މެޑްރިޑް (އޮކްޓޫބަރު 23) - ޔުއެފާ ޗެމްޕިއަންސް ލީގުގެ އެންމެ ކާމިޔާބު ޓީމު ރެއާލް މެޑްރިޑުން ރޭ މުބާރާތުގައި ކުޅުނު މެޗުގައި ދެ ވަނަ ހާފުގައި ޖެހި ގޯލުތަކާ އެކު، 5-2 އިން ބޮރޫޝިއާ ޑޯޓްމަންޑް ބަލިކޮށްފި އެވެ.
މި މެޗުގައި، ރެއާލްގެ ވިނީޝިއުސް ޖޫނިއާ ވަނީ ހެޓްރިކެއް ހަދައިފަ އެވެ.
ރޭ ބޮލޯނިއާ އަތުން 2-0 އިން މޮޅުވި، އެސްޓަން ވިލާ އަކީ މި ފަހަރުގެ ޗެމްޕިއަންސް ލީގުގައި މިހާތަނަށް ކުޅުނު ތިން މެޗުން ވެސް މޮޅުވި ހަމައެކަނި ޓީމެވެ.
ރޭގެ މެޗުގައި، ރެއާލް ދަނޑުގައި ޑޯޓްމަންޑުން ފުރަތަމަ ހާފު ނިންމާލީ ދެ ގޯލުގެ ލީޑެއްގަ އެވެ. ޑޮންޔެލް މާލެން އާއި ޖޭމީ ގިޓެންސް ޖެހި ގޯލުތަކުން ޑޯޓްމަންޑުން ލީޑުގައި އޮތްއިރު، ފުރަތަމަ ހާފުގައި ރެއާލްގެ ޖޫޑް ބެލިންހަމް ޖެހި ޝޮޓެއް ހުރަސްދަނޑިއަށް ވަނީ އަމާޒުވެފަ އެވެ.
ދެ ވަނަ ހާފުގައި ރެއާލުން ފުރަތަމަ ލަނޑު ޖެހީ ކީލިއަން އެމްބާޕޭގެ ހުރަހަކުން އެންޓޯނިއޯ ރޫޑިގާ އެވެ. ވިނީޝިއުސް ފުރަތަމަ ޖެހި ގޯލު ރެފްރީ ނިންމީ އޮފްސައިޑް ކަމަށެވެ. އެކަމަކު، ވީޑިއޯ އެސިސްޓަންޓް ރެފްރީ (ވީއޭއާރް) އިން ބަލައި އެ ގޯލު ބަލައިގަންނަން ނިންމީ އެވެ. އޭގެ ފަހުން، އިންޑިވިޖުއަލް މޮޅު ދެ ގޯލު ޖަހައި، ވިނީޝިއުސް ވަނީ ރެއާލް ކޮޅަށް މެޗު އަނބުރާލައިފަ އެވެ. އަދި ރެއާލްގެ ފަހު ގޯލު ޖެހީ، ލޫކަސް ވަޒްކޭޒް އެެވެ.
މިއީ، މިދިޔަ ސީޒަނުގެ ޗެމްޕިއަންސް ލީގުގެ ރިޕީޓެކެވެ. ރެއާލުން 15 ވަނަ ފަހަރަށް ޗެމްޕިއަންސް ލީގު ކާމިޔާބުކުރީ ފައިނަލުގައި 2-0 އިން ޑޯޓްމަންޑް ބަލިކޮށްފަ އެވެ.
އެސްޓަން ވިލާ އިން ރޭ ބޮލޯނިއާ ކޮޅަށް ދެ ގޯލު ޖެހީ ވެސް ދެ ވަނަ ހާފުގަ އެވެ. އެ ގޮތުން، ފުރަތަމަ ލަނޑު ޖެހީ، ހިލޭޖެހުމަކުން ޖޯން މެކްގިން އެވެ. އަދި ދެ ވަނަ ގޯލު ޖެހީ، ބަދަަލަކަށް ކުޅެން އަރައި ވިލާ އަށް އަބަދުވެސް ތަފާތު ދައްކާ ފޯވާޑް ޖޯން ޑުރާން އެވެ.
