ ކަމަށް އެ ވުޒާރާއިން ދެކޭ ކަމުގައި ލަފާ ދެއްވާފައިވޭ،" ބްރޮޑްކޮއިން ޗެނަލް 13 އަށް ފޮނުވި ސިޓީގައި ބުންޏެވެ.
ޗެނަލް 13 ގެ ބްރޯޑްކާސްޓް ކުރުމުގެ ލައިސަންސް ބާތިލް ކުރުމުގެ މަސައްކަތް އެ ކޮމިޝަނުން ފަށާފައިވާތީ އެކަން އެ ޗެނަލްގެ ސަމާލު ކަމަށް ވަނީ ގެނެސްފަ އެވެ. އަދި ޗެނަލް 13 އިން އެ ކަމަށް ޖަވާބުދާރީވެ، މާދަމާ މެންދުރު 2:00 ގެ ކުރިން ލިޔުމުން އެކަން ކޮމިޝަނަށް ހުށަހެޅުމަށް ވެސް ބްރޮޑްކޮމްއިން ވަނީ އަންގާފަ އެވެ.
ޗެނަލް 13 ގެ ބްރޯޑްކާސްޓިން ލައިސަންސް ބާތިލު ކުރުމުގެ މަސައްކަތް ބްރޮޑްކޮމްއިން ފަށާފައި ވަނީ އެ ޗެނަލްއިން ގެނެސްދިން "ބެލްކަނި" ޑޮކިއުމެންޓްރީގެ މައްސަލަ ވެސް ކޮމިޝަނުން ބަލަމުންދާ ދަނޑިވަޅެއްގަ އެވެ. އެ މައްސަލައާ ގުޅިގެން ޗެނަލް 13 އިން ގެނެސްދިން އެ ޑޮކިއުމެންޓްރީގެ ހުރިހާ ކޮންޓެންޓެއް ދެއްކުން ހުއްޓާލައި، ސޯޝަލް މީޑިއާ ޕްލެޓްފޯމްތަކުން ވެސް އެއާ ބެހޭ ކޮންޓެންޓްތައް ނަގަން އެންގި އެވެ.
ނަމަވެސް އެ މައްސަލައާ ގުޅޭ ގޮތުން މިހާތަނަށް އަޅާނެ ފިޔަވަޅެއް ބްރޮޑްކޮމްއިން ނިންމާފައެއް ނުވެ އެވެ.
