ޗައިނާގައި މިހާރު ކުރިއަށްދާ އޭއެފްސީ 17 އަހަރުން ދަށުގެ އޭޝިއަން ކަޕް ކޮލިފައިންގައި ރާއްޖޭން ކުޅެން ޖެހޭ ފަހު ދެ މެޗުގައި ޓީމުގެ މުހިންމު ދެ ކުޅުންތެރިން ކަމަށްވާ މުހައްމަދު އިލާން އިމްރާން އާއި ޔޫސުފް އަޔާން އާމިރު އަށް އަނިޔާގެ ސަބަބުން ނުކުޅެވޭނެ ކަމަށް ޓީމުން ބުނެފި އެވެ.
ފަހު ދެ މެޗު އޮތީ، ދެކުނު ކޮރެއާ އާއި ޗައިނާއާ ދެކޮޅަށެވެ.
ޓީމުގެ ކެޕްޓަން، އިލާން، 15، އާއި މިޑްފީލްޑަރު އަޔާން، 16، އަށް އަނިޔާވެފައި ވަނީ މިދިޔަ ހޯމަ ދުވަހު ބަހްރޭނާ ދެކޮޅަށް ކުޅުނު މެޗުގަ އެވެ.
އަޔާން އާއި އިލާން އަކީ، ރާއްޖޭގެ 17 އަހަރުން ދަށުގެ ޓީމުގެ ފުރަތަމަ އެގާރައިގައި ގަވާއިދުން ކުޅެމުން އަންނަ މުހިންމު ދެ ކުޅުންތެރިންނެވެ.
ބަހްރޭންގެ ކުޅުންތެރިއަކު ކައިރިން އިލާން (ވ) ބޯޅަ ހިފައިގެންދަނީ.--- ފޮޓޯ: އޭއެފްސީ
ޓީމުގެ އޮފިޝަލަކު، "އަދަދު ސްޕޯޓްސް" އަށް ބުނީ، ދެ ކުޅުންތެރިންނަށް ވެސް އަނިޔާގެ ސަބަބުން ކުރިއަށް އޮތް ދެ މެޗު ގެއްލޭނެ ކަަމަށެވެ.
އެ ގޮތުން، ފުރަތަމަ މެޗުގައި ބޫޓާން ކޮޅަށް ދެ ގޯލު ޖެހިި އިލާންގެ ފަލަމަސްގަނޑު ސްޓްރެޗްވެފައިވަނީ ބަހުރޭނާ ދެކޮޅަށް ކުޅުނު މެޗުގަ އެވެ. ބަހްރޭނުން 83 ވަނަ މިނިޓްގައި ލަނޑު ޖަހައި، ރާއްޖެ ބަލިކުރި މެޗުގެ 36 ވަަނަ މިނިޓްގައި، އިލާން ބަދަލުކުރަން ޖެހުނެވެ.
އަޔާން އަށް އަނިޔާވެގެން ބަދަލުކުރަން ޖެހުނީ 75 ވަނަ މިނިޓްގަ އެވެ. ހެދި ޓެސްޓްތަކުން އެނގިފައިވަނީ، އަޔާންގެ ކޮލާބޯން ބިދިފައިވާ ކަމެވެ. އެހެންކަމުން، މުއްދަތެއްގައި ކުޅުމާ ދުރުގައި ހުންނަން ޖެހޭނެ އެވެ.
ޗައިނާގެ ޑާލިއަންގައި ކުރިއަށްދާ ކޮލިފައިންގައި ރާއްޖެ ކުޅުނު ފުރަތަމަ މެޗުން ބޫޓާނާ 2-2 އިން އެއްވަރުވިއިރު، ދެ ވަނަ މެޗުން ބަހްރޭން އަތުން ބަލިވީ 1-0 އިންނެެވެ. ތިން ވަނަ މެޗުގައި ދެކުނު ކޮރެއާއާ މިއަދު ބައްދަލުކުރާއިރު، އެ ޓީމުން ވަނީ ކުޅުނު ފުރަތަމަ މެޗުން ބޫޓާން އަތުން 5-0 އިން މޮޅުވެފަ އެވެ.
ކޮލިފައިންގައި ރާއްޖެ ކުޅޭ ފަހު މެޗުގައި، ހުކުރު ދުވަހު ޗައިނާއާ ބައްދަލުކުރާނެ އެވެ.
