ބެލްގްރޭޑް، ސާބިއާ (އޮކްޓޫބަރު 23) - ޕްރޮފެޝަނަލް ޓެނިހުން ރިޓަޔާކުރަން ކައިރި މުސްތަގުބަލެއްގައި ނުވިސްނާ ކަމަށް ސާބިއާގެ ތަރި، ނޮވަކް ޖޮކޮވިޗް ބުނެފި އެވެ.
އެކާވީސް ވަނަ ގަރުނުގައި ފެނުނު، ޓެނިހުގެ މަޝްހޫރު "ބިގް ފޯ" ގެ ތެރެއިން ރިޓަޔާނުކޮށް ހުރީ މިހާރު ޖޮކޮވިޗް، 37، އެކަންޏެވެ. އެ ގޮތުން، 2022 ވަނަ އަހަރު، ލެޖެންޑަރީ ތަރި، ސްވިޒަލެންޑުގެ ރޮޖާ ފެޑެރާ ރިޓަޔާކުރިއިރު، މި އަހަރުގެ އޮގަސްޓް މަހުގައި، ސްކޮޓްލެންޑްގެ އެންޑީ މަރީ ވަނީ ކުޅުން ހުއްޓާލައިފަ އެވެ. އަދި މީގެ ދުވަސްތަކެއް ކުރިން، ސްޕެއިނުގެ ރަފައެލް ނަޑާލް ވަނީ ރިޓަޔާމަންޓް އިއުލާނުކޮށްފަ އެވެ.
ޓެނިހުގެ ގްރޭންޑް ސްލޭމް މުބާރާތްތަކުގެ އެންމެ ގިނަ ތަށި ހާސިލްކޮށް، ކެރިއަރުގައި 100 ވަނަ އޭޓީޕީ މުބާރާތުގެ ތަށި ހޯދަން އަމާޒުހިފައިގެން ހުރި، ޖޮކޮވިޗް އެންމެ މަތީ ލެވަލްގައި ހުރެ ރިޓަޔާކުރުމަކީ އެންމެ ބޮޑު ކާމިޔާބަށް ވާނެ ކަމަށް ގިނަ ބަޔަކު ދެކެ އެވެ.
އެކަމަކު، ޖޮކޮވިޗް ވިސްނަނީ އެ ގޮތަކަށް ނޫނެވެ.
"(އޮލިމްޕިކް ރަން މެޑަލް) ގޯލްޑް ވެސް ލިބިއްޖެ، ޓެނިހުގެ ހުރިހާ ކާމިޔާބެއް ލިބިއްޖެ، ދެން، ރިޓަޔާކުރަންވީނު، މިއީ ގިނަ ބަޔަކު އަހަންނާ މެދު ދެކޭގޮތް، ނޫނީ ބޭނުންވާ ގޮތް ކަމަށް ވިޔަސް، އަހަރެން މި ހުރީ އެ ގޮތަކަށް ނޫން. ކައިރި މުސްތަގުބަލެއްގައި ރިޓަޔާކުރާނެ ވިސްނުމެއް އަދި ނާދޭ،" ޖޮކޮވިޗް ބުންޏެވެ.
ޖޮކޮވިޗް ބުނީ، ކެރިއަރުގައި ކުރިއަށްދާއިރު، އަބަދުވެސް އޭނާ ވިސްނަނީ ނުކުންނަ ކޮންމެ މުބާރާތެއްގެ ފޭވަރިޓްގެ ގޮތުގައި ހުރުމަށް ކަމަށެވެ. މި ވަގުތު ކެރިއަރު ދަނީ އެ ގޮތަށް ކަަމަށާއި އެހެންވެ، އަމިއްލަ ނަފްސަށް ވިސްނައިގެން އެންމެ ބޭނުމީ ކެރިއަރުގައި އިތުރު ކާމިޔާބީތައް ހޯދައިގެން ކުރިއަށްދާން ކަމަށް ޖޮކޮވިޗް ވަނީ ބުނެފަ އެވެ.
އެންމެ ފަހުން ރިޓަޔާމަންޓް އިއުލާނުކުރި ނަޑާލް ބުނީ، ޖޮކޮވިޗްގެ އެންމެ ބޮޑު ތަފާތަކީ، އަނިޔާއިން ސަލާމަތްވެގެން ހުރެ މަތީ ލެވަލްގައި ޕާފޯމް ކުރަން ކުރާ މަސައްކަތް ކަމަށެވެ.
ނަޑާލާއި ފެޑެރާ އަދި މަރޭގެ ކެރިއަރުގެ ފަހުކޮޅުގައި އަނިޔާގެ ސަބަބުން ގިނަ މެޗުތަކެއް ގެއްލުނެވެ.
