އަވަށްޓެރި ސްރީލަންކާގެ މަޝްހޫރު ފަތުރުވެރިކަމުގެ މަންޒިލެއް ކަމަށްވާ އަރުގަމް ބޭ ސަރަހައްދަށް ހަމަލާއެއް ދީފާނެ ކަމަށް ބުނެ އެ ގައުމުގައި ހުންނަ އެމެރިކާ އެމްބަސީން އެލާޓެއް ނެރެފި އެވެ.
އެމެރިކާ ރައްޔިތުން އަރުގަމް ބޭއަށް ދަތުރު ނުކުރަން އެދި ނެރުނު އެލާޓުގައި ބުނީ އަރުގަމް ބޭ ސަރަހައްދުގެ ޓޫރިސްޓު ފެސިލިޓީތަކާއި ސަރަހައްދުތަކަށް އަމާޒުކޮށް ހަމަލާއެއް ދޭން އުޅޭކަމުގެ މައުލޫމާތު ލިބިފައިވާ ކަމަށެވެ.
މި މައުލޫމާތުގެ ސީރިއަސްކަމަށް ބަލާ އެ ސަރަހައްދަށް އެމެރިކާ އެމްބަސީގެ މުވައްޒަފުން ދަތުރުކުރުންވެސް މަނާކޮށްފައިވާނެ ކަމަށާއި އިތުރު މައުލޫމާތު ލިބެންދެން އެ ސަރަހައްދަށް އެ ގައުމުގެ ރައްޔިތުން ނުދިއުމަށް އެދޭ ކަމަށްވެސް އެމްބަސީން ބުންޏެވެ.
އޭގެއިތުރުން، އެ ސަރަހައްދުން ޝައްކުކުރެވޭ ކަމެއް ފެނިއްޖެނަމަ ލަންކާގެ ސަލާމަތީ ހިދުމަތްތަކަށް މައުލޫމާތު ދިނުމަށާއި ލޯކަލް ހަބަރުތައް ބެލުމަށާއި ހާލަތު ރަނގަޅު ނޫން ކަމަށް ބެލެވޭނަމަ ހުރި ތަނެއް ދޫކޮށް ދިޔުމަށްވެސް އެމެރިކާއިން އެ ގައުމުގެ ރައްޔިތުންނަށް ވަނީ އިރުޝާދު ދީފަ އެވެ.
ލަންކާގެ އިރުދެކުނުގައި އޮންނަ ސާފިން އަށް މަޝްހޫރު ޓޫރިސްޓު ޑެސްޓިނޭޝަނެކެވެ. އެ ސަރަހައްދަށް ދިވެހިންވެސް ޒިޔާރަތްކުރެ އެވެ. ނަމަވެސް މިކަމާ ގުޅިގެން ދިވެހި ހާރިޖިއްޔާއިން އަދި ލަންކާގައި ހުންނަ ދިވެހި އެމްބަސީންވެސް ބަހެއް ނުބުނެ އެވެ.
